MUNICIPAL INTHLAN LO AWM TUR A 
MPF LOCAL FORUM HMALAKNA LEH THUCHHUAK

Chanmari West October 31:  Chanmari West MPF Local Forum Committee chuan ni 15/10/10 (Zirtawp) zing khan vengchhung political party hrang hrang hruaitu (OB) zawng zawngte a ko khawm a, Pol Party leh MPF Gen Hq in thawhhona thuthlung (9/7/10) an lo siam leh State Election Commission thuchhuak-Election Model Code of Conduct Rules 2010 bawhzuiin Candidate te leh party hrang hrangte zawm tur inhrilhhriatna a neihpui. Ni 3/11/10 AMC election lo awm tur atan Resolution an pass bawk a ni. He meeting hian party tinte chu Banner (2 aia tamlo), Poster (50 aia tam lo), flag (150 aia tam lo) theuh an siam phalsak anni bawk.

He inhmuhkhawma thutlukna angin party tinte’n lehkha pekchhuah tur an neih ang ang te ni 25/10/10 hma in thehluh tur tih a nih anga an rawn thehluh chu, MPF hruaitute’n bial insemin an sem sak vek a ni. Tin inthlanni a thingpui dawr siam an lo phalsak zet tawh, MHIP te chu remchan lohna  a awm avangin sut sak leh anni. MPF chuan pawl leh mimal tupawh inthlanna area leh a bul velah dawr siam a remti lo a ni, hei hian dawr awmsa/neisa te a huam lovang.

MPF leh Party thawhhona thuthlung: No-2:

i) A tak ram thleng thei tur leh tihhlawhtlin theih tur, policy leh programme duan nise.

ii) Mimal chungchangah thudik ziktluak lo hmanga inbeih loh ni. Party policy leh programme hi campaign au hla leh inzawrh na’n hman ni se.

iii) Dawt leh thubelchian dawllo leh finfiah theihloh hmang a inbeih loh ni se. 

Model Code of Conduct Rules, 2010 leh thawhhona thuthlung siam bawhchhetu te chu a tul ang zelin vantlang hriatah puan zar a ni ang. Inpuan mualpho a awmlohna turin MPF chuan mipuite leh party tin te a hriattirin a ngen nawn leh a ni

LEIMIN/LEIKHI TUARTE TANPUINA’N CHANMARI WEST IN VEHBUR A KHAWN

Mizoram dung leh vanga ruahtui tam avangin leimin leh leikhi a tam hle a, chung zingah chuan a khua a tuar nasa bik Mamit leh Ngopa a leimin/lei khi tuarte tanpuina atan CYMA ngenna in Chanmari West vengchhungah vehbur khawn a ni. He vehbur khawnna atang hian ` 68750 lai hmuh a ni, vengchhung mipuite chungah CWBYMA chu a lawm hle a ni. Section Wise a thawhlawm thawhdan hetiang hi a ni.

Section Khawn hmuh

Chawngbawla `  15, 030/-

Khuangchera `  12, 200/-

Taitesena `  18, 000/-

Neuva `    6, 500/-

Vanapa `  17, 020/-

   

Total : ` 68, 750/-

CWBYMA IN PE

Infiamna lama thalaite hmasawnna tur leh cho phurna atan CWBYMA chuan Chanmari West tlangval H. Vanlallawma, LPS Pro-Fight Boxing a tel chu ` 500/- a pe. Midang khel mek/khel tur an awm a nih chuan hmalak zel an tum. YMA hnungzui hian vengchhunga nu leh pate pawh hetiang kawngah hian pen chhuakin inphal deuh i la a lawmawm ngawt ang. 

YMA  GENERAL  CONFERENCE  2010 
A TIAK TA

(KUMPUAN BAWHZUI THA LAWMMAN 3na KAN DAWNG)

Chanmari West October 24: 65th YMA Gen. Conference, Ni 19-21 Oct.2010  chhunga neih chu a tiak ta.. Lunglei a nghah YMA Conferenceah hian Rorel Palai 1097 an kal a. Rorel palai bakah Chhimtu palai hi 3000 chuang niin, palai kal zingah hian C. Thanmawia (89) Khatla Br. chu upa ber a ni a, C. Zoremmawia (11) s/o C. Zoramliana (L) Tuikual chu N Br chu naupang ber a ni. Chanmari West Br. atangin member 16 an kal a, Mizoram a Branch YMA 800 chuang zingah Kumpuan bawhzui tha lawmman 3 na (Certificate leh ` 2000)  an rawn hawn a ni. He Conference chhunga thil thleng langsar zingah Usher zinga mi Tv Zodinsanga Lunglei Chanmari Br. a mi chu  ni19/10/10 zan khan Bike in a chesual palh a, Aizawl Civil Hospitalah phurh phei niin nikhaw hrelovin a awm a ni. Rorel tlangpuite chu -
1. Kum 2010-2011 CYMA Budget atan ` 72,20,864 pawm a ni.
2. YMA KHAWIH 
(1) YMA kalphung inzirtir uar ni rawh se
(2) Kan ram thing chereu zel tur ven nan Kuang atan thingphel hmang tlem turin leh remchang dang hmang zawk turin CYMA in hma la rawh se.
(3) Mizo hming hawha hnamdang sumdawngte titawp turin CYMA in hma la rawh se.
(4) Reserve Bank of India phalna nei lo, a pung tam tak pek tiama mipuite sum la lut thinte khuahkhirhna dan hi khauh taka kenkawh a nih theih nan CYMA in hma la rawh se.
SORKAR KHAWIH
(1) Mizoram Drugs Control Act hi kan ram mil turin siam ni ve rawh se
(2) National Highway 54 hi sorkar-in National Highway a nih angina enkawl rawh se
(3) Mizorama kawngpui hrang hrang te hi tun aia tha zawka siam turin sorkar ngen ni rawh se.
(4) Halpuah leh halmawi hi engtik hunah pawh khap chhunzawm zel turin sorkar ngen ni rawh se.
3. Kum 2011 YMA General Conference thlen diltu Sihphir Joint YMA leh Sub Headquarters YMA, Kolasib te chu Secret Ballot a Vote lak a ni a. Kum 2011 YMA General Conference chu Sub-Headquarters YMA, Kolasib ten Kolasib-a an thlen tura thlan a ni.
4. Kum 2010-2011 Kumpuan atan ‘Khawtlang Nun Siamthat’ pawm a ni.

MPF COMMON PLATFORM 
MIPUIIN HLUT

Mizoram People Forum (MPF), Chanmari West buatsaih AMC inthlan lo awm tur a Ward VI-na Candidate te tana Common Platform chu mipuiin an hlut hle. He hunah hian Bialtu MLA Pu Lalthanzara pawh a rawn tel ve a ni.

He hunah hian MPF Chairman Pu PC Lalnunthara (Pres. Upa) chuan kaihruaiin Pathian hnena hlanna hun a hmang a, Pu R. Lalhmachhuana Secy chuan MPF hmalaknate leh kalphung a sawi bawk. Pu C. Lalzarliana Jt Secy chuan lawmthu sawina hun a hmang a, Chairman in ‘Kristian kan nih angin candidate te leh an party te’n thudik chauh aupuiin tan i la, thu puarpawleng mai mai aupuiin inepna’n hmang lovang u’ tiin he inkhawm hi a khar a ni.

Kan Candidate te’n inbuatsaihna thatak hnuaiah thu tha tak tak an sawi a Pi Biakhluni chuan thu sawi hmasa in ‘Ram leh khawtlang hmasawnna atan hian tawng chidang thiamlo pawhin Pathian hruaiin engkim kan ti thei a ni, mipuite kan tanrual a ngai’ a ti. Pi Zamanthangi chuan ‘Politics ruihchilh lovin rilru thiang tak hmangin mipuite’n vote i thlak ang u’ a ti bawk. Floor atangin zawhna pathum ve ve chhan phalsak a nih laiin zawhna 4/5 vel ve ve zawh anni in felfai takin an chhang thei bawk a ni.  He inkhawm hi veng mipuite’n an hlutin kalkhawm pawh an thahnem hle a, mipuite thutna leh sound system buaipui tu CH Sec CWBYMA te an fakawm hle.

AIZAWL MUNICIPAL COUNCIL - WARD NO - VI  CANDIDATE TE BIHCHIANNA

CONGRESS & ZNP CANDIDATE PI BIAKHLUNI:

Pi Biakhluni hi 28th October, 1958 ah a piang a, Vanlalbela leh Vanlalthangi fa 8 te zingah a naupang ber dawttu a ni. Tunah hian K-Sec  (K-20) Chanmari West-ah an chhungkuain an cheng mek a ni.

Ram leh khawtlang tana inpe mi a ni Chanmari West VC ah kum 2002 atangin thlantlin a la ni char char, 2002-2006 chhung VCP a ni a tunah hian VC member nilai mek a ni bawk.

Rampum huap chuan kum 1991 atanga 2002 chhung Headquarters Mahila Executive Committee a ni a, 2003 - 2010 thleng hian Joint Secretary a ni, kum 2008 atangin Aizawl North III Block Congress Committee Presidentah thlan tlin niin tunthlengin he dinhmun hi a la chelh chho mek a, kuminah MPCC Executive Committeeah thlan a ni leh bawk a ni.

MHIP ah Headquarters Executive Committee member a ni a, Panchayati Committee-ah treasurer niin Social Welfare Deptt hnuaia Advisory Board-ah Member nilai a ni bawk.

Kohhran lamah chuan Salvation Army niin, Home League Council member leh League of  Mercy Council member a ni bawk.

MNF & MPC CANDIDATE PI ZAMANTHANGI:

Pi Zamanthangi hi 3rd Sept, 1961 ah Phuaibuang khuaah a piang a, Sanghleia (L) leh Thangthluaii te fa 6 te zinga a naupang ber dawttu ni. Tunah hian K-Sec Chanmari West-ah an chhungkuaiin an cheng mek a ni.

Kum 1981 khan Phuaibuang High School atangin HSLC a zova, Kum 1984 ah Pu F. Lalrova nen an innei a, pasal nei chunga college kal tha lehin 1986 ah PU (Arts) thatakin a zo a ni. Zirna lama rualawt tak a nih avangin  harsa tak chung pawha fate lehkha zirtirin a fate hian High School an zo vek tawh a ni.

Ram leh hnam vei tak leh khawtlang thatna tura rilru sengin MPC partyah a awm a. MPC Women Wing Gen. Headquarter-ah Gen. Secretary kum 4 lai a chelh a, tin, MPC Gen Hq ah Executive Member a ni tawh bawk.

Politics a chawlhsan hnuah khawtlang tana inhmang lehin kum 2009 & 2010 ah Chanmari West Br MHIP President ah thlantlin a ni. MHIP President a nih chhungin vengchhungah hmasawnna thil thar duhawm tak tak a awm a ni.

Kohhran lamah Presbyterian Kohhran niin, Inkhawm tantu, Kohhran Hmeichhe Bial puitu leh hmeichhe inkhawm a pulpit sermon nei thin a ni. 

MPF IN COMMON PLATFORM BUATSAIH DAWN 

Chanmari West October 17: Mizoram People Forum(MPF), Chanmari West bultumin 18.10.10 (Thawhtan) zan hian Ni 3/11/10 a AMC inthlan lo awm tur a Ward VI-na Candidate te, veng mipuite’n an hriatchian lehzualna’n Chanmari West Br. YMA Parkah zan dar 7:00 a tan turin Common Platform buatsaih a ni dawn. Candidate te’n thusawina hun an hmang ang. 
MPF hian inthlan lo awm tur atan NGO, Kohhran hruaitu leh Party tinte nen inrawnkhawmin thuchhuah, candidate te leh mipuite hriat leh zawm tur atan ngenna an siam, avaia tarlang lovin a pawimawh zual kan rawn tarlang e, hetiangin:-
 i) Inthlan hautak leh senso sang lutuk awmlo turin theihtawp chhuah theuh ni se.
 ii) House to house campaign hi thil diklo tam tak inphumruk theihna leh senso siam theitu a nih avangin tih loh ni se.
 iii) Sum leh therhlo hmanga vote lei leh hralh hi tih loh nise.
iv) Mipui, pawl hrang hrang leh kohhrante pawhin political party leh candidate te hnenah thil phut neih tur a ni lo.
v) Thawm bengchheng siam loh leh mahni mihring puite zah/pawisak.
vi) A tak ram thleng thei tur leh tihhlawhtlin tur, policy leh programme duan ni se.
vii) Mimal chungchang thudik ziktluak lo hmanga in beih loh ni se; Party policy leh programme hi campaignna leh inzawrhna atan hman ni se.
viii) Party Candidate te chu Mi hmingtha, mize nghet leh rilru puitling ni se; mi taima leh rinawm; diklo leh kut tling lova sum leh thil dang hmuh tum lo mi etc.
ix) Party tin/Candidate te’n inthlan ni ah vantlang tana thingpui lum hi tih loh ni se.
x) Polling Booth area bul hnaia Electoral roll en leh number pek chhuah hi Political Party-ten a mala buaipui lovin, MPF kaihhruainain, fimkhur taka buaipui ni se.
Heng thawhhona thuthlung hi bawhchhia an lo awm a, finfiah ngei a nih chuan MPF in a zau thei ang leh a remchan dan angin vengchhung PA system/ nitin chanchinbu/ Local TV-etc, ah te puanzar an ni ang.

YMA  GENERAL  CONFERENCE  2010

65th YMA Gen. Conference, 2010 chu  Ni 19-21 Oct. hian Leitlangpui Run, Sub-hqrs., Lunglei-ah neih a ni dawn. CWBYMA member Conference kal duh hming la pe lo kal tum si awm a nih chuan Br. Secretary hnenah zawhfiah ni bawk se. Kal tur mahni motor ken tumte pawhin a theih hram chuan hruaitute hriattir a finthlak khawp ang.
Conferenceah hian rorel bakah, programme a a landan chuan malzai-91, thusawi-20, hnamlam-5 zaipawl-28, fiamthu-5, fashion show-1, Hawaiin guitar solo-1 leh a dangte pawh ngaihthlak leh en tur a awm dawn a ni
Chanmari West Branch hi Counter No 10, YMA information Centre, Rahsi Vengah in report tur a ni. Palai kaltute’n an lo hriat atan Lunglei Traffic rules hetiangin tih danglam hret a ni: 
1.L.P. Thangzika Point (Tlabung peng) leh M.S. Point (Bazar veng) inkar a Parking area zawng zawng hi YMA conference chhimtu te tan reserve a ni. Hemi chhunga Private motor park thin ten hmun dang hmun dang Private parking ah motor te an park tur a ni. Pick-up stand  a ding zawng ten Chanmari Biak In thlang kawngpui phei remchang lai Parking nan an hmang ang a. Tata 407 Stand hmangtuten Parallel Road a, kawngpui zau lai remchang apiangte Parking nan an hmang bawk ang.
2. Tlabung peng atanga Thuamluaia Mual panna kawngah YMA Conference function awmlaiin motor lian tlan luh phal a ni lo.
3. Thuamluai Mual chhak kawng, Bazar High School panna lam kawng hi Two Wheeler tan One-Way a ni ang a, chho zawng/haw lam chauh tan kal phal a ni.

  

AIZAWL MUNICIPAL COUNCIL KAN 

IN THLANG DAWN E

Chanmari West October 10:   Aizawl Municipal Council inthlan chu Nov 3 hian neih a ni dawn ta.


AMC Inthlan atan hian Municipal Returning Officer pathum (3) ruat an ni a, berawn duhte tan an Telephone No. ah te hian biak theih an ni : 


1.    Pu J. Hmingthanmawia, MCS             2329205 (O)
    Addl. Deputy Commissioner &             2323164 (R)
    Municipal Returning Officer
    (Ward No. I - VII)
2.    Pi Sangchhin Chinzah, MCS             2322115 (O)
    Addl. Deputy Commissioner &             2335223 (R)
    Municipal Returning Officer
    (Ward No.  VIII - XIII)
3.    Pi Lalzarmawii, MCS                 2301779 (O)
    Jt. Director, DM&R and                 2318621 (R)        
    Municipal Returning Officer
    (Ward No. XIV - XIX)
 
MRO hnuaiah hian Assistant Municipal Returning Officer pahnih (2) theuh an awm bawk ang. Heng bakah hian Election Observer tur mi 10 ruat an ni a, Model Code of Conduct Monitoring Cell pathum (3) din a ni bawk.
Aizawl Municipal Council inthlan hmasaber atana hriattirna chu Mizoram Gazette-ah tihchhuah a ni a, chuh tumte tan hming thehluh hun leh inthlan chungchanga hriattur pawimawh te chu a hnuaia mi ang hi a ni :-


1.  Hming thehluh theih hun                            : 11th October, 2010 thleng
2.  Nomination Paper endik hun                    : 12th October, 2010    
3.  Inhnuhdawh theihna hun                          : 14th October, 2010 thleng    
4.  Inthlanni                                               : 3rd November, 2010
                 (7:30 AM - 4:00 PM)
5.  Vote thlak that a tul chuan vote thlak ni     : 4th November, 2010
                                         (7:30 AM - 4:00 PM)
6.  Vote thlak that a tul loh chuanin vote         : 4th November, 2010      
      chhiar hun                                                                (9:00 AM onwards)
7.  Vote thlak that a tul chuan vote thlak ni    : 8th November, 2010
            (9:00 AM onwards)    
8.   AMC inthlan leh a kaihnawih hna reng reng chu ni 16th November, 2010 ral hmaa zawh fel vek tur a ni
    
AMC Inthlan tur hian Veng hrang hrang 76 huamin AMC huam chhungah hian Polling Station 174 a awm a. Inthlan atan hian Election Commission of India chuan EVM 240 hman a rawn phalsak tawh a ni. EVM te enfiah hmasak ber chu 7th-8th Oct, 2010 hian DC Office Conference Hall-ah neih a ni bawk a ni.
Chanmari West hi Ward No.VI kan ni a, hmeichhe thlan tlinna tur bial kan niin Hunthar leh Edenthar te nen a awmho tur kan ni. Hriat theih chinah zirtawpni thlenga Chanmari west ward a nomination file te chu hetiangin:
Congress/ZNP          : Pi Biakhluni, Chanmari West
MNF/MPC : Pi Zamanthangi, Chanmari West  

CHANMARI WEST BRANCH YMA IN 

LAWMMAN 2na DAWNG

Chanmari West October 3:   Ni 1/10/10 (Zirtawp) khan Association for Voluntary Blood Donors  (AVBD) leh MSACS tangkawp chuan Vanapa Hallah VOLUNTARY BLOOD DONATION DAY an hmang.
He hun hi Dr Eric Zomawia, Project Director, MSACS chuan kaihruai in Pu Lalchungnunga President CYMA chu Chief Guest a ni . Pu C. Lalnunnema GS, AVBD chuan report pe in “Kumin January atanga August in karah Damdawiin hrang hrang thisen pek za a 75.24 chu a mamawhtu apiangte tana a thlawna pek a ni a. Hei hi a vaiin Thisen Units 10610 a ni a, A thlawn a thisen petute hi kumtin an pung deuh deuh” a ti. A sawi zel naah chuan “January- August chhung hian thisen pek zawng zawng hi Units 14101 a ni a, Units 10610  chu VoluntaryDonation a ni. Sept 2009 atanga  August 2010   chhunga pawl hming a thisen pek hi Blood Bank 10-ah units 12944 a ni. Mizoramah thil tha lam kawng a hmasawnna ah voluntary blood donation a hmasawnna hi a thang chak ber pawl a ni a, 1993-ah 01.79%, 2000-ah 13.63%, 2002-ah 36.41%, 2008-ah 64.90%, 2010 ( Jan- Aug) - ah 75.24% a ni” a ti bawk.
Hemi ni hi a thlawna thisen pek pawimawhna in zirtirna hun atan hman a niin pawl hminga thisen pe tha zual te chawimawina hun hman a ni. Lawmman hi Category 4-ah thenin pakhatna dawngtute hetiangin:  Unit 352 pe tu NSS Govt Hrangbana College; Unit 286 petu Ramthar Branch YMA; Unit 150 petu KTP Chaltlang Branch; Unit 124 petu 3rd Bn MAP. 
Chanmari West   Branch  YMA chuan unit 206 pe in NGO hminga Mizoram puma vawikhata thisen pe tam ber lawmman 2na (Dekchi lian) kan dawng, hei hi Chanmari West thalaite inpekna vang liau liau a niin khawtlang hruaitute pawh an lawm hle a ni. AVBD Secretary  chuan pawl hminga thisen pe tha zual chawimawina an pek chhan chu hun lo kal zel turah thil tha intihhmuh a inelna atana ti an nih thu sawi.

TAITESENA SECTION BUNGRAW IN HAWN A NI

Chanmari west Br YMA Buk a Taitesena Section bungraw in chu Ni2/10/10 (Inrinni) zingkar khan hawnna hun hman a ni. He hawnna inkhawm hi Pu Lalngaihawma Asst Leader T-Sec YMA chuan kaihhruaiin, Pu T Ngurkhuma President CWBYMA chuan a hawng. Pu C. Lalmuankima,  Leader T Sec YMA/Work Supervisor chuan report a pe a, he hna thawh theihna atana sum petu UD&PA chungah leh Branch hruaitute leh memberte chungah lawmthu a sawi bawk. Tin, Br. YMA Adviser Pu HVL Zarzoenga’n thusawina hun a hmang bawk a ni.   Hun hmangtute hian bungraw in changtlung tak mai T-section te’n an puitlin thei hi a lawmawm zia an sawi.

T. Ngurkhuma Pres. CWBYMA in T-Sec bungraw in a hawng