Hnam dang sumdawng titawp turin YMA-in hma la zel

Chanmari West, August 28 : YMA General Conference 2010, Lungleia neih thurelin "Mizo hming hawha dan lova hnam dang sumdawngte titawp turin Central YMA-in hma la rawh se" a tih chu bawhzui chhunzawm zel a ni.
Central YMA hruaitute chuan, Mizorama Mizo hming hawha hnam dang sumdawngte inthiarfihlîm tura an tihna leh hma an lakna chu an bawhzui zel dawn tih an puang a; August 24-a Aizawl DC-in, sorkar phalna la loa hnam dangte permit endik khap a nih thu a chhuah chungchanga zawhna chhangin, CYMA hruaitute chuan, Mizo hming hawha sumdawng leh permit nei lo hnam dangte chu an enfiah zel tur thu an sawi a ni.
CYMA hruaitute chuan, dan loa hnam dang sumdawngte chu sumdawnna bânsan tura hriattirna an pek angin, an zâwm em tih tun thla hian an enfiah tih an sawi a; an thil enfiah leh bawhzui mekah dan kalha thiltih an nei lo nia sawiin, "YMA chu ram leh hnam tan a ding zel dawn a ni," an ti a ni.
Mizo thenkhat, mahni ta anga chhála hnam dang dawr nghahsaktute chu hnam hralh an ni tih sawiin, chung mite chu an thiltih bânsan turin an ngen nawn leh a; ram leh hnam chhanna kawngah YMA a tlanchhe dawn lo tih an sawi bawk.
CYMA-in Mizo hming hawha hnam dang sumdawng an endikte list an siam chu pe ve turin Aizawl DC-in YMA a ngen tih an sawi a; list chu DC an pek dawn thu leh, DC-in a bawhzui dan en zui zel an tum thu an sawi bawk.
Hemi chungchangah hian Aizawl DC, Surbhir Singh chuan August 24 khan thupek chhuahin, hnam dangte Trade License leh Inner Line Permit-te chu sorkar phalna la lo leh hriatpui loha endiksak phal a nih loh thu a puang a; permit endik tur leh dan leh thupek kengkawhtu chu district thuneitute leh police-te an nih thu leh, dan loa thil tite chu an chungchang ngaihtuah a nih tur thu a tarlang a ni.
He hmalakna kalpui mek hi Thalai Sorkar hna thawk lo ten sumdawnna kawng an zawh theih nan leh Mizote Economics-a chimrala kan awm loh nana hmalakna a ni a, Mizo mipui zawng zawngte hnamdang sumdawngte mahni hming hawhtir lo tur leh a lo ti mekte pawh August 2011 thla chhung ngeia titawp turin an ngen a, tin, a bawhzuitu tur pawl pawh insiamin a tul anga hmalak zel CEC pawhin a rel a ni.

LOCAL COUNCIL HRIATTIRNA

@ DCSO Aizawl East atanga lehkha hmuh angin BPL/AAY Card Holder zawng zawngte chuan Ni 30.8.2011 (Thawhlehni) aia tlai lovah R/T-II atanga transfer duh zawng zawngte’n an mahni ngei inlanin DCSO Aizawl East Office ah kal tur a ni.
@ Sanitation Point thar :- Khuangchera Section chuanhnuai te tan Upa Lalsangzuala Hauhnar te kawmthlang kawngkawi ah Bawlhhlawh paih Motor a rawn ding thin dawn a, lo ngaihven turin an in hriattir.

NGENNA : RSBY CHUNGCHANG

“Dam loh nikhuaa man chawi lova Damdawiin a inenkawl theih nan RSBY (BPL bik tan) ah in ziak lut ve ta che. Inziahluh hun hi Health Worker ten an rawn hriattir ang che, chhungkaw kima inziaklut turin i lo in ring dawn nia. Hemi rual hian APL chhungkaw tan pawh Mizoram Health Care Scheme-ah inziahluh nghal theih a ni bawk.”

YMA kumpuan atan ‘Ram leh hnam humhalh’  rawt. 

Chanmari West, August 21 : Ni 18.8.2011 (Ninga) zan khan Branch YMA Committee Meeting Vawi -10 na chu Pu Lalrinlian In (K- Section) ah President Pu T.ngurkhuma kaihhruaina in neih a ni a, YMA kumpuan atan kumin Gen.Conference ah ‘Ram leh hnam hunhalh’ tih chu CYMA committee ah thlen nise tih rel a ni.
Thurel Tlangpuite :-
1. Ni 25-27.10.2011 a YMA General Conference Kolasib-a neih turah kan Branch atangin Special Items leh Nomination neih loh mai nise tih  rel a ni. Kumpuan leh Agenda atan heng te hi thawh nise  :-
(a) Kumpuan: Ram leh Hnam Humhalh
(b) Agenda : YMA pem lehkha siam nilo pem lehkha hmang an   la awm reng hi khawi Branch mahin pawm loh ni  rawh se.
2. RD Department atanga kan vengchhung Step checker tile phah te rawng hnawihna tur sum hetiang hian hmuh a ni.
(a) Indoor Stadium bul I  - ` 25,200
(b) Indoor Stadium bul II -`  25,200
(c) Thlanmual (Park)       - ` 28,000
TOTAL        ` 78,400
Tin, Estimate atang hian ` 55,000/- lak chhuah tawh a ni a, a bak hi chu hnathawh zawh a lakchhuah tur a ni.
3. Ni 13&14 October 2011 10th CM Running Trophy In YMA Cultural Dance Competition Centarl YMA-in A.R Lammual-a heng Cheraw(Kan tluang), Chai leh Chawnglaizawn lam hmanga an buatsaih turah kan Branch YMA pawh tel ve nise tiin a rel a, Branch OB ten a tul angin hma lo la se tih a ni.
4. Property Sub Committee ten an member atana Pu C.Vanlalsanga V-Section leh Pu Lalngaihawma T- Section an ruat chu pawmpui an ni. Tin, Branch YMA bungrua a kawl tura ruat nilo kawl an awm chuan YMA buka dah chho tura tih an ni bawk.
5. N-Section ten Edenthar depa Chanmari West huanchhung In engemaw zat House Number nei lo te, House Number pek chung chang an rawn thleng chu zir chian deuh ngai a nih avangin zirchian hnua a tul anga hmalak nise tih a ni.

CHHIATNI FUND LUH DAN ( w.e.f 18.8.2011)

Section        Target Lut tawh     La lut lo Khumna

 K 44400 46400 Nil 2000
 N 32000 33500 Nil 1500
 V 47800 51200 Nil 3400
 CH         41500 40200 1300    -
 T 58000 51700 6300    -

HEALTH CARE SCHEME CHUNGCHANG

Ni 22.8.2011(Thawhtan) atang hian Chanmari West Sub- Centre-ah Health Care Scheme enrolment tan a ni dawn a, hetiang hi a kal hmang a ni:-
1. ` 1,00,000/- chin Bill duh tan `   500/- ken tur.
2. ` 2,00,000/- chin Bill duh tan `   750/- ken tur.
3. ` 3,00,000/- chin Bill duh tan ` 1000/- ken tur.
Hei hian chhungkua-ah member panga (5) chin a huam. Enrolment ti nghal duh tan chhungkaw hotu (Pa ber) Voter ID Card leh Ration Card ken tur a ni. Tin, House Number leh Phone No. hriat tur a ni bawk e. A dan leh dun hre chiang duh tan Sub Centre-ah a bu chhiar tur a awm e.

BRANCH YMA SPORT 2011

(Hriattur pawimawh)

Organising Committee, Chanmari West Sport 2011 chuan  heng a hnuaia  mi ang hian Sport kan neih tur atana hriattur tul a rel a, Section tin ten ngai pawimawha zawm theuh tum tur a ni.

1.Ground Chungchang :- Chanmari West Br.YMA Sport 2011 hi Joint YMA Field Vaivakawn, Chanmari ‘W’ Indoor Stadium leh  Chanmari ‘W’ Basketball Court ah neih tur a ni.
2.Items turte :-
1. Football (M&W)
2. Volleyball (M&W)
3. Basketball (M)
1) Football :-
(a) Joint YMA Field, Vaivakawnah Ni 17.9.2011 (Inrinni) leh Ni 24.9.2011 (Inrinni) ah khelh tur a ni ang.
(b) Mipa team ah hian Section tinin Team A leh B neih tur a ni a, Team A leh B hi a hran ve ve a khelh a ni ang. Hmeichhia hi section tinin Team 1 neih tur a ni.
(c) Team  khat ah  hian mi 16 awmin Substitution 5 thleng siam theih a ni ang a, team A  leh B ah hian khelh kawp theih a ni lo.
(d) Match hunchhung hi Mipa  bikah  30+5+30 a ni  ang a, hun panngai a inhnehtawk an awm chuan Tie-Break a a chak zawk zawn tur a ni ang. Final ah hian 40+10+40 a  khelh tur a ni  ang. Hmeichhia  ah  hian  15+5+15 a  ni ang a,  inhnehtawk an awmin Tie-Break a chak zawk zawn tur a ni bawk ang. (e) Section tinin Ball 1 theuh ken tur a ni ang.
2) Volleyball :-
(a) Section tinin Mipa leh hmeichhia Team 1 ve ve neih tur a ni ang.
(b) Volleyball hi Indoor Stadium ah Zan Dar 8 atangin khelh thin a ni ang.
3) Basketball :- Section tinin Mipa Team 1 neih tur a ni a, Chanmari West Basketball Court ah Zingkarah khelh thin a ni ang.
3. Incharge :- Sports 2011 neih tur ah hian a hnuaia mi ang hian incharge ruat nghal a ni.
1) Football :- Pu Zonunsanga (Patea) ‘K’ & Tv. R.Lalrinngeta ‘V’
2) Volleyball :- Pu R.Lalsangzuala ‘T’ & Tv.Zairemmawia ‘N’
3) Basketball :- Pu R.Lalbiakhluna ‘CH’ & Nl.Lalramengi ‘N’
Section tinin Entry Fee ` 500 leh Items hrang hrang Team list  (Hming leh Pa hming) August Ni 31 ral hmain Organising Secretary hnenah thehluh vek tur a ni.

Zawlbuk sak mek atan Public Contribution khawn a ni dawn.

Chanmari West, August 14 : Ni 2.8.2011-a Chanmari West Branch  YMA Executive meeting in Zawlbuk Working Committee te hma la tura atih angin Zawlbuk sak mek atan Public Contribution khawn tura ruahmanna siam a ni.
Ni 5.8.2011  (Zirtawp) zana Zawlbuk Working Committee chuan Branch YMA Executive Committee in hma la tura a tih angin Zawlbuk kan sak mek chu a  chhunzawm na tur a tan vengchhung a chhungkaw tinte hnenah  Public Contribution khawn nise tih a rel a. Hetiang hian section tinah Target siam a ni.
1. Neuva -         `    45,000/-
2. Vanapa - `    85,000/-
3. Khuangchera - `    85,000/-
4. Chawngbawla - `    95,000/-
5. Taitesena - ` 1,00,000/-
Public Contribution hi a khawn hunchhung atan thla thum (Aug-Oct. 2011) nise tih a ni a, Section tinten remchan dan angin mahni huamchhungah Category lo siama khawn tura tih a ni. Kum 2005 atang khan Zawlbuk hi buaipui tan a ni a, Zawlbuk tur hi tunah hian bungrua kan neihsa chi hrang hrang viz. Iron Rod etc. hmanga chhunzawm mek a ni a. YMA Zawlbuk tur atan hian ` 17,22,550/- senral tawh niin tha hi 500 chuang zet sen a ni tawh bawk a ni.  Public Contribution atan hian chhungtin hnenah Appeal semchhuah vek tura ruahman a ni a, Public Contribution hi chhungtinte lo ngai pawimawh theuh turin Branch YMA chuan a ngen bawk a ni.
Kan vengchhungah khawtlang huapa puipunna leh vantlang inkhawmna tur hmun kan neih loh avangin CWBYMA chuan theih ang angin hma a la ve zel a,  he kan harsatna hi hre reng chungin Zawlbuk Working Committee pawhin tha leh zung sengin theihtawpin hma a la mek a ni.

CENTRAL YMA THUCHHUAK

YMA General Conference 2010-in a rel bawhzuiin, Central YMA chuan Mizo hming hawha hnamdang sumdawngte dapchhuah hna a thawk mek a, hetiang anga sumdawnna kalpui mek hi tam tak an awm a ni.
Sum leh pai tlemte vanga mahni hming hawh tir a, hnamdang sumdawn tir chu dan kalh a nih ziate, ram leh hnam hralhna  anih ziate hre turin Central YMA chuan mitinte a ngen a, chuvangin hetiang anga sumdawnna kalpui thinte chu August 2011 ral hma ngeia titawp turin a ngenin a hriattir a, Central YMA chuan a hlawhtlin leh tlin loh a vil zui zel dawn a ni.

KUMPUAN CHHUNGCHANG HRIATTIRNA 

 1. Vawiin Ni 14.8.2011 (Pathianni) Dar 12:00 Noon hian Kumpuan Thupui ‘Khawtlang Nun Siamthat’ chungchangah Salvation Army Tleirawlte zingah hun hman tur a ni a, Kumpuan Sub-Committee member zawng zawngte leh Branch YMA Executive member zawng zawngte tel vek tura ngen kan ni e. 2. Ni 19.8.2011(Zirtawpni) Dar 1:00p.m hian Chanmari West High Scholl-ah Kumpuan programme hi hman leh tur a ni a, he hun ngaipawimawh theuh turin an in ngen. 

LAWMTHU SAWINA

Independence Day Celebration2011, Football 2nd  Division (City Zone) khelh zawh takah vengchhunga tlawmngaih chhuaha sum leh paia tanpuitu te leh he tournament chhung zawng a phur tak leh tha tho taka support tu zawng zawng chungah Chanmari ‘W’ Football Club chuan lawmthu a sawi takzet a ni.

Branch YMA Executive Committee neih a ni

Chanmari West, August 7: Chanmari West Branch YMA Executive Meeting chu Ni 2.8.2011 (Thawhleh) zan khan Pu R.Lalhmachhuana (Vice President) te in Vanapa Section-ah President kaihhruainain neih a ni.
He meeting ah hian vengchhung leh YMA hmasawnna tur kawng hrang hrang ngaihtuah leh rel a ni a. Section leh Sub-Committee-in thu an thlen te ngaihtuah ho a ni bawk. Meeting ah hian Committee hmasa leh he committee inkara thil thleng  leh pawimawhte Secretary hnen atangin report hrang hrang ngaihthlak a ni a, ruihtheih thil avanga vengchhung atanga chhuak tura an tih Pi Vanlalpari  W/o Vanlalthanga Neuva Section a mite chu   warning vawi-2 pek hnu pawha an la chhuah duh loh avangin Ni 7.8.2011 (Sunday) hma ngeia chhuak tura tih nawn leh an ni a, chanchinbu buatsaih lai hian vengchhung an chhuahsan thu report dawn a ni.
Member Secretary Aizawl Municipal Council Ward No-VI hnen atanga thu hmuh angin Solid Waste Management  Member Branch YMA aiawh tur mi pahnih heng Pu R.L.Thanhnuna leh Tv.Zairemmawia te ruat an ni.
Zawlbuk sak mek chu sum neih ang ang hman zawh thawkhat tawh a nih avangin vengchhunga chhungtin te hnenah thawhlawm khawn nise tih rel a ni a, a tul anga hma lo la turin Working Committee kutah dah a ni.
Meetingah hian YMA memberte tan Chanmari West Branch YMA Sport 2011 buatsaih nise tih a ni a, a hun atan hian Ni 19-24.9.2011 ruahman a ni. He Sport neih turah hian member mipa leh hmeichhia te Football leh Volleyball hmangin intihsiak tur a ni. 2011 Sport neih turah hian a tul anga hma lo la turin Organising Committee din nghal a ni a, heng a hnuaia mite hi ruat a ni.
Chairman :- Pu R.Lalhmachhuana, Vice President.
V.Chairman :- Pu Lalrinliana
Secretary :- Pu R.K.Rozidinga
Asst. Secy :- Tv.Zairemmawia
Members :-
1.Pu R.Lalbiakhluna - CH
        2. Pu Zonunsanga (Patea)-   K
  3. Pu R.Lalsangzuala        -   T
4. Tv.R.Lalrinngheta         -   V
5. Nl.Lalramengi              -   N
Neuva Section leh Taitesena Section te’n Section bungrua tur lei an rawn dil chu phalsak an ni.
Tin, Kumpuan Sub-Committee Secretary Pu Lalhmingliana’n engemaw rokhawlhna a neih avanga a phatna chu pawmsak a ni a, a aiawh tur hian Asst.Secretary nilai Pu K.Lalzuithanga chu ruat niin Asst.Secretary atan Pu C.Lalramzauva(Tetea) chu ruat nghal a ni bawk.
Vengchhungah chhiattawk Lumen ngai kan awmin tlangval/rawlthar mitthi in bawr vela zu in leh rui kan awm ta fo mai chu Br.YMA committee chuan a ngaimawh hle a, khauh zawka hmalak tum a ni.

YMA  MEMBERTE  HNENA  HRIATTIRNA

Ni 23.9.2011(Zirtawp)zing dar 5:00 khian Central YMA buatsaihin Half Marathon Race(21 kms) tlan tur a ni a, hetah hian mipa 5 aia tam lo leh hmeichhia mi 5 aia tam lo tlan tur a ni. Tin,Ni 7-10.9.2011 chhung hian T.T Tournament neih tur a ni bawk a, kan Branch YMA aiawha tel tumte chuan Ni 21.8.2011 ral hma in Branch Secretary Pu R.L.Thanhnuna hnenah mahni ngei kalin in report tur a ni e.