AIZAWL MUNICIPAL COUNCILLOR TE TRAINING ZO FEL
Chanmari West November 28: Aizawl Municipal Councillor te tana nithum awh (23rd – 25th November) ‘Foundational Programme’, Sawrkar peng hrang hrang kalphung hriatna leh zirna, AMC Session Hall a neih chu zawhfel a ni ta. He training naah hian Ward No VI Councillor Pi Zamanthangi Chanmari West pawh telin a hlawkpui hle a ni.
He programme hi Chief Secretary Pu Van Hela Pachuau chuan hawngin, Pu Lianhrima Secretary Urban & Poverty Allevation Department in a kaihruai. Chief Secretary chuan Councillors te chu Aizawl khawpui enkawltu tur an nih angin, engtik lai pawhin rilru fim taka chia leh tha hriatna hmanga an hna chu mahni inhaivurna atana hmang lovin thianghlim taka mipui rawngbawl nana thawk turin a fuih a, thu neihna chu hmansual a awl a, tiin Councillors te chu an hna thawhna theuhvah fimkhur taka mahni ngaihtuahna hmanga thawh a tul thu a sawi. A sawi zelnaah Councillorte chu midangin an la tih ngai loh, ‘trend-setters’ ni thei turin a besei thu sawiin thil kalphung an hriat loh pawhin a hria te zawt hreh lo turin a chah bawk a ni. Chief Secretary hian AMC Building hmun hma te a tlawh kual bawk. Hawnna programme a hian AMC Chairman, Vice-Chairman, Executive Councillors leh Councillors te bakah CEO AMC leh a training petu tur Department aiawhte – Finance, Planning, UD & PA leh Trade & Commerce te chu an tel a ni.
Training hawnnaah hian AMC Councillor-te an tel tha hle a, AMC CEO leh sorkar mi pawimawh dangte pawh an tel a ni. Sawkar kalhmang zirhona programme ah hian Ni 23/11/2010 khan JNNURM leh SJSSRY chungchang te, ADB Loan hmanga Aizawl khawpui development programme te, Aizawl Water Supply dinhmun leh Public Sanitation chungchang te, Democratic Decentralisation & Constitutional Amendment chungchangte mi thiam bik ten an zirtirin subject hrang hrang zirhonaah leh sawihonaah Councillorte an tui tlangin tangkai takin an hun tan hmang a ni. Ni 25/11/2010 khan Street Lighting chungchang te, khawpui kawng siam chungchanga Sawrkar hmalak dan te, Building Regulation leh Aizawl City Master Plan te, Land Revenue Administration te zir hoin a kharna inkhawm ni 26/11/2010 khan khawpui Traffic tawt lutuk chungchang leh Public Transport System te sawiho in hun an hmang leh a ni. AMC hotu leh Sawrkar department hrang hranga mithiam ten he hun hi phur tak leh tha tho taka an hman pui avangin Councillor ten lawmawm an tiin hlawk an inti hle a ni.
