CYMA VICE PRESIDENT THAR PU JH ZOREMTHANGA

Chanmari West April 18: CYMA Vice President thar atan Pu JH Zoremthanga CEC member chu thlan tlin a ni.

Ni 15/4/2010 (Ningani) a CEC meeting Pu Lalchungnunga CYMA President kaihhruai chuan CYMA Vice president boral ta Pu C. Zoramliana aiawh turin Pu JH Zoremthanga Vaivakawn CEC Member, Ex-President chu lungrual takin an thlang.

Pu J.H. Zoremthanga hi Central YMA-ah 1995-1997, 1997-1999 khan Assistant Secretary niin, kum 1999-2001, 2001-2003 khan General Secretary hna a chelh a, kum 2003-2005 khan Vice President niin kum 2005-2007, 2007-2009 chhung khan President hna a lo chelh tawh a ni.

Tunah hian Vaivakawnah an chhungkuain an cheng mek a, a nupui Dr. Lalmalsawmi Hmar leh a fate 3 nen khawsain hnathawhna lamah chuan Govt. Zirtiri Residential College-ah Selection Grade (Lecturer) hna a thawk mek a ni.

RUIHTHEIH THIL THAHNEM TAK MAN

Ni 14/4/10 (Nilai) zing dar 9 vel khan Sairang Road a Pu C. Thanchungnunga in (mi luah) Chanmari West leh Edenthar ramri a mi atangin Chanmari West branch YMA Kumpuan Duty te chuan sapzu, um puitling vek, um 373 man a ni. He zu hi Rs 2,98, 400/- man hu lai a ni. He zu man neitute hi Lalthansangi d/o Saichhawni (L) Hunthar veng leh Lalduhzuali w/o Ramdinthara Ramhlun South te anni.

Tin, ni 15/4/10 (Ninga) khan Neuva section huamchhung motor silna zawn kawngpuiah taxi MZ-01B 7063, V. Luaizamuana s/o L. Rama, Hunthar veng khalh (a ma taxi) atangin Ganja kg 8 man a ni bawk. Ruihtheihthil man te hi Police hnenah hlan an ni.

Ni 16/4/10 (Zirtawp) zan khan Kumpuan duty te chuan Wonderland School CH Section atangin Mc Dowell Whiskey um puitling um 7 man a ni bawk. He zu man hi school neitute chuan Machhuani Chanmari, Pi Nipuii inluah ta niin an sawi.

Ruihtheih thil hetiang zat kan vengchhung atanga man a ni hi Branch YMA chuan pawi a ti a, veng hming ti chhetu hi a dem takzet ani. (photo gallery en rawh)

CHANMARI WEST BRANCH YMA COMMITTEE NEIH A NI

Chanmari West April 11: Ni 5/4/10 (Thawhtan) zan khan Pu RK Pahlira (Nl. R. Lalramengzami) te inah Branch committee neih a niin thu pawimawh tak tak rel a ni.

Ni 5/4/10 (Thawhtan) zana Br. YMA committee chuan thu pawimawh tak tak hetiangin a rel:

1. YMA DAY denchhena ZCC, Chanmari West in Section te inelna tur Cultural Dance competition buatsaih an rawn dilna chu phalsak a ni a, a hun tur (intihsiakni) erawh ngaihtuah nawn leh ni se.

2.YMA Platinum Jubilee puala Faina Hnatlang neih nise tih a ni a Ni 10/4/10 (Inrinni) zingkarah Branch pum huapin hnatlang mahni section tinah neih nise, hnatlang zat pawh inchhiar ni se, Br. Secy hnenah hriattir ni rawh se. Tin, vengchhung kawrpuia bawlhhlawh paihna awmte hi paih theih tawh loh turin hung phui vek tum ni se, a hung phalna hi V/C te hnenah dil ni se.

3. Kumpuan chungchang: Kumpuan Joint Meetingin a lo rel tawh bawhzui na’n hetiangin thu tih tluk a ni:

i) Vengchhunga mi tlawmngai, chawimawi phute thlanchhuah a, chawimawina neih ngei nise, section tinah mipa 1 leh hmeichhia 1 nise.

ii) YMA Kumpuan hawnna inkhawm chu ni 22/4/10 (Ninga) zanah neih nise, a hun, a hmun leh programme kimchang chu Kumpuan sub-committee leh Br. OB te kutah awm se.

iii) Vengchhunga ruihlo zuar man an nihin, YMA member an nih chuan member nihna hlih sak a ni ang a, tin, YMA member an ni emaw nilo emaw man an nih chuan Chhiatni Fund pekkir an ni ang.

4. Tournament chungchang: CYMA Platinum Jubilee lawmna atana Football leh Basketball Tournament awm turah Br. YMA player te inbuatsaihna ngawrh taka kalpui mek a ni. Basketball player te’n a tul anga an hman atan Rs 1500/- pek a ni. Tin Football Coach atan Tv. Zion Lalramluaha ruat a niin Asst Coach atan Tv Laltlankima te ruat an ni.

5. Damlo tlawh: Tv James Lalchhuanthanga, natna khirh tak tuara damlo Presbyterian Hospital, Durtlanga awm mek chu, damlo kan na’n Rs 1000/- pek a ni.

CHANMARI WEST CHAMPION

Ni 3/4/10 (Inrinni) a Ramhlun Sports Complex a khelh zawh tak ADFA 2nd Division League Final khelhah Chanmari West Sporting Club te chuan Ist MAP Football Academy chu 2-0 a hnehin an champion. CWSC te hian semi final-ah Electric Veng FC 5-4 in an hneh a, hun pangngaiah 3-3 in an inhnehtawk a, extra time-ah Chanmari West an chak. Final match hmuhnawm takah hian minute 3 naah Vanlalhuma’n goal a thun a , minute 88 naah F. Lalnunhlua’n thun belhin 2-0 in an chak ta a ni. Champion hian No mawi leh Rs 10000/- an dawng a Best Player ah hian Chanmari West Sporting Club Player Vanlalhuma thlan a ni.

He Champion theihna chhan hi player te ni bawk mahse CWSC Football hruaitute inpekna ropui tak vang a ni bawk a ni. Sports lama kan hruaitute tan la sauh sauh zel sela 2nd Division mai nilo 1st Div ah pawh inhlangkai zel turin hma la se a lawmawm ngawt ang.

KUMPUAN BAWHZUI NA ATAN JOINT MEETING NEIH A NI

Chanmari West April 4: Ni 30/3/10 (Thawhleh) zan khan Pasaltha Neuva inah Joint Meeting pawimawh tak neih a ni

Kumpuan bawhzuinatan a hmalakna tur Joint Meeting hi Kumpuan Sub-Committee koh a ni a, hetah hian section tin OB te leh Branch OB te tel kim tura ngaih an ni. He meetingah hian engemaw rokhawlhna avanga hruaitute an kal kim vek thei lo erawh chu a pawi hle, member kal dan chu hetiang hi a ni; ‘N’ OB : 5, ‘K’ OB: 2, ‘CH’ OB: 5, ‘V’ OB: 1, ‘T’ OB: 2, Br. OB: 3.

Joint Meeting thurelte chu:

1. Kumpuan hawnna programme neih chungchang: Hun remchang hmasa berah kumpuan hawnna programme neih tura ruahman a ni a, programme kimchang chu Branch Executive kutah dah a ni.

2. Ruihhlo do chungchang: Kan khawtlanga ruihhlo ti thin te’n zalen taka an ti leh buaina siam thin an awm chu Joint Meeting chuan a ngaimawh hle mai a, Section tin te mahni sectionah ngawrh lehzual a duty thin nise, tin, buaina leh harsatna siam thinte chu a tul anga Police hnena hlan zel ni rawh se. Tin, ruihhlo zuar thin an awm a man an nih chuan YMA member an nihna hlihsak emaw chhiatni fund pekkir thlenga hrem nise Joint Meeting chuan a duh a mahse hei chu Branch Committee kutah awm se.

3. Zonunzemawi/Tlawmngaihna inzirtir chungchang: Helam hawi inzirtirna hi Section hruaitute’n a tam thei ang ber neih nise. Tin, vengchhung mi tlawmngai, chawimawiphute thlanchhuah a chawimawi ngei nise, a thlanchhuah dan tur chu Branch Committee in rawn duang se.

He meeting hi Kumpuan sub-committe Chairman Pu R. Lalhmachhuana’n kaihruaiin “ Vengchhung nawmna leh ralmuanna tur chuan YMA hruaitute hi huaisen taka kan din ngam a tul a ni” a ti. CWBYMA President Pu T. Ngurkhuma pawhin hruaitute fuihna thu tha tak tak a sawi bakah “Zirlai naupang, tleirawl leh rawltharte hi nakin lawk a kan nula tlangval tur, kan veng hruaitu turte an la nih avangin Zonunzemawi tlawmngaihnate, aia upa zahna te hi kan zirtir makmawh ani” a ti.

MBSE HNUAIA HIGH SCHOOL LEAVING CERTIFICATE, 2010 RESULT A CHHUAK TA

Chanmari West March 28: MBSE hnuaia HSLC 2010 result chu ni 26/3/10 (Zirtawpni) khan tih chhuah a ni a, rampumah pass percentage chu 66.6 a ni.

HSLC 2010 Examination result chu ni 26/3/10 (Zirtawpni) khan Mizoram sawrkar chuan a tichhuak. HSLC exam hi mi 14938 te’n exam tumin form fill up mahse mi 14652 te chauhin an exam a ni. Result tlangpui chu hetiangin:

Exam zawng zawng: 14652

Passed: 9758

Failed: 4561

Compartment: 333

Distinction: 322

First: 1586

Second: 3337

Third: 4513

Mizoram pumah Benjamin Lalfakmawia, St Peter’s Higher Secondary School chu pakhatna a ni.

Chanmari West veng chhunga school awmte pawh an ti tha thawkhat hle a, New Horizon School of Education atanga pass zat hi 77.14% a ni a, Distinction - 4, First-14, Second-29 Third - 34 anni. Springdale School atanga pass zat hi 70% ani a, Distinction-1, First-nil, Second-5, Third-1 an ni. Chanmari West H/S atanga pass zat hi 26.32% a ni a, Second-2, Third-3 leh Compartment-1 an ni. Letter hmu an awm nual bawk. Chanmari West veng chhunga school te hi Mizoram pumah pawh an duai bik lo hle a ni. Zirtirtute tang sauh sauh se a lawmawm ngawt ang. (courtesy: www.mbse.in)

13th AMKA State Championshipah Chanmari West nula/tlangval te che tha

Ni 24-26 March, 2010 chhung awh, 13th AMKA State Championship chu Electric veng YMA Hallah tluang taka neih zawh a ni.

He inelnaah hian Chanmari West tlangval/rawlthar te an che tha hle hetiangin:

1. Vanlalthanpuia s/o TC Lalremsiama ‘V’ Gold 2

2. Vanlalnelawma s/o TC Lalremsiama ‘V’ Gold 1, Bronze 1.

3. Vanlalchhuanawma s/o TC Lalremsiama ‘V’ Gold 1, Bronze 1

4. Malsawmdawngzela s/o TC Lalremsiama ‘V’ Gold 1, Bronze 1

5. Vanlalremtluanga ‘V’ Gold 1, Silver 1

6. Reuben Lalhmingmawia s/o Roluahpuia ‘V’ Gold 2

7. Lalthakimi d/o Lalpianthanga ‘V’ Silver 1

He tournamentah hian Vanlalthanpuia s/o TC Lalremsiama chu BEST FIGHTER a thlan a ni.

Tin, Chanmari West atangin mi pathum(3) Vanlalthanpuia s/o TC Lalremsiama, Vanlalnelawma s/o TC Lalremsiama leh Reuben Lalhmingmawia s/o Roluahpuia te chu April thla a Northeast Games, Shillong, Meghalaya a neih turah Mizoram aiawh a Karate khel turin thlan an ni bawk a ni.

CHANMARI WEST SPORTING CLUB VOLLEYBALL TEAM TE SEMI FINAL AH AN VANDUAI

Chanmari West March 21: Ni 16 -20 March, 2010 chhunga neih, ADVA season ending Volleyball Tournament-ah CWSC hmeichhe volleyball teamte chu semi finalah hnehna chang zo lovin an vanduai.

Ni 16 -20 March 2010 khan F. Lalmuanzova Memorial Volleyball Championship chu Bethlehem vengthlang field-ah neih a ni. He championship hi Aizawl District Volleyball Association (ADVA) buatsaih a ni.

He tournament hi ADVA buatsaih II Division season ending tournament niin Chanmari West Sporting Club pawhin Chanmari west lo ti hmingtha fo tawh tute, mipa team khat (1) leh hmeichhe team khat (1) an thawhchhuak. a, CWSC mipa teamte hi First round-ah an vanduai hlauh a ni. Hmeichhe team te hian CWSC chu semi final an hruai thleng, CWSC hmeichhe player te hi senior, a tam zawk chu nu ni tawh an ni a, an chhuanawm hle mai. Theihtawp chhuahin an bei a mahse semi final ah hian JC Security te lakah 1-3 in hnehna an chang zo ta bik lo a ni. He Tournament hi Ni 20/3/10 (Inrinni) khan Bethlehem Vengthlang field-ah Final hi khelh zawh a ni a, chanchinbu buatsaih lai hian result kan hre hman ta lo a ni.

He tournament ah hian Chanmari West Sporting Club Volleyball teamte hi Pu Lalnunzira leh Pi Vanlalchhuangi te nupa T Section, Pu Lalnunthara Sailo Gemini Enterprise , Pu Lalrinchhana EL-AR Enterprise leh Pu J K Zosangliana Crown Computers te’n an sponsor a ni.

CHANMARI WEST BRANCH YMA MEMBERTE’N GUINNESS WORLD RECORD AN SIAM

Chanmari West March 14: Khawvela a ruala Bamboo Dance (Cheraw) entir tam ber Guinness World Record thar chu ni 12/3/10 (Zirtawp) khan siam a ni ta. He record thar hi AR Lammualah leh Chanmari atanga Sikulpui kawn inkar kawngpui dungah entir a ni. Cheraw hi avaiin bu 671 entir a niin mi 10736 laiin minute 8 chhung an entir a ni. Guinness World Record siamnaah hian kan veng pawhin Branch YMA hmingin bu 2 an entir a heng bakah hian New Horizon School of Education zirlaite leh tunhma lama cheraw a kan veng ti mawi thin tute’n an entir bawk.

London tanga lokal Guinness World Record adjudicator Ms Lucia Sinigaliesi chuan he hun hi a hriatpuiin World record a nih thu a puang a, Mizoram Art & Culture Minister, Pu PC Zoramsangliana hnenah certificate a hlan.

Ms Lucia Sinigaliesi hian “Hei hi khawvela bamboo dance entir tu tam ber leh rei ber a ni a, he record khum tur hi chuan vawiina an entir ang hian traditional dress a mawi taka an inchei ve kher pawh a ngai dawn a ni” a ti.

Mizoram Art & Culture Department Director Pi Bawihchhingpuii pawhin thusawiin “ Hei hi kan hnamzia (culture) leh hnam lam danglam tak khawvelin min hriatpuina ni a ni” tiin a lawmawmzia thu a sawi.

He certificate ah hian ‘The largest bamboo dance was achieved by the people of Mizoram in Aizawl, Mizoram, India, on 12 March 2010’ tih a in ziak a ni.

BRANCH COMMITTEE NEIH A NI

Chanmari West March 7: Ni 2.3.2010(Thawhleh) zan khan Branch Executive Committee Pu C.Sangpuia CH Section te inah neih a ni.

Chanmari West Branch YMA executive committee chu ni 2/3/10 (Thawhleh)zan khan Pu T. Ngurkhuma, President kaihhruaina in neih a ni. Hetah hian memberte an kal tha hle. Thurel tlangpuite chu a hnuaia mi ang hi a ni:

REPORT :

Section Member Life Member YMA AW YMA Chanchinbu

Chawngbawla 553 25 184 10

Khuangchera 509 21 171 24

Neuva 369 19 131 12

Taitesena 438 34 213 27

Vanapa 545 26 192 16

TOTAL 2414 125 891 69

Section hrang hrang atanga Chhiatni Fund Category A leh B thawh turte:

Section Category A Category B TOTAL

Chawngbawla 196 (85.96%) 32 (14.04%) 228

Khuangchera 200 (83.33%) 40 (16.67%) 240

Neuva 142 (80.68%) 34 (19.32%) 176

Taitesena 252 (83.72%) 49 (16.28%) 301

Vanapa 249 (98.03%) 5 (1.97%) 254

TOTAL 1039 160 1199

THURELTE :

Section leh Sub-Committee :

Section hrang hrang tena an rawn dil Section Bungraw lei leh siam chungchang te leh hmalakna tur hrang hrang te Branch Executive chuan remtih a pui bawk a ni. Neuva Section in an Section Bungraw In bul Retaining wall siam Sorkar-a dil nise an tih leh Khuangchera Section ten an bungraw In sak mek hmalak na ah Branch te hma lakpui tura an ngenna chu theihtawpa hmalakpui nise tih a ni.

Tin, Sub-Committee hrang hrang heng Kumpuan, Thlanmual leh Preperty Sub-Committee te hnen atangin kumin 2010 chhunga hmalakna tur point hrang hrang an rel chu chu Committee ah pharh a ni a, committee chuan tha a tih puiin, a hlawhtlin ngei pawh a beisei a ni.

Secretary Property Sub-Committee hnen atanga kumin 2010 chhunga hmalakna tur an rawn duan thenkhat chu hetiang hian pawm a ni.

a) Mitthi lumen zana hman tur atan Keyboard neih dan ngaihtuah nise.

b) Welcome Board siam an rawn dil chu remtih sak niin, a tul anga Sub-Committee te lo buaipui tura tih a ni. Hmanraw hman tur thenkhat atan YMA Zawlbuk a YMA Stage hlui thirte lo hmanga siam zawh a nih hunah Section te mahni section theuh ah tlawnmgaia lo tar tura tih a ni.

Thisen pek :

YMA Platinum Jubilee lawmna chikhat atan March 2010 chhunga Thisen pek tura ruahman chu remchan zawkna avangin June thla chawhma lamah thisen pek hi neih nise tih a rel a ni. YMA member te he hun atan hian lo inbuatsaih theuh turin Committee chuan a ngen nghal bawk.

YMA Tounament :

YMA Platinum Jubilee lawmna pakhat a tan Central YMA in Ni 13.4.2010 atanga Football leh Basketball Tounament a buatsaih turah keini Branch YMA pawh tel ve ngei nise tih a rel. He tournament ah hian vengchhung players mi tupawh ‘Ruihtheih thil ti lo’ te tel theih a ni dawn a, tel tum te chu Ni 7.3.2010 (Pathianni) aia tlai lovah Branch Secretary Pu R.L.Thanhnuna hnenah hming pek luh theih a ni. Player tel tur an awm dan a zirin tuldang chu la ngaihtuah zawm tura rel a ni.

‘YMA PARK - CHANMARI WEST ROHLU’

Chanmari West February 28:

Joint committee (YMA, V/C, Chanmari, Chanmari West, Zarkawt) thuneihna in a lo pek angin Chanmari West Branch YMA chuan he kan thlanmual hlui hi, ‘YMA Park’ tih hming chawiin a theih tawpin a enkawl mek a ni.

YMA hruaitu hmasa te memberte, thawhrim leh tumruhna, taimakna azarah Chanmari West Branch YMA chuan veng dang te’n an neih ve loh, hmun nuam tak, chawlh hahdam na’n leh thianza ho ti ti khawchang vawrh a hunawl hman thatna atana tha fahran mai a buatsaih mek a, thang leh thar zel te tan a chhuantlak anih theih nan ngaihtuahna tha leh zung leh sum leh pai seng in hma a la mek zel a ni.

He YMA Park hi a pui a pang alian a te, a duh apiang te tana chawlh hahdamna leh intihhlimna atan te ruahman a ni a, ruitheih thil tihna atan leh bengchheng siamna hmun atana ruahman a ni lo tih hi kan hriat tan tur a ni awm e. Zalen taka a duh apiang te’n an hman theihna turin thil thalo titu te lakah leh a hmunhma vawn fai kawngah inhrilh nawn ngai lovin mitin mawhphurhna a ni tih kan hriat a tha awm e.

Thutna leh chawlh hahdamna kan siam chhun te hi a nihna ang taka hman hi mitin mawhphurna a ni.Mi inphal te’n an hmangaih kal tate hriatrengna thlan hmun leh ram vantlang tana an pek te hi an inphalna leh an inpekna rilru hrerenga dimdawi tak leh thianghlim taka vawn hi a petute kan rulh let theihna pawimawh tak a ni. YMA Park hi kan veng tan chuan ‘ROHLU’ a ni a chuvangin mimal hamthatna leh remchanna um a dimdawi lo lek leh vantlang kalna dal a lirthei dahfo te hi a mawi ber awm love.

YMA Park hian kan veng a cheimawi a, vengdangte pawhina chawlh hahdamna atana an rawn hman theihna turin keini a veng neitu, a te ber atanga a lian ber thlengin kan kova innghat a ni a, kan zavaia mawhphurhna a ni tih hi i hre tlang vek ang u.

‘WINTER SPORTS 2010’ NEIH A NI DAWN

Chanmari West February 21: Chanmari West vengchhunga infiammite tana thu lawmawm tak ‘Winter Sport 2010’ chu Chanmari West Sporting Club buatsaihin neih a ni dawn ta. Winter Sport hi Ni 26/2/10 (Zirtawp) atanga tan tur a ni a, lawmman pawh tha tawk tak Sporting Club hian a buatsaih dawn a ni. "Winter Sport 2010" bul tanna’n a hnuaia mi ang hian infiamna neih tur a ni.

1) Ni 26-27/02/2010 atangin Badminton Competition Chanmari West Indoor Stadium-ah neih a ni dawn a, Badminton Competitionah hian ramri a awm hran lova vengchhung mi a duh apiangte chu tel theih a niin a in kawp theih a ni. Category hrang hrang hetiangin Men’s Single, Double (35 below & above), Under-14 ah te then a ni thung.

Entry fee: Under-14 Rs.10/-

Men’s Single Rs.50/-

Double (35 below & above) Rs.100/- (per team)

Entry fee hi ni 24.Feb.2010 ral hma ngeiin Pu Lalliansanga(Malal-a) hnenah pek tur a ni.

2) Ni 6/3/2010 (Inrinni) ah khian Chanmari Basketball Court ah Basketball tournament neih a ni dawn a, YMA Section ramri ringin team an siam phal a ni a, mahni section chhungah chauh playerte tel theih a ni ang.Entry fee Rs.100 per team,entry fee hi V-sec, Ch-sec, N-sec chhunga team tel tur te chuan Pu F. Lalhmingmawia (CH) hnenah pek tur a ni a, T-sec leh K-sec chhunga team tel tumte chuan Pu Lalchhuanliana (T) hnenah entry fee pek tur a ni.Entry fee hi ni 4/3/2010 (Ninga) ral hmain pek tur a ni.

3) Ni 6/3/2010 (Inrinni) ah Table Tennis tournament Indoor Stadiumah neih tur a ni.Table Tennis tournamentah hian ramri a awm hran lova vengchhung mi a duh apiangte chu tel theih a ni. Category hrang hrang hetiangin Single (Mens & Womens Open), Under-19, Under-14 ah te then a ni thung.

Entry fee: Single (Mens & Womens Open) Rs.20/-

Under-19 Rs.10/-

Under-14 Rs.10/-

Entry fee hi ni 4/03/2010 (Ninga) ral hma ngeiin Pu Lalliansanga (Malal-a) hnenah pek tur a ni.

CHANMARI WEST BRANCH YMA EXECUTIVE COMMITTEE VAWI 2-NA NEIH ANI

Chanmari West February 14: Kum 2010 chhunga Chanmari West Branch Executive committee vawi 2 na chu ni 11/2/10 (Ninga) zan khan Pu T. Ngurkhuma President inah neih a ni.

Chanmari West Branch YMA executive committee vawi 2na chu ni 11/2/10 (Ninga) khan Pu T. Ngurkhuma, President inah neih a ni. Hetah hian memberte an kal tha hle. Thurel tlangpuite chu a hnuaia mi ang hi a ni:

1. Member boral ral chungchang: Kan Branch YMA member boral an awmin Branch hmingin ral loh nise.

2. YMA hruaitu boral thlan siam: YMA hruaitu boral an awma an thlan YMA in kan siam thin chu kumin 2010 hi chuan siam tawh loh nise tih a ni. Tin, hruaitu (Branch, section, sub-committee) boral an lo awm palh anih chuan a kuang chungah Branch YMA hmingin pangpar (Rs. 300/- man aia sang lo) dah nise tih a ni.

3. YMA Dan Bu (2009 Revision) chu Branch leh Sectionte kawl turin bu 6 lei a ni a, section tinah sem nghal a ni.

4. Section Budget 2010: Kum 2010 chhunga sectionte budget tur sawiho a ni a, Rs 4200/- nise tih a ni.

5. Section inelna: Branch YMA hmalakna hrang hrang, section wise a inelna (inchhiar etc.), a kum 2009 a kan lo neih tawh ang kha kumin 2010 pawh hian neih leh nise tih a ni a hetiang hian:

a) Thlanlaih b) Mitthi lumen (Tlaivar)

c) Khawhar lenpui d) Branch huap hnatlang

e) Branch huaihawt meeting

Tin, section activities hengah hian record siama inelna atan hman leh nise, lawmman pawh kumtawpah siam nise tih ani.

a) Chhiatni fund khawn b) YMA Aw man khawn

c) YMA chanchinbu lak d) Section bik faina hnatlang neihzat

e) Tanpuina semchhuah

6. Chhiatni fund category: Chhiatni fund category A a dahte hi a ranglama khawn tan nghal nise, khawn hmuh ang angte section te’n kawl rei lovin Branch Finance Secretary hnenah thehluh zel tur a ni e.

7. Account Training: Section hrang hrang sum enkawltute tan Account training hun remchangah neih nise tih a ni.

8. YMA Life member: Section hrang hrangah YMA life member dil duh an awm chuan section te’n a tul angin hma lo la se, a hlawma dilna Central YMA-ah thlen nise tih a ni.

Tin YMA Platinum Jubillee lawmna tur atana CYMA in Branch tih tur chi hrang hrang point 7 a rawn hriattirna chu hetiang hian rel a ni:

a) Faina chungchangah kumin 2010 chhung hian Branch YMA pum huapin thla li(4) dan zelah faina hnatlang neih thin nise. Tin, chhungkaw tinte hnenah in leh a vel vawngfai tura ngenna lehkha pek vek nise. Tin ui leh ar enkawl, vawk in rimchhia, septic tank thalo leh thildangah Branch YMA hminga hmalak nise.

b) Kan vengchhunga harsate tanpuina a tam thei ang ber neih tum nise, tanpuina sem ang ang chu Jubilee puala kal tir vek nise.

c) Kan vengchhunga chhungkaw harsa, inhmun nei, mahni a sa theilo sak sak tur an awm chuan kumin 2010 chhung hian sak sak ngei nise.

d) Mi mangang leh chanhaite tanpuina atan kumin march thla chhung hian damdawi inah thisen pek nise.

e) YMA parkah Platinum Jubilee lungphun nise.

f) Ni 14/6/10 (Thawhtan) zan dar 9.00 hian YMA Park-ah Jubilee Mei det nise.

g) YMA Park-a thingphunte YMA rawng hnawih nise.

h) Hruaitu hlui leh chawimawi tlakte chawimawi chu la ngaihtuah leh nise tih a ni.

KUM 2010 CHHUNGA CHANMARI WEST CHHIATNI KAIHHRUAINA YMA IN A DUANG

Chanmari West February 7: Chanmari ‘W’ Br YMA Executive committee ni 26/1/10 zana neih chuan kum 2010 chhunga chhiatni bika khawtlang mipuite felfai leh mumal zawka kan inkaihhruaina tur ahnuaia mi ang hian a duang chhuak:

1. CHHIATNI FUND:

a) Chanmari West V/C huam chhunga awm, chhungtin hnenah Chhiatni Fund hi hlawm hnih (Category A leh B) in khawn nise, Category A : Rs. 200/- (Zahnih ) Category B: Rs. 100/- (za ) khawn a ni ang.

b) Chhiatni Fund hian hnamdang (state pawn lam) mite a huam tel a, an pe ve ngei tur ani.

c) Chhiatni Fund hi ramdang mi (foreigner) leh pem lehkha neilo te chu khawn loh tur ani a, chhiat an lo tawk palh a nih pawh in, a chhawr tu /in luah tu/anmahni an in buaipui ang.

d) Chhiatni Fund hian a daih lo anih chuan a tul dan ang zelin khawn nawn mai ni se.

e) Chhiatni Fund hi Vengchhung leh pawna chhiat tawhna dangah hman theih ani ang.

2. ZUALKO :

a) Chhiat tawk, mitthi awm hriatchian ngei a nih hnuah Branch Y.M.A OB te hriattir a, a tul anga Public Information Mike hmang a vantlang hriattir vat ni se.

b) Zualko kal hi tlangvalte mawhphurh na liau liau ani a, zualko form- a ziahluh anih hnuah intirh thin nise.

3. BUHFAI KHAWN :

Vengchhungah chhiat tawk (mitthi) an awmin Section hruaitute kaihhruaina in chhungtinah Buhfai no khat khawn tur ani a. Buhfai khawn hi nulate mawhphurhna liau liau ani.

4. THINGPUI LEH A HMEH:

a) Vengchhungah chhiat tawk (Mitthi) an awmin, chhiat tawh atanga thingpui lumna leh tlangval thlanlaih hun thleng thingpui leh a hmeh (chhang) leina YMA in a tum ang.

b) Lumen ngaia chhiat tawk (Mitthi) an awm in, zanlai ah chhang sem tel nise.

5. RUANG NGHAH:

a) Vengchhung mi hmun hrana mitthi an awm a, khawvar hmaa ruang lo thleng lo tur anga a lan chuan tlaivara lo nghah ngai lova ngaih a ni a. Chhiat tawk chhungkua te’n tlangval tlawmngai riak tur insiam nise.

b) Ruang lo thlen hma a thingpui leh a bawlhlo senso chu mitthi chhung te tum tur a ni ang.

6. RUANGLAK:

Vengchhung mi, tupawhin hmun hran a tanga ruang a lak dawn in VC leh YMA hruaitute nen inrawn hmasak thin nise.

7. RUANGCHHUAK:

a) Vengchhung emaw hmun hran atanga ruang lak awm ngawih ngawih laka thawn chhuah tur a awm chuan ruang la tur ten Branch OB te rawn hmasak thin nise.

b) Kuang siamsak a tul chuan YMA in siamsak nise.

c) Ruang latu in a tul a tih chuan YMA buaipuiin thingpui lum ani ang a, a senso erawh chhiat tawk ten an tum ang.

d) Ruang chhuak tur a awm chuan a tul angin hruaitute inhriattir nise.

8. RUANG SAWNGBAWL DAN TUR LEH KUANG SIAM:

a) Mitthi an awm in section hruaitute kaihhruaina in a rang lama kuang siam thin nise. Mitthi chhungte rawn chungin a rang lama kuanga dah nise.

b) Mihring hriselna a that zawk nan a theih chin chinah ruang khawih tuten kutkawr bun thin nise.

c) A tlem thei ang ber kuang thlalak pui nise.

d) Hospital emaw hmun danga boral emaw sarang (polyethene) a mitthi ruang thun (packed) emaw a nih chuan mitthi ruang hi khawih danglam (phelh/ hawn) loh hram nise.

e) Pawl emaw mimalin emaw kuang an tum dawn a nih chuan a pawisa faiin Rs 2000/-YMA an pe ang a, kuang siam erawh chu YMA in a tum ang.

f) Sakhuana leh eng emaw bik thil ah lo chuan YMA kuang siam chei danglam loh nise.

g) Remchang zawk a nih chuan kuang hunna (dawhkan te ) hman thin nise.

h) Tul bikah chauh kuang tuam (lining) nan Polyethene hman nise.

9.THLAN LAIH LEH MITTHI /PHUM :

a) Aizawl khawpui chhunga zing dar 10:00 hmalama thi chu a ni la la in vui nise, zing dar 10:00 hnu lama thi chu lumen tur a ni.

b) Zingkarah thlan laih thin nise,a tul anih chuan YMA hruaituten an ti danglam thei ang.

c) Mitthi vui hun : Lumen ngaiah chhun dar 12:00. Lumen ngai lovah chawhnu dar1:00

d) Mitthi vui nan hian a rem chan dan a zirin, lirthei Bus/Medium Vehicle pakhat hman nise.

10.HLAMZUIH:

a) Nausen thla thum (Ni 90) tling lo a thih chuan hlamzuih a ngaih a ni a,Zualko kal,buhfai khawn, khawhar in riah etc.te hi YMA in tih loh nise.

b) Kuang atan YMA thingphel hman theih ani.

c) Thlanmual a Hlamzuih inphumna tur hmun bik siamah chauh hlamzuiha thite phum nise.

11. YMA BUNGRUA :

a) Chhiat tawk an awmin Gas Cylinder bur 1 Branch YMA in a tum ang.

b) YMA bungruate hi zah leh felfai taka enkawl nise.

c) Bungraw senghawi leh chinfel hi tlangval inriakte leh section hruaitute mawhphurhna ani.

d) Mitthi in-ah PA Set fit nghal thin nise. YMA hun zan thum thleng mike hman theih tur Section in buatsaih thin nise. Lumen dar 12:00 hnulamah chuan inchhungah chauh Mike tih rik nise.

12. KHAWHAR LENPUI LEH MITTHI RAL :

a) Khawhar lenpui hi lumen ngaiah lumen zan chhiar telin zan thum leh lumen ngai lovah ruang thlak zan atanga zan thum nise.

b) YMA zan bika khawhar lenpui hi YMA Member nula leh tlangvalte mawhphurhna mai ni lovin khawtlang nu leh pa te, mawhphurhna a nih avangin kal vek tur a infuih thin nise.

c) YMA zan bika khawhar lenpui hi Kohhran inkhawm tan hun ang zela tan tum nise, tanna hi Section hruaitute kutah awmin banna erawh chu Branch hruaitute kutah awm se.

d) YMA Member an boral chuan,YMA flag a ngul chanveah zar nise.

e) YMA zan hnihna atangin YMA ralna bawm dawh/hun a, a tling khawm chu YMA zantawpah mitthi chhungte ral nan hlan nise.

13.KHAWHAR IN RIAH LEH THLAN SIAM:

a) Tlangval tlawmngaiten khawhar an riahpui hi a nawlpui chuan zan thum nise. Tlawmngai fal bik an awm a nih pawhin kar khat aia rei riah loh nise.

b) Khawhar inriakte leh thlan siamtute khawhar chungten chawhlui kilpui loh nise.

c) Thlan siamtuten thlanmual bungrua a tul anga hmantheih nise.

14.KHAIKHAWMNA

Chhiatni kaihhruaina a ziahlan loh leh engemaw tul bik thil chu hruaituten ngaihtuah chawp mai nise.