EDITORIAL

Dt. 21.July.2012
    Kumpuan ram leh hnam humhalh kawngah Central YMA chuan hma a la zel a, Branch YMA pawhin a theihna kawng kawngah a bawhzui bawk a, hetianga a kal zel theih chuan kan ram leh hnamin  hmasawnna ropui tak a la chhar chhuak ngei ang.
    Ram leh hnam hum-halh kawngah hian tute emaw tihturah dah mai hi a awl a, mizo hnam zawng zawng mawhphurhna a ni tih kan hriat tlan a tha hle. Kan hnam tana tha tura pawl hrang hrang hmalakna pawh hi khai rual taka a kal theih a duhawm hle a ni. Kan mimal emaw chhungkaw nun emaw hausak leh nawmsak theihna tur a nih avanga hnam pawi sawi hi thil pawi rapthlak tak a nih theih avangin dik lo taka hlawkna lak tum hi a pawi hle a ni. Kan hming hawh tir khawpa hnam hralh pawh kan tih loh tawp tur a  ni.
    Zova Tochhawng ‘Thawibawih’ thuziak kan dawnga, hei hi Hruaia VL chanchin a ni hran lova, Thla a lawn hriatrengna pualin Apollo 11 chanchin Pu Tha-a ziak hi a ngaihnawm,  infiamna huangah sum a lo tam khawp mai, hming-thatna mai piah lamah hausakna a lo ni chiang khawp mai, kan veng sport mite tan chona a ni.
__________________________________________________________________________________
Dt. 15.July.2012
        Kum chanve tha lam kan lo hmang ral ta a, kan vengin chhiat kan tawk thei mawlh mawlh hle mai a, lusun chhungte an khawngaih thlak a, YMA memberte pawh an hah hle a ni. Veng lian leh mi cheng tam nih hi chuan hei hi kan chan tur a nih pawh ring ila, Pu Valte’n kan dam ang a, kan la thi zauh zauh a tih kha.
    Kan vengin harsatna kan tawh chang hian thil lawmawm deuh lo lang thin a awm a, chu chu kan tan rualna hi a ni. Kan hruaitute hi mi chak leh fing pui pui an ni hran lova, amah-erawhchu, an phak leh theih chin chinah hi chuan an inpe ve em em a, chu chu memberte pawh hian hriain chak leh tha takin kan zui thin a, a ropui hle a ni.
    Kan kalphung leh danah hian duhthusam chiah lo pawh tam tak a awm ang, tupawh hian siamthat angaih chuan siamtha turin ke pen ngam ila, kan hruaitute pawnin mahni inhmuh thiam a har avangin an hre vek kher lovang, memberte pawhin sawisel mai lovin, hrilh hre thin ila a tha khawp ang. Hmasawn zel tur kan nih avang hian kal phung thar tha zawk chu kan hruaitute pawh hian zawm ngam zel a ngai a ni.
__________________________________________________________________________________
Dt. 8.July.2012
     Kan Branch YMA chuan central road kan siamtha mek a, he kawng hi kawng pawimawh tak ni thei tur a ni a, chuvang chuan a grade tha thei ang bera kan siam ngei a ngai a ni.
    Contractor dang anga kan thawh ve a rem lova, hlawkna kan um viau pawh a dik kher lovang, a hna a that loh chuan miten YMA sawichhiatna remchang an hmu palh ang tih a hlauhawm a ni. Kan branch hi kan rilru a pachhe ang reng a, chuvang chuan hna tha vak lo hian kan thawk palh ang tih a hlauhawm a, hlawk phah vak lem lo mah ila, mi ringtute beisei ang ngei a hna tha taka kan thawh ngei hi angai a ni.
    YMA-te hi mite min ngaihdan pawh hi a dik famkim lo deuh ni chuan a lang. Tuallaia zu rui buai thelhtu tur atan te, kawng hnawk vel thiantu tur a tan te, mi chhungkaw buaina thelh tu tur atan te, mitthi ina tlaivar tur leh thlan lai tur atan te kan beisei a, a dik khawp ang. Amaherawh-chu YMA-te kan beisei leh ngaihdan hi kan siamthat angai a ni. An tihtur leh tihawm pawh mipui hian kan lo thliar thiam a tha a, inrawlh tura kan beisei chin pawh kan thliar thiam a ngai khawpin a lang, an kuang lo kan nawr tir palh ang e.
__________________________________________________________________________________
Dt. 1.July.2012
            Tunlaiin kan ramah ruahtui a tla thain a tla tam tawh hle a, khel lova lo thleng thin chu leimin hi a ni. Fur a lo nih hi chuan lei a hmin tawh a, ruah bawhawk a han sur hi chuan lei a min duh hle a ni.
    Kan veng hi kan awmna a awih hlawm avang hian leimin emaw lung lum emaw chungchangah hian kan fimkhur a ngai hle a ni. Khuarel chhiatna a nih rual hian keimahni siam chawpah heng chhiatna hi thleng thei a nih avangin he veng chhunga chengte hi hemi kawngah hian kan harh thar a, kan fimkhur a pawimawh hle a ni.
    Heng chhiatna hi a lo thlen thawh hnu hi chuan siamtha leh tur hi chuan sum leh tha tam tak sen a ngaih tawh thin avangin a hunlai hian kan harh a ngai a ni. Kan veng chhiat that thleng thei hi tute emaw rawn tih tur ni lovin, a chhunga cheng keimahni ngei hian tih a ngai a ni.
    Tun tumah pawh hian kan vengah chuan local council-in disaster management committee a din ta reng a, veng dang pawhin an tih hma hauh a tih nachang an hria hi thil lawmawm tak a ni. Kan cho tihna ni lovin chhiatna lo thleng pawh nise kan ziaawm khawp ang.
__________________________________________________________________________________
Dt. 14.June.2012
        Kum chanve kan lo chuangkai ta a, kan hmalak tawh dan te han thlir kir ila, tih fuh loh tam tak kan nei mai thei a, tih that pawh tam tak kan nei ngei ang.
     Kan lo tih fuh loh a awm chuan kan insiam that ngam angai a, ‘tih sual hi mihring zia’ a ni an lo tih tawh avangin, insiamthat hi kan hreh tur a ni lo. Kal sual palh emaw rel sual palh emaw a awm lo thei lova, chuvang chuan hmasawn tur kan nih avangin insiam that hreh lova, a dik leh hmasawn zawnga kal kan tum tur a ni ang.
    Kan kal tawh dan han thlir let ila, kan lo tihthat tam tak a awm bawk ang, kan chhunzawm ang a, mi dangte pawhin kan tanpui ang a, kan chhunzawmpui bawk ang.
    Fur kan thleng ta tak taka, leimin leh chhiatna dang tam tak kan hma-chhawn thei a, heng hun lo thleng palh thei lakah hian kan fimkhur a, kan thawhho thiam a, hotute thu kan ngaih thiam a ngai hle. Mahni thua kal mai lovin an zai kan ngaih a, hotute pawhin ruahmanna fel tak kan neih zung zung theih a ngai a ni. Chhiatna dang thleng thei lakah pawh hian kan inven fimkhur a ngai a, kan thununna hnuaia awm a nih loh avnga hian kan theih ang tawk a kan lo fimkhur hi kan lo tih ve ngei tur a ni ang.
__________________________________________________________________________________
Dt. 17.June.2012
     YMA day kan lo thleng a, kan branch huam-chhunga section hrang hrang chuan hun hlimawm leh nuam, thil tha tiin kan hmang a, a lawmawm hle mai. Day kan lawm hian mi tam zawk huapzo leh naupang leh upa deuh tana hun kan duan thiam angai hle mai. He hunah hian member kan kal tha thawkhat tlangpui a, a lawmawm hle a, branch programme a nih chang kal tum lem lo pawh ka kal tha viau mai, member kan innawn a ngai a ni. Chutih laiin branch hruaitute pawh hian kan hun duan dan hi tunlai mil deuh a kan her rem thiam a ngai tih a lang bawk.
    YMA day-ah hian khua a chhe tlang pui a, hei vang hian hemi mil a, hun duan thiam a ngai a, ruah hnuaia hun kan hmang dawn a nih chuan ruah do tura inpeih a nih loh vek chuan, ruah hliap tha kan ngai a, section tinin hun kan hman theihna tur hmun tha kan mamawh tawh hle bawk a ni.
    He ni lo thleng hi uar taka hman mai piah lamah naupang tana zirtirna huna kan hman thiam a tha hle. YMA chhangte hi nakin lawka kan hruaitu turte an ni a, uluk taka kan lo chher lawk hi a ngai a ni.
    Tun tum chu section report kan dawng tha a, kan day hmang hlimthla tihlan hram kan duh si a, kan kal phung kan thlak hret a ni.
__________________________________________________________________________________
Dt. 10.June.2012
     YMA huanga infiamna boruak lian ber kan zo ta, a tawp kan thlen dan duhthusam chiah lo mah se, a tha thawkhat e. A tha ber dinhmun hi pakhat tan zuahin a awm a, chu dinhmun chu chang phak chiah lo mah ila, kan lawm tho a, lawm thiam pawh angai hle.
    Final zan kha chuan kan veng mi ngaihtuahna hmang deuh chu kan mutui viau lo a nih pawhin, a awm viau, kan tang tlang em a, champion ngei kan beiseina thlawn ta kha a uihawm em a ni. CYMA Tournament vawi tam lo khel tawh tan leh khelh beiseiawm tawh lo tan chuan a pawi zual a, final thlen harzia ngaihtuah phei chuan a pawi a ni.
    Amaherawhchu kan dinhmun a chhe ta vek biak lem lova, kan naute tan phurna leh thiam pawl nihna dinhmun kan hnuchhiah a, an hmalam hun a eng a, dinhmun tha zawk pawh kan chuang kai ngei ang a, lammualah ngei sawn kan la chai ang.
    YMA day kan lo thleng leh dawn ta, he hun hi hlim takin hmang ila, mi dangte tan malsawmna nih nan hmang ila, khawilaiah emaw lo thiat mah se, hetah chuan kan dinthar leh ang a, hnam thendarhtu ni lovin, phuarkhawmtuah kan tang ang a, mizo hnam lo par chhuahna tur a nih theih nan mizo thalaite hian theih tawp i chhuah thar ang u.
__________________________________________________________________________________
Dt. 3.June.2012
     Vodafone Cup, 17th Inter Branch YMA Football Tournament-2012 chu kan khel mek a, tunah chuan kan nghahhlelh em em final kan lut ta a, a ropui khawp mai; mahse, a vawrtawp kan la thleng lo deuh a, han tang tlang leh deuh ila, kan champion thei ngei ang.
    Heti ang hunah hian mi inpe kan mamawh thin hle a ni. Kan veng hian kan hming thatna tur a ni tih hriain tan kan lak thar a ngai hle a ni. Kan player-te tan pawh hian inphal zau ila, an mamawh ang ang pawh tum hreh lo zel ila, a lawmawm khawp ang. Chutihlaiin kan player-te pawh hian an theihna leh thiamnate nasa lehzuala hmang thei tura an inpek thar a ngai hle bawk.
    Inkhel en pawh kan thiam sawt viau a, amaherawhchu hmasawn chu kan la ngai deuh thin a ni. Kan player-te hi kan puih a, kan auh phur thiam a ngai a, midangte tan pawha tan awm taka kan awm thiam a ngai a ni. Buaina siam zawnga khawsak  hi a mawi lova, kan sim hmak a ngai a ni.
    A tawp berah chuan he inkhelh hi kan theihna leh chakna a ni lova, Pathian min pek a ni tih kan hriat a, Amah kan chawimawi ngei a ngai a, eng dinhmunah pawh ding ila, lawm ila, kan champion a nih hlauh pawhin chapo nan hmang lo hram turin kan rilru kan siam a va tha em.
__________________________________________________________________________________

Dt. 27.May.2012
        Tunlai hian Veng chhung ah rukruk a hluar leh tan ta hle, kan fimkhur lehzual angai hle. Zan rei leh mi mut reh lai hi an chet duh hun a nih avangin, manchhuah an har phah hle.
    A bik takin Aizawl khawpuiah thil bo a tam hle mai a, hei hi ruihhlo nen hian thui tak chu a inzawm a. Ruihhlo a zalen a, ruihhlo ti thinte hian an mamawh ang pawisa an nei reng thei lo va, an hmuh remchan apiang an ru duh a, thenkhat chuan zan lamah hmanraw tha deuhte kengin dawr leh in rawk tur an zawng hial thin.
    Khawpui lian leh chang-kangah pawh rukruk hi a hluar reng a. Ram changkangah chuan CCTV-te dah a ni tawh a, heng hmangte hian misual zawn chhuah a awlsam phah em em a, keini pawh hian thilsualtih tum vengtu tur camera (CCTV) nena an inchhawp a hun tawh hle a ni. Rukru laka invenna lam hi kan ngaihtuah a ngai tawh hle. Veng thenkhat chuan sum inthawh tawmin zan lama duty tur bik an ruai a, bazara dawr thenkhatte pawhin zan lamah a vengtu an ruai bawk a, hengte hi khawpui dangah pawh an ti thin a, a finthlak hle. Thiamna a san zawh poh leh misualte pawh an fimkhurin an fing ve zel a, hei vang hian khawpui dangte ang bawkin nakinah chuan chhungkaw tin deuhthawin zan lama vengtu neih a la tul hial mai thei a, tihbo hnua inchhir ai chuan, a hunlaia inven thiam hi a finthlak zawk awm e.
__________________________________________________________________________________
Dt. 20.May.2012
    YMA te hial thiattu an lo chhuak ta hi a pawi hle. Pawl sawisel thiang lo leh thiah theih lo chu a ni hauh lova, a kal dik loh chuan sawisel tur leh siamthat tur a ni a; mahse, chutiang lam hawi ni lova, sawichhiat leh thiah duh a, hmalak a ni a, he thilah hi chuan hetiang ang a, ngaihtuahna leh hmala duh pawl hi chu an dik bik chiah lo ni chuan alang.
    YMA hi a lian tawh hle a, mizo thalai huapzo pawl a nih avangin lian tur pawh a ni reng a, he pawl a leng lo chu  mizo ni lo an ni. He pawl hian a theih ang angin thil tha a ti thin a, a ti zel bawk ang. Mizo a awm chhung chu he pawl hi a pawimawh reng dawn a,  thiah mai mai thiang a ni lo.
    YMA hi Kristian Kohhran nau a ni a, a dintute pawh kristian chhulchhuak an ni a, a kal phung pawh kristian dan hnuaiah a ni. A thupui pawh ‘Kristian nundan tha ngaihsan’ a ni a, chuvang chuan thiltha ti tura ding leh kristian nun dan tha a nung tur a ni a, chu kal phung chu a pelh vaih chuan sawisel a, siamthat angai tihna a ni ang. Chuvang pawh ni lo va, kan duh dan anih loh vang ngawt a, sawisel leh thiah hial tum hi thil tih sa loh loh a ni. He pawl hi chuan hnam a thendarh duh lova, ram leh a mi chengte hmasawnna tura hmala tur zawk pawl a ni.
__________________________________________________________________________________

Dt. 13.May.2012
          Kan veng chhungin naupang khawngaihthlak, veng dang pawhin an buaipui luai luai kan nei a, veng neitu ten nasa tak leh duat taka kan enkawl angai a ni. Tunlai thalai lam chuan facebook atangin an inhrilh darh a, tualchhung chanchinbu lian pawn an chhuah chuai chuai bawk a, tanpui chu an ngai a ni.
    Mi thahnemngaiten tanpuina an ruahmana, hei mai hi duh tawk lovin, nasa zawka chetchhuah hi veng chhung chuan klan tum angai a ni. Chumai ni lovin an dinhmun chhiat vanga dikna leh an zahawmna humhim theih loh hi a pawi a, mi thiltithei leh milian annih vang ngawta hrem leh dan chunga leng niawm taka awm anga an lang hi a pawi a ni.
    Zirlai ten an thawhrah an seng mek a, hlawhtling ten an  kawng zawh leh tur an thlan thiam a, an tuina leh eizawnna tling an zawh thiam angai a, an dinhmun atanga an hmasawn leh dan tur pawh an inhriat a tha khawp ang. Chutih rual erawh chuan la hlawhtling ve rih lo te hian beidawng mai lova, hmalam pan a, bei la bei nawn rawh tih leh ka tum nge ruh saruh ti a, an insan phek angai a ni. Vawikhat hlawhchhamah mai zam lo leh tluchhe lovin, a aia thaa an tih theih a pawimawh hle a ni.
__________________________________________________________________________________
Dt. 6.May.2012
       Nimin khan YMA chhang memberte pualin primary school tualah LPS Naupang pual nen intih hlimna hun siam sak an ni a, he hun hi an tan hlawkna tha tak anih ngei beisei ila. Heng naupangte te hi nakin lawka kan branch hruaitu turte an la ni dawn a, chuvang chuan tun atang hian kan lo buatsaih lawk a, kan lo zirtir a, kan veng, kan ram hruaitu tura kan lo chher lawk hi kan mawhphurhna leh kan tihtur pawimawh tak a ni.            Naupangte pawhin intih hlimna mai duh tawk lova, hruaituten an tihtur tawk an chhawp chu hneh taka tih an zir a ngai a ni. Hun lokal leh turah hian kan veng hruaitu tur anla ni dawn tih an hriat a,  Kohhran thleng pawha hruaitu an la nih dawn avangin an nun an hman fimkhur angai hle a, an zahna tur an lo hmang lawk ang tih an hlau em em tur a ni.             Hruaitute pawh hian kan naute hi an tihtur awm tawk kan chhawp chhuah thiam a, an phurna tura kan enkawl thiam angai a, aia upa zah leh zo nunze mawi kan zirtir a, Kristian nun dan tha kawhhmuh ngei an ngai a, hruaitute hian chu nun chu kan lo zawh hmasak a tul bawk a ni.
    Chuta tana pawimawh em em chu Pu Hnuna thu ziak kan chhiar tur hi a ni, kumpuan hawnna ami kha a darh zau lehzual nan kan chhuah e.
__________________________________________________________________________________
Dt. 29. April.2012
    Central YMA chuan Football leh Basketball tournament a buatsaih turah kan branch pawh tel kan tum a, dinhmun tha tak chang ngei tura kan beih angai hle a ni.         He infiamna kutpui kan hman turah hian kan veng tana thahnemngai taka lo khel tawh te kan hriat a, kan duh sak pawh a tha ve tho awm e. He hun atana pawimawh tak mai chu vengchhung mite puihna leh inpekna kan mamawh hle a ni.
    Veng dangte hma lo lak tawh dan kan thlirin champion phu takin an lo che tawh thin a, hei hi keini pawhin kan zir a, kan tih ve ngei angai a ni. Branch YMA chuan he tournament hi a hautak avangin a huphurh hle a, amaherawhchu, kan thalaite tan anih tih hriain tel ve ngei tha a ti si a, sum a neih tam si loh avangin member zawng zawngte chet theihna turin pawisa cheng sawm theuh thawh turin a beisei a ni.
    Heng pawisa thawh tura ruahman hi a tam tham lovin a harsa vak lovin a rinawm a, hei aia tam pawh hi kan ti thei ang, he inkhelh a, kan chak ber chuan kan thalai inkhelh tui tak tak hote  tan hian thil tak tak a ni dawn a, kan infiam mite leh a tantute tan phurna a pe ang a, veng dang tan cho loh leng kan nih zia kan tir angai a ni 
__________________________________________________________________________________
Dt. 22. April.2012
Mizote’n a Zirna Kawtchhuah kan tih mai Pawl Sawm (matric) result-2012 chu a chhuak leh ta. Hlawhtling zawng zawngte kan lawmpui rualin, la hlawhtling ve hrih lote pawh beidawng mai lo va, beih hram hram a tha khawp mai.
Matric pass tharte tan hian hmalam hun tur siam thiam a tul khawp mai. Nu leh pate paw’n kan fate rilru sukthlek kan hriatchian a ngai. Mi fate’n an zir ang hi kan fate tan a fuh ve kher lo thei. Duhthlan sual palh chuan damchhung atan a pawi thei tih hria a, kan fate kawng tur ngaihtuah uluk a ngai hle. Chutih rual chuan naupangte pawn kan tui zawng leh kan thiam zawng kan hriatchian a ngai. Thiante nena inrawt phura, admission tih ngawt chi a ni lo.
Tin, hlawhtlingte kan lawmpui rual hian mi dangte tana hmuh hrehawm khawpa khawsak loh a mawi khawp mai
Editor pawh Chanmari Pastor Bial Khawmpuina Edenthar kohhran lamah a buai hle. Thlarau lam malsawmna a dawn ngei kan duhsak.
__________________________________________________________________________________
Dt. 15. April.2012

Kum bul kan tan dawn chauh emaw tih laiin Tau thla kan lo chuangkai leh ta reng mai. Heti ang hunah hian veng chhunga pawl hrang hrang hmalak naah hian tlema han chawlh deuh hunlai hi a thleng ve chawk a. Chutih rual chuan mimal leh chhungkuate chuan tihtur hran hran chu kan nei theuh awm e. Hetianga chauh hun a lo thlen hian inrel mai lova, infuih tawn zawk hi kan chak thar lehna tur a ni awm e.

Ruahtui a tla tan leh ta. Chhungkaw tinin kan in leh lo, tui luan kawr kan siam danah fimkhur a ngai, thenawmte tana hnawksak lo zawnga kan khawsak a tha khawp mai. Kan tui chhe paih danah hian kan mizia a lang thui khawp mai. Thenawmte in hmun leh ram timin thei mai zawnga ruahtui paih mai te pawh a hlauhawm. Kan hriat theuh angin kan veng chu kham panga awm kan ni a, vawi khat ruahtui leh tui hawk kalsual mai mai pawh hi hlauhawm a chang thei tlat.

Kan News Editor ropui chanchin hi ngaihnawm deuh a ni, in sawi ve ni kan han siam thar a, a duh tan thu rawn thawh theih a ni, chhuah vek erawh kan ba hran lo.

__________________________________________________________________________________
Dt. 8. April.2012
           Kristian nundan tha ngaisangtu YMA te tan pawh Good Friday leh Easter Sunday pawh hi a hlutna leh ropuina a dang chuang bik awm love. Lal Isua thihna leh thawhlehna hi YMA memberte hian ringin pawm tlang ngat ila chuan, kan veng hi a nuam hle dawn a ni, chumai ni lovin Chanchintha puang darhtu tha tak kan ni vek dawn bawk si a, kan va han thawhhlawk dawn em.
    Tihtur leh tih loh tur kan nei a, hruaituten hmalakna tur an duang a, kan pawm leh peih zawng a ni vek kher lo mai thei, sawiseltu nih loh hram erawh a finthlak, mi dangte tuina kan ti dal thei tlat a ni.
    Kan hma lawkah CYMA sport kan nei dawn a, Sport lam tuimi tan chuan nuam leh thlakhlelh awm tak a ni ngei ang, hruaitute pawn kan veng tana inpe tawh thinte chu an hriatthiam ngei a rinawm a, a sang sawmparuk zinga tel loh hi kan inhmeh lo.
    Kan chhut hun hi good friday zana ni a, kan tan tlai a, kan bang har deuh. Chda thu ziak Chhiat rupna laka invenna hi chhiar mai lova, kan chhinchhiah that tlat a va tha em,a hun hi thleng thut thei a ni, kan hma lawka sport awm tur avangin hetiang thu Ti-a ziak hi kan mamawh tlat.
__________________________________________________________________________________
Dt. 1. April.2012
       Pawl eng pawh mai hian tihtur leh mawh-phurhna kan insiam a, chu chu hruaitute hmangin a ni. Central YMA pawhin hmalakna tur lian tak  a duan chu kumpuan Ram leh Hnam Humhalh a ni. He kumpuan hi a pawimawh tawkin kan mamawh bawk a ni ang, vawi sarihna hial a ni tawh a ni.
    Chanmari West Branch YMA chu he kumpuan chungchanga a bul tumtute zinga mi a ni a, tichuan kumpuan hawnna pawh a ruahman ta ngei a ni. Kumpuan hawn zanah hian member kal an tlem hle a, a bik takin hruaitute kal that loh alang lehzual, pawi tak a ni. Kumpuan hawn mai a ni lova, intuaithar hun hman nghal a ni a, kan awmdan avang khan tuaithar kan mamawh zia alang chiang lehzual a ni. Hetiang hun ruahman anih leh chuan, kal tura tihte chu kal  a, veng pum huap anih avangin, pawl dang pawhin ruahmanna dang lo siam loh a tha khawp mai.
    YMA AW hi veng chhung ta a ni a, a thatna tura thurawn pek theih reng a ni , mi pawi sawi palh theih anih avangin SMS huang kan ti tawp rih, a tul chuan kan la ti leh ang. U Chhuanawma thu ziah kan chhunzawm a, Chda thu ziah hi a pawimawhin a sei si a, chuvangin kan chhuah chhunzawm zel mai ang.
__________________________________________________________________________________
Dt. 25. March.2012
   YMA in kum puan kan nei a, ropui takin kan Branch pawhin kan hawng dawn a ni. Kan kum puan hi Ram leh Hnam humhalh a ni a, engtiangin nge kan humhalh ang a, kan thawh ang tih kan zirho nghal dawn a ni.
    Ram leh hnam humhalh hi a chhunga chengte mawhphurhna a ni a, vaiho emaw sapho emaw hian min rawn thawh sak dawn loh avangin a chhunga cheng mizote hi kan pawimawh em em a, nupui pasal thu-ah emaw, sum leh pai vang emaw in hnam leh ram hi hralh theih a ni a, a bik takin Chanmari West mipui hi kan fimkhur a, kan inven that angai a ni.
    Chutih ruala tul tak pakhat chu Moral reform kan neih angai a, changkanna emaw mi tihdan anih vang ngawt a kan tih ve kher loh tur tam tak a awm ang, chuvang tak chuan intuaithar hun kan hman nghal tur pawh hi, kan hman tangkai a, hruaitute phei chuan he hun hi kan ngaihpawimawh a, kan kal ngei angai a ni.
    U Chhuanawma a’n chet tak tak hi chuan a hlimawm thin a, a lawmawm bawk. Thu chhuah turah mihring hming atam thin rih a, in hrethiam tlang teh ang u.
__________________________________________________________________________________
Dt. 18. March.2012
             Tunlai hian khua a ro ta hle mai a, kan mei a hlauhawm avangin fimkhur tlang ila a tha khawp ang. Motor accident lah chu hriat tur a awm reng mai si a, lirthei khalhtu te fimkhur pawh angai hle a ni. Kum tha lo kan hmang pawh ani mai thei. Heng chhiatna hrang hrang thleng thin hi fimkhur loh vang a awm fo a, inthlahdah vang te pawh a ni thin, a tur ve reng anga ngaih ngawt chu a fuh lovang, fimkhur ang u.
    Zawlbuk sak mekah hian tihdan thar tak awm thei se a duhawm hle. Sum hmuh theihna tur pawh dap thiam a, a ti thei tur pawh zawn thiam a, a ngaihna hria pawh kan mamawh hle niin a lang. Tha takin kan puitlin lovang tih a hlauhawm tlat. A hunlaia a tha thei ang ber zel tum thin bawk ila a fuh khawp ang.
    Local Council-ah sawrkarna chelh lo lam kan thlang tling a, sawrkar nen tha takin thawk dun thiam se, sawrkar hma lo lak thawhna pawh tha takin an kalpui zel turah ngai ila. Chutiang atan a thu tha Dr. Zuala ziak hi chhiar ngei chi, Council member leh mipuite pawhin. Sawrkar atangin advertisement kan hmu a, thu kan nei tam thei lova, min hrethiam teh u.
__________________________________________________________________________________
Dt. 11. March.2012
         Runthlak hnatlang Local council thar chuan an ko a, hna tha tak thawk turin beisei ila. Runthlak hnatlangah hian run dalah thawh ve mai mai a awl  a, chutih laiin hman lo chung chunga thawk pawh an tam ang, pawisa a phat theih a ni a, pha pawh an awm ang, hetiang karah hian engmah tih tum lo leh nachang hre lo an lo awm leh mai thei a, hetiang mite chungah hian a hming ang ngei hian ‘run’ ngei a tha khawp mai.
    Mi mangang leh damlo te tana thisen pek runpui chu kan lo nei ta a, mi 114 ngawtin kan pe thei a, hei mai bakah hian mi eng nge maw zat inpe, pe thei ta lo an awm bawk, a lawmawm khawp mai. Mahse, section in a pe tur an zawn laia mi 300 lai ni si erawh chuan ngaituah a ti thui khawp mai, inpekna tak tak hi kan mamawh niin alang.
    Tunlaiin CYMA huaihawtin disaster training an nei tlut tlut mai a, kan branch atang pawhin tel an awm a, chumai bakah kan President hi he committee secretary a ni a,  kan veng hian hetiang lama training tha lehzual kan neih angai khawp mai, kan awmna hetiang hi a ni si a.
    Tun tum chu inkhel thiamin inkhel thiam a rawn kawm a, a kawm tur awm tak pawh a ni e.
__________________________________________________________________________________
Dt. 4. March.2012
      Thla hnih kan hmang zo chauh va, veng chhungah tum riat lai chhiat kan tawk leh ta reng mai. YMA member te’n inpekna thuk zawk kan mamawh hle. Member tam lam en chuan tlawmngaia rawn pen chhuakte hi kan la thahnem tawk lo hle mai. YMA mem-ber kan nih chhan kan chiang tawk lo em ni? Chutihlaiin, tlawmngaia rawn pen chhuak zingah, mitthi lumenna a rui chung lo chuan kal tum miah lo kan la tam mai.  Inngaihtuah chian deuh chu a ngai a ni. “Zu rim nam chunga lumennaa kal hi a sual lo ve” pawh lo ti ila, nungchang pangngai hloh thaka khawsak erawh hi chuan lusun chhungte a a hnem kherin a rinawm loh. Rui lo hai lova kal tur kan awm ngang lo anih loh chuan rui chunga kal thinte hian inthlahrunna chang hria se a tha khawp ang.
    Rui chunga kan kal hian lusun chhungte hnemna lam aiin nawmsip bawl lam a kawk zawk lo maw? Mitthi chhungte kan zah tawk lo tihna pawh a ni thei. Chu-vangin, lumenna hmuna harh fima kal i tum theuh ang u. harhfima kal a chakawm lo zawk mai ang tih pawh a hlauhawm thei rum rum.
    Pu Zara’n a ziah awm tak a rawn ziak a, Pu Chhunawma kan phut chhuak a, ngeiawm si huat theih si lohin a rawn chet pek hi. 
__________________________________________________________________________________

Dt. 26. February.2012
        Kan sawi tawp theih loh local council inthlan kan zo ta, tunah chuan mi thar, kan khawtlang tana tha tur kan thlang tling a, an rorel dante kan lo thlir ang a, an chak lohnaah sawisel mai lova, puih pawh kan inhuam a tha awm e. Chutihlaiin, kan khawtlang mipui mamawh pawh hnianghnar zawk a sawi chhuak thei tur pawhin beisei ila.
    Thisen pe turin kan inbuatsaiha, member tam takin mi dangte tan pe thei ila a duhawm khawp mai. Tam record lam ngai pawimawh ber lem lovin, mamawhtute mamawh thin dan kha hre reng zawk ila, mi dangte tan malsawmna kan nih theih hun tha hi bawhpelh lo hram ang u.
    Vengchhunga buaina awm fo thin hi chu a buai thlak khawp mai, police nena tangruala thenfai mai zel hi tum ila, kan mi remchangte pawh hmang thiam ila a tha khawp ang.
    Hemi phek hi kan tihdan hmasa angin kan ti ve leh chhin anih hi. Pathara kan phut chhuak a, a rawn ziah hun hi hun kan ti leh pek khawp mai, thlan tlin tharte tan ‘last para’ hi kan hlan e. Thlalak kan han dah nual a, la dah lehzel pawh kan tum, thu ziak mite han tang zel teh u, kan lo lawm che u.
__________________________________________________________________________________
Dt. 19. February.2012
    Thil khawn hun lai a ni a, chhung tinin thil awmzia hriatthiam a ngai hle. Section hruaitute’n thil hrang hrang an khawn a, a khawntu nih chuan inthlahrunna tur khawpin khawn a tam. Mahse, kum tir a ni a, a hun lai anih miau avangin a tih loh theih lo. YMA chauh ni lovin kohhran leh pawl dangah pawh khawn a tam hun lai tak a ni ve leh zel a, mipui tan chuan ninawm tak a ni thei.
    Tunkar ningani hian veng chhung roreltu tur kan thlang dawn a, mi 16 tar chhuah an awm. Heng kan veng tana inhuam atang hian mipuiten mi pasarih kan thlang dawn a, khua leh tui thate mawhphurhna chu vote thlak a ni tih hi ram rorelna kawng hrang hranga inthlan a awm chang hian hriat nawn fo a ngai thin.
    Candidate-te tlin lohna lai zawn vak vak hi thil awm thei a ni a, keimahni pawhina kan tlin loh leh kan nih phak loh tha famkim ni turin kan phut a, sawisel chiamte a awl hle. Tute pawh hi ding se sawisel kai lo an awm lovang tih hi chiang sa a ni a, candidate kan neih mekte atanga tha kan tih thlan thiam mai hi thil finthlak leh kan chin dan tur atana tha a ni a, fel ber ang ziazanga candidate-te tlin lohzia leh nepzia lam sawi vak vak hi awmze nei lo a ni.
    Political party pawhin mipui it tur zawn thiam hi eng lai pawh candidate siamna kawnga tha a ni tih hriat tel a tha a, party ringawt ngaihtuah lova veng ngaihtuah thlen phak hi party leh veng tan pawha hamthatna telna ve ve a ni tih hi thil pawmtlak tak a ni.
    YMA AW-ah hian thu pawh hla pawh a chhuah theih a, veng chhung mi a tam theih ang ber thu ziak chhuah theih ni se tih hi kan duh dan a ni. Mahse, mimal inbeihna pawi thei te, zahmawh rawng kai leh inzirtirna dik lo thei lakah erawh fimkhur ni se. Tun tumah pawh hian thu sep bakah hla uang kan han telh e, inthlan a hnaia inthlan thu a tam lo thei lo a ni.
__________________________________________________________________________________
Dt. 12. February.2012
        Kan vengin YMA kaltlangin Saiha kangmei tuarte cheng sing sarih chuangin kan tanpui a, a lawmawm khawp mai. Ram pumah a ti tha pawl kan ni a, kan Branch President telna sub-Committee a lo ni lehzel bawk nen kan tih awm tak kan ti niin a lang.
    Kan Branch YMA-in chhiatni inkaihhruaina dan kan duang a, tha tawk lo pawh a lo awm palh thei ang; amaherawhchu, kan dan hi kumin atan chuan kan hman tur a ni a, ennawn leh anih hma chuan, tha taka kan zawm tlan angai a, abik takin hruaitute phei chuan kan hriata, zawm tha tura kan zirtir zel pawh angai a ni.
    Tun tum chu kan vengin ziaktu tlemte kan neih zing atangin Hmingthana a rawn che chhuak a, lawmawm khawp mai, kan ze thar tha tak hi kan vawn nun zel pawh a va tul em. Kan chanchinbu latu kum hmasa aiin kan pun belh a, a lawmawm hle a ni.
__________________________________________________________________________________
Dt. 5. February.2012
    Tanpui ngaite tanpuitu kan nih kan lantir angai leh ta malh malh hle mai, kan tihtur a ni miau mai si a. Saiha lama kan unauten chhiat an tawh avangin tanpui an ngai a, kan veng chhungah thil tha kan tih angai reng bawk si, kan hah deuh anih pawhin chawl mai lovin, thahnemngai takin che zel ang u. Pawisa khawn a tam si, kum thar sum van lai lo ni bawk nen, khawntu nih a nuam chiah thin lo khawp mai, nu leh paten min tawiawm teh u khai.
    Inthlang ram tih takah inthlan kan hma bak leh ta a, ngaihtuahna fim tak kan hman angai hle a ni. Kan khawtlang thatna tura thawk thei leh hmangaihtu tak tak tura kan rin kan thlan thiam angai hle.
    Khawtlang thil pawimawh tam tak YMA AW ah hian chhuah thin anih avangin, kan khawtlang in tin fang tura ngaih a ni a, chuvangin a chhia emaw a tha emaw, a ngaihnawm emaw nawm lo emaw he chanchinbu lak theuh hi kan mawhphurhna a ni. Chutiang tak chu anih avangin tun tumah pawh hian Chhiat ni kaihhruaina kan han chhuah anih hi. Heng hi kan hriat loh leh chuan khawtlang tan kan tangkai lo hle a ni ang. SMS kan dawng khal theiin kan dawng tam lutuk a, chhuah vek theih a ni thin lo, sms te hian mi dang a siamthat rual hian thenkhat tan a na thei si a, kan fimkhur rih a ni e.
__________________________________________________________________________________
Dt. 29. January. 2012
Pawl hruaitu nih hi chuan sawisel leh rel thleng pawh a tawrh theih a ngai hle. Ti ve peih hawt lo leh thei hauh lo te duh tawk pawh tlin a har hle a ni. Amaherawhchu, sawiselna hi chak loh phah nan hmang lovin hmasawn nan leh insiamthat nan hman tum a tha khawp mai. Mi dangte pawh hian thil tha an duh vang pawh a lo ni ve tho thin a, an sawiselte pawh hian inenlet nan hman phah a tha fo.
    Veng hmasawnna tur kan duh tlang theuh a, mi dangte kutah daih a awm hran lo tih kan hriat a tha hle. Sum tam tak lo luang lut lo mahse, faina kawngah te, mi dangte tanpui kawngah te leh rilru dik putna thuah te hian hmasawnna tur kawng tam tak a awm a ni.
    Kan chanchinbu hi tun dinhmunah chuan a phek a tlem a, thuchhuah tur a tam si a, kan chhuah vek seng rih lova min hrethiam leh aniang chu. SMS huangah hian mi pawi kan lo sawi palh anih chuan ngaihdam kan dil a;mahse, siamthatna remchang angah kan ngai ve bawk a nia. A chhutna hmun hi kan thlak zeuh zeuh mai thei, karlehah pawh a hmun ngaiah kan chhu leh rih ang, chhutna hmun nghet hi chu neih kan duh khawp mai. Felfela pa zarah YMA zia pakhat kan hriat belh leh e. Pu Chawia kha kan phut tlat che ania, Pu Zorampela leh Pathara Sailo telin.
__________________________________________________________________________________
Dt. 22. January. 2012

      Kum a lo thar a, tu te emaw tan chuan hna tau a tet a ni ringawt mai a. Khawtlang leh Kohhranah mawhphurna tur tam tak kan nei hlawmin a rinawm. Heng mawhphurhna hrang hrangah hian mahni hlawkna tur chu a vang khawp ang, mite tana malsawmna kan nih theihna tur a ni hlawm ngei ang a, a Pathian thu khawp ang. Hmalakna tur hrang hrang lo awm thin hi hahthlakin, mite rel leh sawisel pawh tuar deuh mah ila, kan that tlanna tur nia kan thurel anih tawh chuan tha taka bawh zui ngei hi committee memberte mawhphurhna a ni.

      Section committee-in hma kan la leh tak tak anga, chanchinbu la tur zawn leh a man khawn te, chhiatni fund khawn te a awm leh nuk anga, pawisa khawn a tam a, lo phun mai lovin tha taka lo thawhpui ngei hi khawtlang nu leh pa ten kan mawhphurhna a ni tih hriat a tha khawp mai. Nikum lam khan chhiatni fund khan min daih lova, kumin chu thawh tam deuh tura min rawn tuk anih pawhin, lo phun mai lovin, thahnemngai takin i thawh ang u. Pawisa khawn hi thil nuam tak a ni lem lova, a khawntu naupang lam ni bawk si, inthlahrun awm duh deuh mai a ni a,

      Local council inthlang turah YMA leh political party lak hran leh kal kawp tir dan tawk hriat a tha khawp mai, thiam taka kan kal kawp tir loh chuan eng pawl emaw zawk zawk hian mi tha an chang lo thei a, a tuartu chu keimahni tho kan nih leh dawn avangin. Kan khawtlang tana mi tha leh chak erawh kan ngaihtuah thiam a, kan thlan chhuah thiam a ngai khawp mai.

    Tun tum chu article huangah a awm tur awm kan dah thei lova, hriatthiam kan ngai, khawtlang thil chhuah tur kan dawng tam deuh a ni. Thlalak pawh dah hram kan duh na a, a leng rih lo a ni e. Kan han ti neuh neuh a, kan rei phian zel a, zan rei lamah hi chuan mit a fiah lo thin a, chhut sual leh hmaih a awm leh thin, kan inhre thiam aniang chu.

__________________________________________________________________________________

Dt. 15. January. 2012

   Kum thar atana YMA AW editorial board thar ten tun tum hi kan enkawl tanna a ni. A thu a han chhiar anga Pu Chawia leh Pu Zorampela chu an mit a kham leh khawp ang, kan mizo tawng thiam hian a daih leh dawn si lova; mahse, anni hi chuan tha takin kan dik lohna leh thiam lohna min hrilh ang a, hma kan sawn phah ngei ang.

   Hetiang ang ti tura min han ruat hi Pu T. Ngurkhuma squad hian an rel sual em ni chu aw ka ti deuh; mahse, kan ding leh vei, hnung leh hmaah an awm tlat dawn avang erawh chuan thlamuan thlak ka ti. Thiamna leh theihnain atlin phak bak hi chu tih a har thin a, min fin chhuah teh u.

   Lehkha ziak mite eng thu pawh lung kuai zawng leh inhrikthlak chakna nei apiang tan hmun a awm a, kan sawm che u a, thu a ni emaw hla a ni emaw a rem vek, kan lo lawm che u a ni. Kan editor kal chhuak hote kha kan phut tlat che u a ni.

   Ti-a’n committee leh meeting a rawn ziah atangin hmang dik hlauh ila, a va tha dawn em! Mangheta hian a tlin tawh loh vanga he article hi ziak a ni lo, hmana a ziah tawh tunah kan chhuah chauh anih hi; mahse, a chhuah hun hi a hun khawp mai. 
__________________________________________________________________________________