BRANCH YMA EXECUTIVE MEETING THUKHAWM
Chanmari West, October 09 : Ni 7.10.2011 (Zirtawp) zan khan Chanmari West Branch YMA Executive meeting chu President kaihhruaina in Pu K.Darthantluanga In K-Section ah an thukhawm.Meeting ah hian Branch YMA Sport neih zawh tak Review na hun hlimawm tak neih a ni a, committee chuan hlawhtling a tiin mawhphurhna hlenchhuak zawng zawngte chungah lawmthu a sawi a ni. participation Prize lawmman atana ` 15,000/- lai mai thawhtu Pu F.Zosanga te chhungkaw chungah lawmthu a sawi takzet a ni. Sport neih zawh takah khan member 43 lai mai kan pun belh thu ngaihthlak a ni bawk.
YMA Gen.Conference chungchang :- YMA General Conference 2011 Kolasib-a Ni 25-27.10.2011 a neih turah kan Branch atanga kal tumte chu Ni 16.10.2011(Pathianni) ral hmain Branch Secretary Pu R.L.Thanhnuna hnenah ` 100/- pein in report tur a ni. Motor hman tum a nih avangin kal turte chuan hei hi ngaih pawimawh theuh tur a ni.
YMA General Conference lo awm turah hian Conference ah hian Mizo incheina/inthuamna ngai pawimawh theuh turin Sub-Hqrs. Kolasib chuan palaite a ngen a, kan Branch hi Counter No.3, Diakkawn Branch ah kan thleng dawn a ni.
Zawlbuk chungchang :- Working Committee atangin report ngaihthlak a ni a, Ni 17.5.2011 atanga sum hmanral tawh zawng zawng chu Rs 6,14,993 /- niin tha (hlawhfa bik) 552 sen a ni tawh bawk a ni. Hmalak zel dan tur leh a tul angte lo buaipui chhunzawm zel turin Working committee meeting chuan a ngen a ni.
Zawlbuk fund khawn mek luh tawh dan hetiang hi a ni :-
CH Section :- ` 42,350/-
K-Section :- ` 38,500/-
N-Section :- ` 15,050/-
T-Section :- ` 50,850/-
V-Section :- ` 44,750/-
Total :- ` 1,91,500/-
Meeting ah hian member 17 kalin Zan dar 10:30 ah tin a ni.
CEC MEETING HNUHNUNG BER NEIH A NI
Ni 1.10.2011 khan 2010-2011 chhunga CEC Meeting hnuhnung ber chu Pu Lal Chungnunga President kaihruaina in Central YMA Committee Room-ah neih a ni a, meeting ah hian Pu Lalbiakzuala, General Secretary in report a pe a ni.General Secretary report-ah hian Tuikuk laklet te Mizoram khua leh tui dik takte an nih leh nih loh a hmuna enfiah tura Pu J. Lalsailova, Fin. Secretary, Pu Roneihthanga CEC leh Pu C. Vanlalsanga CEC te an kal thu ngaihthlak a ni. Sairang leh Zuangtui a mi bo zawngtute ei leh in atana ` 12,000/- pek a nih thu ngaihthlak a ni bawk.
YMA General Conference chungchang : YMA General Conference 2011 Kolasib-a Ni 25-27.10.2011 a neih tur Programme duan chhin (Draft) thlir ho niin Programme Committee te uluk zawkin lo siamtha leh tura tih a ni. Kum 2011-2013 hruaitu thlanna a R.O turin Pu Vanlalrema Rokhum CEC, ARO - Pu C. Zoliana CEC, Secretary - Pu H. Vanlalrawna CEC leh Asst. Secretary - Pu B. Rothangliana CEC te ruat an ni. P.O tur hian CEC Nomination-a awm lo te leh CEC hlui remchang sawm nise, Sub-Hqrs. YMA President leh Secretary te ruat an ni bawk. YMA General Conference 2011 tiak zan Ni 27.10.2011 hian Mi harsate pualin thawhlawm khawn nise tih a ni.
He Meeting hian Sihphir Vengthar Branch YMA-in Sihphir Venghlun Branch YMA tia thlak an dilna chu pawmpui an ni.
