MUNICIPAL ELECTORAL ROLL HEARING NEIH A NI
Chanmari West July 18: Chanmari West huam chhunga Municipal inthlan lo awm tur a vote la neilo neih diltute ngaihthlakna hun (Hearing) chu ni 16/7/210 (Zirtawp) khan Indoor Stadiumah neih a ni.
Chanmari West veng hi Municipal inthlan lo awm turah hian Chanmari West Ward hnuaiah a awm a, he ward ah hian Chanmari West, Hunthar leh Edentharte an awm a ni. Tunah hian Chanmari West ward hi Municipal ward zinga vote nei tlemna ber a ni hrih.
Hearing hi zing dar 10 atang chawhnu dar 1 thleng neih a niin sawrkar lam tirhin Election Office (DC Office) atangin Assistant Municipal Electoral Registration Officer (AMERO) Pi H. Rochungnungi a lokal a, veng chhunga NGO hrang hrangte leh Political Party tin atanga aiawh te’n an tawi awm. He hunah hian mi 400 bawr vel vote neih dil thar an awmin, hun chep tak karah duhthusam a tihfel a ni lo niin report kan dawng.
Zirtawp zan vek hian NGO leh Political party tin a hruaitute’n Emergency meeting an nei nghal a, Hearing neih chungchangah hian a kalpui danah an lungawi thei lo a ni. Nilenga neih tur ni a ngaih si zing dar 10 atang chawhnu dar 1thleng chauh neihpui an ni a, hemi chhung hian ngaihthlak zawh hman a ni lova chumi chunga khar a ni hian voters chungchangah felhlel a awm theih avangin hearing hi neih that leh turin sawrkarah dilna lehkha thehluh nise tiin an rel.
ZU IN PHALNA NEI MI 251
Chanmari West July 11: Kumpuan Sub-Commt. leh Chawngbawla Section commt joint meeting ni 24.6.2010 a neih in a lo rel tawh angin ni 8/7/10 (Ninga) zan khan‘Khawtlang nun siam that’ zirhona Public meeting chu YMA Park-ah neih a ni.He inkhawm hi Kumpuan committee Chairman Pu R. Lalhmachhuana chuan kaihruaiin “Mizoramah hian sawrkar phalna a zu in thei chu mipa 246 leh hmeichhia 5 anvaiin mi 251 chiah an ni, chuti a nih laiin zu in thin hi kan va tam si em, khawlaiah rui buai a bengchheng siam kan tam si hian khawtlang nunphung kaihhruaina hi tihmakmawh a ni” a ti. He inkhawmah hian CH section a nu leh pa an kal thahnem hle.
Pu K. Lalzuithanga’n thupui sawiin sawihona hun thiam takin a hawng a, kalkhawmte’n hlawkthlak an ti hle. Sawihotute zingah Pu Vanlalhnema’n “Kan khawtlangah hmeichhe pawngsual leh mipat hmeichhiatna hman dikloh tam ta hi kan nula te fengchhing lutuk vangte pawh a niin school naupang hmeichhiate hian kekawr ha ve tawh se” a tih chuan lawm a hlawh hle. Pu Vanlalsawma’n sawihona atangin khawhar in kal chungchanga nu leh pate mawhphurhnan kan hlamchhiah tan ta leh CH section thalaite inpek lehzual a ngaihna sawiin kalkhawmte a fuih bawk.
Sawiho naah hian thutha tak tak ngaihthlak a ni a, Pu P.C.Lalrinawma chuan “Nu leh pa zah hi a pawimawh a, eng dinhmunah pawh ding mah ila min hlangkaitu nu leh pate hi tluk theih an ni lo, chuvangin duat taka enkawl a zah an tul a ni “ a ti. Tin, Tv H.Lalrinmawia pawhin “Naupang kum 15 hnuailam zan leng nasa lutuk pawh hi nu leh pate mawhphurhna a ni in, kan fa te kan zilh ngam tur a ni a, tunlaiin mahni fa te hlau zawk nu leh pa kan tam ta hian kan khawtlang nun a tibuai a ni” a ti. Pu K.Lalramhlunan kan sum lak luh dan kan in hriat tawn dan te, nuai 5 in a thawh theih chin te sawiin, “Ei ru te hi hmusit ngam ila, Kohhran pawh hian hetiang mi te hi hre ngam se” ati bawk. Tin, Pu K.Lalthakima pawhin, “YMA ten faina kan ngaipawimawh in faina hnatlang te pawh kan nei thin a, tin, bawlhhlawh bawm te pawh kawi tin deuh thawah khai a niin, heng te hi hmang tangkai thin ila, nu leh pa te pawhin kan fa te faina chungchang zirtir nasat a pawimawh a ni” a ti. He inhmuhkhawmah hian CWBYMA Office bearer te an fakawm hle, ei in zawng zawng an buaipuiin, rorel tu mai nilovin an mahni in hmahruaia kalkhawm mipuite ei in an hrai hi an entawntlak hle a ni.
PUBLIC MEETING
Chanmari West July 4 : Kumpuan Sub-Commt. leh Chawngbawla Section commt joint meeting ni 24.6.2010 a neih chuan Ch-Section huam chhungah Kumin YMA Kumpuan ‘ Khawtlang nun siam that’ zirhona Public meeting neih tum a ni.Kan khawtlang inrelbawlna leh khawtlang nun han thlir hian nu leh pa te nena he khawtlang nun siam that hi zirho a hun hle tawh reng a ni. Kan vengin chhiat kan han tawh chang te hian YMA hruaitu lam thlirna a tang chuan a beidawn thlak rum rum chang a awm fo thin, thlanlai tur thalai awm ta mang lote, Ai a upa zahna lo tlahniam ta em em mai te, kan mizo hawihhawmna kan tlakchham zia te, mitthi lumen zana tlaivar peih thalai kan tlem tawh zia te hi hmuhhmaih chi a ni ta lo. kan khawtlang hi zu leh ruihhlo in a run mek a, tuna kan thalai tamtak he ruihhlo bawih a tang mek te hi chhanchhuah an ngai a, an mahni in he bawih atang hian an tal chhuak thiam lova, nu leh pa leh khawtlang tangrual hian a tlai lutuk hma hian kan theihpatawp kan chhuah a hun ta ani lawm ni. mipat hmeichhiatna lama kan thalai te in hman nasat zia te, mithiam te leh zirchhiang tute sawi ang hi a nih phei chuan Chanmari West nih pawh zahthlak khawp a ni ta e. He kan veng Chanmari West siam tha a, veng entawn tlaka siam tur hian tu innge mawhphur chuang ang le, nu leh pa leh YMA thalai zawng zawng te kan vaia mawh hi a ni dawn lawm ni? YMA in bul an tum a, a mawh ah ngaiin tan an la a, hei hi nu leh pa te pawh hian inthiarfihlim san lova, theipatawpa tan kan lo lak ve a ngai tawh a ni hi, kan tanrual thiam loh zawngin kan khawtlang hian kan la tuar ngei ang, chutih hunah zawng a tlai tawh si ang a, chhung tinhi mipat hmeichhiatna hman khawloh leh zu leh ruihhlo a vang hian kan la rum ngei ang. Hawh u chu hun a thlen hma ngei hian kan theihtawp chhuah ila, tuna Kumpuan Comt. leh Section Comt. in zirhona hun a buatsaih tur ah hian YMA member zawng zawng leh nu leh pa te kan zavaiin i kal hram ang u.
Hetiang programme hi Section dangah pawh Section Commt. te nen tangrual a neih zel tum a ni
Programme
A hmun : YMA Park.
Chairman : Pu R.Lalhmachhuana. Chairman Kumpuan Sub-Committee.
Power point Presentation : Pu K.Lalzuithanga, Asst. Secretary
(He mi hunah hian Discussion pawh neih tel tum a ni)
Refreshment Refreshment Refreshment
Banna : Chairman kutah
(He mi zan hian World Cup Semi- final pawh Section lam hmalakna in
Big Screen a en ho tum a ni)
CHANMARI WEST BIAL VOTERS TLEM BER
Chanmari West June 27: Ni 25/6/10 (Zirtawpni) khan D.C. Office-ah Aizawl Bawrhsap Pu C. Thanchhuma hovin Aizawl Municipal Inthlanna tur Electoral Roll enfel turin NGO, Pol.Party aiawhte leh ERO leh AERO te, Officer pawimawhte an thukhawm.
Aizawl Municipal Council Inthlanna hmasa ber tura Electoral Roll hman turah hian VC Electoral Roll chu behchhan niin MLA Electoral Roll nen a inang lo a, Municipal Inthlana Electoral Roll-a tel tur chuan VC inthlan a tel thei chin chauh, Mizorama cheng nghet, ram neitute (Mizote) chauh thun theih a ni a; Gorkhali te erawh chu kum 1950, January 26 hma lama lo awm tawhte leh an thlah kal zelte chu an tel thei a ni.
Municipal Election chungchanga hriattur te :
Draft Electoral Roll chu June 28, 2010-ah tihchhuah a ni ang;
Claims & Objection tih theih hun chhung July 1-10, 2010 a ni a,
Claim leh Objection chinfel hun atan July 12-23,2010 ruat a ni.
Siamthatna leh chhut fel hun chhung July 24- August 4,2010 ruat a ni.
August 6, 2010-ah Final Electoral Roll of Wards peihfel a ni ang.Tuna Aizawl Municipal Ward (Bial) 19-ah hian Electoral Roll-a awm 165241 niin, Ward (Bial) khata Voters tamna ber chu Ward No.18-na (Mission Veng Bial) a ni a, voters 13217 awmin tlemna ber Ward No.6-na Chanmari West Bial a ni a, voters 5771 an awm. Polling Station hi voters 500 – 1200 inkara awm tura tih a nih lain, voters 1200 aia tam awmna 16 a awm a ; 500 tlin lohna 4 a awm. Booth Area te ber PTC Sakawrtuichhun ah voters 229 chauh an awm a ni.
Tuna kan tarlan Draft Electoral Roll hi 2009-a siam a ni a, danglamna tam lutuk lo tura beisei a ni a; mahse inthunluh thar emaw, paih tur emaw sawisel duh tan hun hawn chhung hian vengtin ten uluk taka tan la theuh turin beisei an ni. Pu C. Thanchhuma chuan Political Party tinte chu a dik thei ang ber leh ram tana tha turin Sorkar tawiawm zel turin a ngen a; Party induhsakna leh inngeih lohna lam tilang hauh lova, a fel thei ang bera Roll siam tura tawiawm turin a sawm a; NGO te - YMA, MUP, MHIP ten mahni venga mite chinfel kawngah tha taka sorkar tawiawm turin a ngen nghal bawk.
Chanmari West veng a Enumerators turte chu :-
1. C.Vanlalchhuangi (Machhuangi) Part No.VI/I
2. Lalrinliana (Sir Te-a) Part No.VI/2
3. Lalrinchhana (Rina) Part No.VI/3
YMA DAY ROPUI TAKA HMAN A NI
Chanmari West June 20: YMA Platinum Jubilee (75 Years) YMA Day 2010 chu Mizoram chhung leh Mizoram pawna Mizote chenna hmunah ropui taka hman a ni. YMA Day hi Branch hrang hrang ten khawtlang tana hna tangkai thawhna Ni-ah an hmang a, Branch tam takin thisen pein, a thenin mirethei/hmeithai In an sak sak a, Thlanmual samfai, khawchhung thenfai leh intihhlimna hun atan hman a ni.
Chanmari Westah chuan Ni 15/6/2010 zingkarah YMA Buk-ah YMA Platinum Jubilee lungphun chu Pu T Ngurkhuma’n (President CWBYMA) in a hawng. Hemi ni vek tukthuan eikhamah Chanmari West middle Schoolah YMA Day vawi 75 na chu ropui taka lawm a ni. He hun hi Pu T Ngurkhuma, President in kaihhruaiin Pu R. Lalhmachhuana chuan Khawtlang nun siamthat thupui ah hmangin member kalkhawmte thu a chah. Intihhlimna hun hlimawm tak hman a ni in fiamthu thiam KC Tluanga’n he hun hi a hmanpui bawk. YMA Day denchhena hnam lam intihsiakna a pakhatna Khuangchera Section te’n Cheraw an entir chuan mipui mit a ti tlai hle. YMA Day functionah hian vengchhung zaithiam tak tak te’n hun hmangin kalkhawmte beng an ti tlai hle a ni. Refreshment, Seat arrangement, Light & Sound, Silpauline etc buaipuitu te’n hneh takin an chanvo an hlen thei bawk a ni.
He hun pawimawh takah hian Chanmari West venga mi tlawmngai, mamawhte hnena thisen vawi 10 chuang lo pe tawhte chawimawina hun hman a ni, thisen petute chu hetiangin (Bracket chhunga mi hi an thisen pek tawh zat a ni): 1. Pu PC.Lalrosanga V (10), 2. Pu VL Huma K(10), 3. Pu Zosangpuia K (10), 4. Tv Jacob Lalrinsanga N (10), 5. Pu J.Lalnangliana CH (10), 6. Pu Kawlramvela CH (10), 7. Pu Lalrinsanga T (10), 8. Pu K.Lalthakima CH (10), 9. Pu Lalbiakmawia V (11), 10. Pu Remsangliana V (11), 11. Tv Lalduhawma Hnamte V (11), 12. Pu R.Lalmalsawma V (11), 13. Pu R.Lalngilneia V (11), 14. Pu C.Lalmuankima T (11), 15. Tv H.Lalrinmawia CH (11), 16. Pu C. Lalthazuala V (11), 17. Pu Lalnunhlima Hauhnar T (12), 18. Pu R.Vanlalruata T (12), 19. Pu F.Lalhmingmawia CH (12), 20. Pu C.Lalramzauva (Azauva) CH (12), 21. Pu Vanhmingliana Sailo T (12), 22. Pu PC.Lalawmawia V (13), 23. Pu R.Lalremsiama V (14), 24. Tv Lalhmingsanga Pautu N (14), 25. Pu Lalbiaktluanga CH (15), 26. Tv H.Lalchhuanmawia K (15), 27. Pu J.Lalrova V (16), 28. Pu Lalrimtuia K (17), 29. Pu K.Lalthlanpuia CH (18), 30. Pu Lalsangzuala Hauhnar K (19), 31. Pu Lalchhandama Ralte CH (19), 32. Pu RK.Ramherliana V (21), 33. Pu Jonathana T (22), 34. Pu C.Lalsangzuala V (24), 35. Pu R.L.Thanhnuna T (24), 36. Pu R.Lalnunmawia V (26), 37. Pu RK.Rozidinga T (26).
HNAM LAM INTIHSIAK RESULT
YMA Platinum Jubilee Cultural Dance Competition 2010 chu tluang taka hman zawh a niin YMA Day ah result puan a ni, Result hi medal tally a chhut a ni. Result hetiangin:
1. Khuangchera Section (1st Sarlamkai, 2nd Cheraw) Rs. 7000/-
2. Chawngbawla Section (1st Cheraw, 4th Sarlamkai) Rs 5000/-
3. Vanapa Section (3rd Cheraw, 2nd Sarlamkai) Rs 4000/-
4. Taitesena Section leh Neuva Section Rs 3000/-
Section tinte’n Cheraw bu khat extra an nei theih vek avangin Rs 500/an dawng vek. Tin, Sarlamkai a lam hnem ber lawmman hi Taitesena Sectionin Rs 1000/- an dawng.
YMA DAY
Chanmari West June 13: June 15 (Thawhlehni) hi YMA Day a lo ni dawn leh ta reng mai. Kumin hi YMA din cham kum 75 na a lo ni ve leh reng ta bawk nen Chanmari West Branch pawhin ropui taka lawm tumin ruahmanna a siam a hun hman dan tur pawh hetiangin duan lawk a ni :
1. Ni 14.6.2010(Thawhtan) Zan dar 9:00-ah Branch Secretary Pu R.L.Thanhnuna te In chung zawlah Jubilee mei det tur a ni a, tin, hemi hunah hian Jubilee dar vawi 75 vuak tur a ni. YMA Member te’n ngaihpawimawh a kal a tha khawp mai. Tin dar vaw tura ruatte phei chuan a theihhram chuan pha lo se a tha ngawt mai.Taitesena Section te’n hemi huna kalkhawmte thingpui an buatsaih sak dawn a ni.
2. Ni 15.6.2010(Thawhleh) zing dar 7:00-ah YMA Buk-ah Jubilee lungphun hawnna neih tur a ni a, hetah hian Branch Executive Member,Section Committee,Sub-Committee leh YMA Aw Editorial Board te chu kal ngei tura beisei kan ni. Lungphun hi kan Branch President Pu T.Ngurkhuma’n hawnna a nei dawn a ni. Hemi hunah hian theitui in ho tur a ni in Taitesena Section te’n an buaipui dawn a ni.
3. Ni 15.6.2010(Thawhleh) Dar 10:30 a.m hian Middle School-ah YMA Day lawmna pui ber neih tur a ni a, YMA member leh nu leh pa te chuan ngaihpawimawh a tel vek a tha awm e. Tin, thisen vawi 10 chin lo pe tawhte chawimawina neih tur a nih avangin, chawimawina dawng turte chu kal ngei ngei thei se a lawmawm ngawt ang.
YMA DAY PROGRAMME
A hun : Ni 15.6.2010 (Thawhleh) Dar 10:00 am
A hmun : Chanmari West Middle School.
Chairman : Pu T.Ngurkhuma, President.
Hunserh : Tv Zairemmawia, Executive Member
Branch Report : Pu R.L.Thanhnuna, Secretary
Solo : Nl Jenny V.L.Dinpuii,Neuva Section
Thupui Sawi : Khawtlang Nun Siamthat
Sawitu : Pu R.Lalhmachhuana, Fin.Secretary
Solo : Nl Zorinpuii, Khuangchera Section
Thisen pe te
Chawimawina : Pu Lalthuamluaia,Vice.President.
Extempore Speech : Pu C.Lalzarliana, Treasurer
Hnamlam result puan
leh lawmman sem : Cultural Dance Org. Coommittee
Solo : Tv C.Zonunmawia,CH Section
Fiamthu : Tv K.C.Tluanga,Neuva Section
Lawmthu sawi : Pu K.Darthantluanga,Asst.Secretary
Banna : Chairman kut-ah
Cheraw : Lawmman 1 na la atangin
REFRESHMENT
HNAM LAM INTIHSIAK NEIH A NI
‘YMA Platinum Jubillee Cultural Dance Competition 2010’ chu Ni 12/6/10 (Inrinni) khan neih a ni. He intihsiak hi Tv. V. Biaknghinglova’n kaihhruaiin Art & Culture Joint Director Pu Ngurbiaka chu khuallian a ni. He intihsiakna ah hian Seat Arrangement Neuva section te’n buaipuiin Property Sub-comm. in Light & Sound System an buaipui a, refreshment tuihnai tak Khuangchera section te’n an buaipui bawk a ni. Result hi YMA Day a puan tura ruahman a ni. Lawmman hi 1 na - Rs 7000/-, 2 na Rs 5000/-, 3 na Rs 4000/-, Participation Prize Rs 3000/- (section hnih tan), Cheraw bonus Rs 500/- theuh leh sarlamkai entir tam ber Rs 1000/ te a ni.
Kum thar CHANMARI WEST SPORTING CLUB Committee peng hruaitu thar
Chanmari West June 6: Kum 2010 Season chhung hian Sub-Committee Pathum Football Sub- Committee, Volleyball Sub-committee, Badminton Sub-Committee te siam a nih bakah Game displine dangah Manager leh Asst. Manager te ruat a ni.
Football Sub- Committee
Chairman : Pu RK.Rozidinga
Vice Chairman : Pu H.Vanlalvena
Secretary : Pu Lalchhuanliana
Treasurer : Tv Zohmingliana Tlau
Fin.Secretary : Pu John Zosangliana
Volleyball Sub-Committee
Chairman : Pu H.Lalramhluna
Vice Chairman : Pu C.Lalthanzuala
Secretary : Tv Israela
Treasurer : Dr. Lalramliana
Fin.Secretary : Pu F.Lalhmingmawia
Athletic
Manager : Pu Lalramhluna
Asst. Manager :
Tv. Zohmingliana Tlau
Pu Gordon Zosangliana
Pu C.Vanlalhruaia
Basketball & Cricket
Manager : Pu R.Lalsangzuala
Asst. Manager :
Tv. Lalnunhlima
Pu F.Lalhmingmawia
Tv. Henry Lalremruatpuia
Pu Vanlalhluta
Badminton Sub-Committee
Chairman : Pu Lalbiakhlua
Vice Chairman : Pu RK.Ramherliana
Secretary : Pu Vanlalhluta
Treasurer : Pu Lalliansanga
Fin.Secretary : Pu Lalchhanhima
Table Tennis
Manager : Pu RK.Ramherliana
Asst. Manager : Tv. Lalfakzuala
Pu Vanlalhruaia
Contact Sports
Manager : Pu Zonunsanga
Asst. Manager : Pu H.Laltanpuia
Pu Zoramthara
Tv Lalnunzawma
Kum 2010 chhunga Sporting Club member tur Club hruaituten an rawn la leh dawn a , kum 8 chhin chunglam a duh a piang tan Club member a nih theih ang a, Membership fee hi Rs. 5/-a ni.
Basketball Player te Pu R.Lalsangzuala hnenah registration a tih theih a, Player te a rang lama tih fel tur a ngen an ni. Football Player 3rd leh 2nd Div te pawh Player registration Pu Lalchhuanliana hnenah tih theih a ni bawk e.
Hnam lam intihsiaka tel turte hriattur pawimawh
Chanmari West Branch leh Zofa Cultural Club tangkawpin an buaipui ‘YMA PLATINUM JUBILEE CULTURAL DANCE COMPETITION 2010’ chu Ni 12/6/10 hian chaw hma dar 10-ah neih a ni dawn. Hemi huna section tina lam tur te leh hruaitute tana hriattur pawimawh tak tak a awm a, chungte chu:
1. Cheraw ah hian minute bituk a awm lovang
2. Sarlamkai hi minute 8 chhunga khunglen tur a ni.
3. Section tin lam hun tur hi a hmunah pawh chawp a ni ang.
4. Point belhkhawma a sang ber pakhatna a puan a ni ang.
Endiktu turte chu Art & Culture Department a instructor/instructress te an ni ang. Engemaw harsatna (thubuai / hlabuai) awm palh thei a ni, chutiang a thleng a nih chuan Technical Committee in thutawp a siam ang.
HNAM LAM INTIHSIAKNA TUR ZIR MEK A NI
Chanmari West May 23: YMA Platinum Jubilee denchhena Section wise hnamlam intihsiak ‘YMA PLATINUM JUBILEE CULTURAL DANCE COMPETITION 2010’ inbuatsaihna chu ngawrh taka kalpui mek a ni. He competition hi Ni. 12/6/10 a neih tur a niin ‘Sarlamkai’ leh ‘Cheraw’ hmangin Chanmari West Indoorah intihsiak tura ruahman a ni.
He inbuatsaihna ah hian Section tin hruaitute an fakawm hle, thahnemngai taka memberte khawrh chhuakin zantin lam hi zir a ni. Section tinah hnam lam hi Zofa Cultural Club (ZCC) member te’n an zirtir thin. Hnam lam zir hi thenawm khawveng hnaite tan bengchhengin ninawm viau mahse Mizo hnam hmakhua a nih avangin tuar hram hram a tha hle a ni.
KUMPUAN COMMITTEE KAMCHHUAK
1. YMA Kumpuan 'Khawtlang nun siamthat' bawhzui nan Section tinah Section Committee te nen tlangtlangin Section chhung YMA member, Nu leh Pa te nen Khawtlang nun siamthat chungchang zir ho tum a ni a, he programme hi June - August thla chhunga neih zawh hman tum a ni.
2. Kumpuan kaihhruaina in a sawi angin Do ngai te Zu leh Ruihhlo Veng chhunga a awm a rem ti lova, zuruih buai leh khawlai a bengchhen te, midang tana hnawksaka awm te hi khawtlang dan kalh tlat a nih avangin theihtawpin a do zel dawn a, Tin, heng do ngai do kawng ah hian Section tin te thahnemngai leh zuala khawtlang tan a ni tih hre renga hma la zel turin a ngen tak meuh a ni.
3. Kumpuan Committee hian Zu leh Ruihhlo lama harsatna neiten chhanchhuahna an chan theih nan theihtawpa hmalak a tum a, helam a harsatna neite chuan Kumpuan Committee te hnenah engtiklai pawhin a thlen theih a, chumi kawng ah chuan YMA member te leh Veng chhung Nu leh Pa te pawhin thahnemngai taka an tawiawm tlat a beisei a ni.
4. YMA member, thalai zawng zawng te kan mizo tlawmngaihna / Zonun zemawi chhawmnung zel tur leh tanpui ngaite tanpuina kawngah pawh nasa leh zuala taima turin a ngen a, helam hawi inzirtirna pawh Section tina neih turin hma a la mek a ni.
(Kumpuan Committee member zawng zawng leh Branch OB te zanin dar 8:00 ah Kumpuan duty neih tur a ni a, YMA Parkah in nghahkhawm tur a ni ang).
BRANCH COMMITTEE NEIH A NI
Chanmari West May 23: Ni 18/5/10 zan khan Branch Executive Committee vawi 7na chu Pu HV Lalthavela K Section te inah neih a ni.
He committeeah hian committe hmasa thurel bawhzui dan Secretary hnen atangin ngaihthlak a niin sawizui nghal a ni:
1) Kumpuan Hawnna inkhawmah Branch YMA a nihna nei zawng zawngte leh vengchhung a chhungkaw tin aiawhzo tur kalkhawm tura inngen chu kalkhawm that tawk loh thu ngaihthlak a ni. He inkhawma thupui hawngtu thusawi chu Video copy siam a ni a, a duh apiang lei theih turin Kumpuan subcommittee te’n an buaipui dawn a ni.
2) UD & PA Deptt in BPL Survey tura an rawn ngenna chu sectionte hmalakna zarah zawh tahwkhat a ni.
3) Branch YMA Guitar chu chang duh an awm chuan tihral nise, Rs 1000/- aia hniam lovin chhan tir nise tih a ni.
4) Section Wise Hnamlam intihsiakna turah ZOFA Cultural Club te’n Rs 25000 an thehchhuak chu committee chuan lawmawm a ti hle a, Branch YMA chuan Rs 10000/- thehchhuah ve nise tih a ni.
5) CYMA leh SSA thawhhona MoU No 1 in a tarlan angin, naupang sikul kairual sikul kai lo kum 6-14 inkar zawnchhuah hna chu section te’n hma lo la se ni 10/6/10 hma in Branch Secretary hnenah thehluh tum nise tih ani. Sikul kai lo zawn turah hian an hming, nu/pa hming leh kum ziahlan tur a ni.
6) YMA Platinum Jubilee denchhena ni 26 & 27/8/10 a kum 45 hnuai lam lengkhawm zai intihsaiknaah chuan tel loh mai nise tih hrih a ni, thuleh a awm a nih chuan boruak awmdan a zirn ngaihtuah nawn leh mai nise tih a ni bawk.
7) YMA Platinum Jubilee lawmna tur atan Aizawl khawchhunga Branch YMA, a thei apiangin Rs 1000/- aia tlemlo thawh tura min ngen angin Rs 1000/- thawh nise tih a ni.
8) YMA Platinum Jubilee lawmna atan mi chanhai leh mamawhtute tan ni 26/6/10 khian thisen pek nise tih a ni. Record siam tum a nih avangin section tin te’n thisen petur zawng chhuakin ni 20/6/10 aia tlai lovah Branch Secretary hnenah thehluh nise tih a ni.
9) YMA Day hman dan tur chungchang sawiho a ni a, sawihona eng atangin Branch O/B, Section Leader theuh leh Editor YMA Aw te’n lo siam rem se tih a ni. Tin, YMA Day pual hian kan vengchhunga mi harsate hnenah YMA Day Present hlan nise, present dawng turte section te’n lo zawngin hi ni 31/5/10 hmain Branch Secretary hnenah hriattir nise tih a ni.
10) YMA Park a motor park thinin harsatna a thlen chhoh mek chu sawiho a ni. Parkah hian zan riaka motor dah phal loh a nih avangin a hungna mawi hnaitak Park sub-comm te’n lo buaipui se tih a ni. Tin, sub-centre kawtah pawh motor dah phalloh a nih laiin motor dah a la ni fo chu dah a nih tawhlohna tura hma lo la turin Park sub-comm leh N-sec te hma lo la turin ngen an ni.
11) Branch YMA Plastic chair Neuva Section in Pasaltha Neuva ina dah an rawn dilna chu phal sak an ni. Tin, chhinchhiahna la awmlote pawh chhinchhiahna lo siam se tih a ni. Chair hi hmundangah hman duhna a awm a nih chuan Neuva section in hma lo la zel se tih a ni.
KUMPUAN HAWN A NI
Chanmari West May 16: Ni 14/5/10 (Zirtawp) zan khan Chanmari West Branch YMA chuan kumpuan hawnna a nei.
Central YMA kumpuan ‘Khawtlang nun siamthat’ hawnna programme CWBYMA in a hman hi Pu Lalthuamluaia Vice President CWBYMA in a kaihruai a, Nl K. Lalthanpuiin Pathian hnena he inkhawm a hlan hnuah Nl Maggie chuan thiam tak maiin ‘Tlanna mak’ hla sa in kalkhawm mipuite a awi. Kumpuan hawnna thuchah hi Pu Vanneihtluanga’n a sawi a,
Pu R. Lalhmachhuana Fin Secy CWBYMA leh Chairman, Kumpuan sub-com chuan lawmthu sawina hun a hmang. He inkhawmah hian Pu Lalthuamluaia chuan he kumpuan pawimawhzia sawiin “Mimal thawh tur bik a ni lova, keimahni theuh hi a mawhphurtu kan ni tih hi homeworkah nei theuh ang u” tiin kalkhawmte a chah. Tin, Pu T. Ngurkhuma President CWBYMA chuan ‘YMA hi zirna in pawimawh tak a ni a, zirtu leh zirtirtu kan nih vek avang hian i tang sauh sauh ang u’ a ti bawk. Kumpuan thupui sawi hawngtu Pu Vanneihtluanga chuan “Do ngai kan ramah hian a awm a, tha kan thlah ruala rawn pawng nghal zat chu RUIHHLO a ni”a ti. A sawi zel naah hmeichhiat mipat hman khawlohna ah kan insum theihloh avang hian “Mizoram hi pul thei reng dinhmunah kan ding a ni” a tiin “Veng thanglai tan chuan thil enchhin hunlai a ni, Khawtlang hruaitute’n
khawtlang thatna turin ‘enchhin teh ang’ tih an nei a nih phawt chuan phunnawi loh tur, a tha lo a nih chuan a ngaiah an letpui leh em em ang che u” a ti bawk He inkhawm a hlawhtlinna tura section tinte mawhphurhna Branchin a pek chu tha taka an tih hlawhtlin a vangin section tinte leh sub com. te chungah Branch chuan lawmthu a sawi mawlh mawlh a ni.
FAMILY LAND RECORD SURVEY
Family land record survey chu Sawrkar leh Central YMA hmalaknain khaw tin a in tinah neih a ni dawn. Kan veng chhungah pawh Branch hmalaknain Section tin hruaitute’n in tinah survey an rawn nei ang. He survey hian pawimawhna tam tak a nei chungte chu : Ram mamawh tak takte hriat theih na’n, Khua leh tui rammi dik takte chauhin ram neitu nihna an neih theih na’n, Mi hausa leh thei bikte’n mi dang an nep chek lutuk tur ven na’n, Ram hralh a sumdawngte ven na’n, Chhiah dik leh kim zawka khawn theih na’n, Ram development ti thuanawp khawpa ram pass leh compensation pung thut ven na’n, Ram singsak felna (Land reforms) bul tanna tur a ni, Ram neih theih chin bituk (Land Ceiling act and rule) tlawh chhan atan etc. Tin, he Land record atang hian Patta/Pass book siam a ni anga, chu chu khua leh tui nihna lantirtu leh Department dang hmalakna atan pawh phut thin a ni ang. He patta/pass book hmang hian chhiah lak a ni ang a, heta tang tho hian ram dilte enfiahsak anni ang. He land record a chuang lo chu ram neilo anga ngaih tur a nih avangin ram neih ang chu kim taka formah hian ziahluh
tur a ni a, zep then a awm a nih chuan an zep then lai ram kha ram ruak anga ngaih tur a ni. Tin, a form a intiamna ah pawh hian family head ngeiin sign tur a ni. He survey hi tan nghal mai a ni dawn a, chhungkaw hotu ber EPIC No., mahni LSC, Huan Pass, Periodic Patta No.etc lo inrinlawk theih nise a lawmawm ngawt ang
BRANCH COMMITTEE NEIH A NI
Chanmari West May 9: Ni 4/5/10 (Thawhlehni) zan khan Pu Vanlalvuana Neuva Section te inah Branch Committee pawimawh tak neih a ni.
Ni 4/5/10 zana Branch committe chuan thu pawimawh tak tak a rel a, a hnuai amite hi memberte leh khawtlang mipuite hriat awm deuh deuhte chu a ni e:
1. Kumpuan hawn: Kumpuan hawnna neih tura ruahman sa tawh thulh leh chu neih leh nise, a hun atan ni 14/5/10 (Zirtawp) nise, a hmun atan Gov’t. Primary School nise tih a ni.
2.YMA Platinum Jubilee Tournament: Committee chuan he tournament a kan veng football leh basketball player te inpekna leh theihtawp an chhuahna chu lawmawm a ti hle. Kan player te hi chawhlui kilpui ngei nise a ti bawk. Players inpe tak takte avang hian committee chuan nakin zelah dinhmun sang zawk kan thlen chhoh theih a beisei tlat a ni. Hetihlai hian kan member branch danga khelte (CYMA dankalh a nih avangin) leh a khelhtirtu Branch dang YMA te chu committee chuan a dem tak zet a ni. Players hmundanga khelte hi an hming leh khelhna Branch hming YMA AW ah tihlan nise tih a ni.
3. Vanapa Sectionin an committee member Tv. J Zoremsiama’n vengdanga a pemsan avanga a aiawh atana Tv. Zohmingliana an ruat pawmpui an rawn dilna chu pawmpui a ni.
4. Gen Secy. CYMA atanga lehkha hmuh Ni 7/5/10 a YMA Hall a Family Land Record Survey Training an buatsaih turah tel tura sawmna chu tel ngei nise kan branch aiawhin Pu R. Lalmalsawma tel tura ruat a ni.
5. Project Director, UD & PA hnen atanga Below Poverty Line (BPL) survey 2010, CYMA remtihna anga hma la tura min rawn sawmna chu sawiho a ni a, min sawm ang hian survey chu a dik thei ang ber a hma lak nise tih a ni. Sectionte hmalakna tur a niin ni 15/5/10 ral hma ngeiin Branch Secretary hnenah thehluh nise tih a ni.
6. YMA buk chungchang: YMA buk sak zawmna tura UD&PA atanga contract tender changtu Chanmari West Congress Unit II te hnena tender min pe tura kan dilna chu remtihloh a nih avangin, ngawih rih phawta boruak tha zawk zawn chhoh zel nise tih a ni.
7. Jubilee lungphun: YMA Platinum Jubilee lungphun tura CYMA in min rawn ngenna chu sawiho a ni a, senso hautak lo zawngin phun nise, a tul angin Branch O/B te’n hma la se tih a ni.
Branch O/B Representna
May - August 2010 chhunga Branch O/B te sectiona an representna tur hetiang hian siam a ni:
Chawngbawla Section : Pu K. Darthantluanga, Asst. Secy.
Khuangchera Section : Pu Lalthuamluaia, V. President
Neuva Section : Pu RL Thanhnuna, Secretary
Taitesena Section : Pu R Lalhmachhuana, Fin. Secretary
Vanapa Section : Pu C. Lalzarliana, Treasurer
CYMA PLATINUM JUBILEE FOOTBALL LEH BASKETBALL TOURNAMENT KAN KHEL E
Chanmari West May 2: Hun rei tak atanga kan lo er lawk leh tlumtea thlir taka kan lo thlir CYMA Platinum Jubilee Football leh Basketball tournament chu khelh a ni ta. Football tournament-ah hian team 131 an chhuak a, pool hrang hrangah thenin Ni 20/4/2010 khan Vaivakawn-ah tan a ni. Ni 23/4/2010 atangin Ramhlun Sports Complex Ground-ah khelh chhunzawm a ni bawk. Quarters Final atangin a hranpain Draw hi neih leh a ni ang a, heta intum turte chu Live Telecast-in vawr a ni ang. Chanmari West Football teamte chuan an khelh hmasak berah Hmuntha chu 0-3 a hneh lovin an tla nghal. Basketball ah pawh Armed veng lakah vanduaiin hnehna an chang zo ta bik lo a ni. Infiamnaah hian chak reng a theih loh a ni mai thei nimahsela chakloh hi a hrehawm a ni. Hei aia tha thei team kan ni tih chu a chiang reng a, kan chaklohna chhan zawk erawh chu infiammi tha, insum theilo tak, teamah pawh tel tlak lo kan neih vang zawk a ni. Hei hian kan la changkan lohzia a lan tir a ni. Chanmari West Football leh Basketball teamte hi an naupang seng sawng hle a, hmakhua beiseiawm tak an nei a ni. Ruihtheih thilin a tihbuai loh thlanchhuah an ni a, tunah chak lo mahse chak hun an la nei chek ang, beidawng lova tang sauh sauh turin hruaitute’n an fuih a ni. Chanmari West YMA hruaitute hma lakna hi a huaisen tlakin a entawntlak hle mai. Sawisel luai luai na karah chakloh pawh pawisa lovin, nakum mai nilo, kum 10 hnu lama vengchhung a lo mawi zel zawkna turin hma an
la a ni. Hruaitute hmalakna avang hian tun atang chuan ruihtheih thil ti thinte tan Chanmari West teamah hian hmun a awm ngai tawh dawn lo a ni. Vengchhung mipuite pawhin kan hruaitute hmalakna hi thlawp thiam i la, hruaitute sawisel lovin infiammi insum theilote hi tanpui dan zawng i la tichuan kum 5 hnuah chuan chhuan tlak infiammi kan nei nual ang tih a rinawm.
HNAM LAM INTIHSIAK Hnamlam Intihsiak Organising Committee thukhawm chuan section wise intihsiak ni atan Ni 12/6/2010 a ruat ta. Intihsiakna hmun tur hi Chanmari West Indoor Stadium a ni. Intihsiakna tur atan chuan Cheraw (kan tluang) leh Sarlamkai a ni ang a. Tin, Section tinah member 14 ai a tlem lo tel tur ani a, mahni Section lo ah lam awih a ni lo ang. Section aiawh tur te chu section in an thlang ang. Khuang leh Dar khuang chauh hman awih a ni ang. Section in musician an nei lo anih chuan Section tin a zirtirtu tur a ruat ten an vuaksak thei ang. Zofa Cultural Club Active Member, lamthiamte tel phal a ni lo a, section huamchhunga mi, kum 12 chin chunglam a duh apiang tel theih a ni ang. Hnamlam chi hnih a intihsiak tur a nih a vangin a pahnih a point belhkhawm a sang ber pakhatna an ni ang. Competition lo awm turah Section hrang hranga lam zirtir turin heng a hnuaia mite hi a ruat a. VANAPA SECTION Tv. R.Lalrinngheta V, Pu.R Lalmalsawma V, Tv.Francis Lalruatfela V, Nl.Malsawmkimi V, Nl.Kitty Laltlanmawii V, Nl.Vanlalpeki V ......HNAMLAM INTIH SIAK (phek1 na chhunzawmna) Nl.Vanlalsawmi V, Nl. PC.Lalremruati V CHAWNGBAWLA SECTION Tv.Lalmalsawma CH, Tv.Rosangmawia K, Tv.Vanlalhriata T, Tv.Vanlalruata T, Pu.Zonunmawia V, Nl. Ellen Lalrintluangi CH, Nl. K.Lalthanpuii CH, Nl. Lalthangmawii CH TAITESENA SECTION Pu. Zohmingliana ( Ate-a ) CH, Tv.H.Vanlaltlana T, Tv.Laltlanhlua T, Pu V.Lalrinpuia T, Nl.Biakhlunpuii K, Nl.Lalramdinthari V, Nl. C.Lalhruaitluangi V, Nl.Lalrimawii V KHUANGCHERA SECTION Pu.Zonunsanga K, Tv.Zion Lalramluaha K, Tv.Lalramchhana K, Pu Ronney Ramnunsanga K, Nl.Zorinpuii K, Nl.Zosangzuali K Nl.Lalremsiami K NEUVA SECTION Pu.Lalrindika, Tv.R.Lalhmuchhuaka V, Tv.Lalpekhlua V, Tv.Lalremruata N, Nl.Lalhminghlui N, Nl.Lalrinsangi N, Nl.Zonunmawii N, Nl.Lalhruaitluangi N, Nl. Lalrotluangi N.
BRANCH COMMITTEE NEIH A NI
Chanmari West April 25: Ni 20/4/10 (Thawhleh) zan khan Pu Lalmalsawma (Sena) te inah Branch committee pawimawh tak neih a ni.
CWBYMA Committee hi Vice President Pu Lalthuamluai kaihhruaina hnuaiah neih a ni (President hi anmahni hna lam thilah a zin). Thu pawimawh tak an rel zingah heng a hnuaia mite hi veng mipuite hriat awm chi a ni e:
1. YMA Zawlbuk sak chhoh mekah, Rural development Deptt a zawlbuk sakna tur pawisa dil Rs. 4,00,000/- (Nuai li) sanction tawh atangin Ni 19/4/10 khan 1st installment atan Rs. 2,00,000/- (Nuai hnih) lakchhuah a ni.
2. Gen Secy CYMA atanga lehkha hmuh, ILP neilo dapchhuak tura ngenna chu, hmalak tawhna thlirletna a ni a, Section hruaitute hmalakna a that viau laiin engemaw hriatsual palh avanga Manipuri leh hnamdangmi lak telloh awmte chu tlawmngaia hma lo la chhunzawm leh tur a ngen kan ni. List peihfel hunah Branch hruaitute’n thuneitute hnenah ILP neilo chu lo report mai se tih a ni.
3. Secretary Zofa Cultural Club, Chanmari West atanga Cultural Dance competition, section wise a buatsaih turah, a hlawhtlin zawk theihna atan Branch YMA leh ZCC te’n organising committee din an rawt chu tha tih a ni a Branch O/B te kutah dah a ni. Tin, he competition neih tur hi a lo hlawhtlin ngei theih na’n Section tinte pawh theihtawp chhuah a, hma lo la chho zel turin inngen nawn leh a ni.
4. Kumpuan hawnna programme duanfel vek tawh chu rokhawlhna (chhiat tawh) avanga thulh a ni. A hun tur chu hun remchang melh chhoh mai nise tih a ni.
5. Ni 14/4/10 zing dar 9 vel a Sairang Road kawngchhaka Pu C. Thanchungnunga (V-sect) in atanga sapzu um 355 man leh Ni 16/4/10 zan dar 10 a Pi Lalchhanhimi w/o Lalmalsawma Zote School, Wonderland School (CH-section) a sap zu um 7 man a ni chu, mulpho thlak an ti hle, a inneitute hi committee ah koh a zilh ve ve nise tih a ni.
CULTURAL DANCE COMPETITION BUATSAIH A NI DAWN
Mizo thalai sang tamtakin Cheraw-a Guinness World Record a siam zawh hlim maiah Chanmari West thalai tamtak Mizo hnamlam thiam chak tak tak te tan Branch YMA leh Zofa Cultural Club te thawhhonain Section Wise Cultural Dance Competition buatsai a ni dawn ta.
He competition buatsaih tur hi School Exam chawlh laia inbuatsaihna neih tura ruahman a ni a, Zofa Cultural Club member hnamlam thiam tawh ten Section tinah hnamlam zirtirtuah tangin la thiamlo te tan he competition hi buatsaih tum a ni. Cheraw leh Sarlamkaia intihsiak tur a ni a, lawmman pawh tha tawk tak buatsaih a ni ang. YMA Day hmain he competition hi neih tum a ni a, Zofa Cultural Club member hnamlam thiamsa nilo, Chanmari West Branch YMA member te tana he intihsiakna hi buatsaih tum a ni a, mizo mipui hnamlam a kan thanharh mek lai hian Chanmari West nula leh tlangval, naupangte he hun tha takah hian lo inbuatsaih turin kan inhriattir e. Branch OB leh Zofa OB joint meeting chuan Organising Committee a din a, anni kutah hian lam zir hun leh intihsiak hun pawh dah a ni.
Organising Committee member-te :
Chairman: Pu V.Biaknghinglova, Vice President, ZCC.
Vice Chairman: Pu Lalthuamluaia, Vice President, CWBYMA.
Secretary: Pu Lalbiakhlua, Secretary, i/c Organising ZCC.
Asst.Secretary: Pu K.Darthantluanga, Asst. Secretary, CWBYMA.
Committee Members :
1) Pu K.Rosiama, Dance Instructor, Art & Culture Deptt.
2) Pu T.Ngurkhuma, President, CWBYMA.
3) Pu R.L.Thanhnuna, Secretary, CWBYMA.
4) Pu C.Lalzarliana, Treasurer, CWBYMA.
5)PuR.Lalhmachhuana, Fin.Secretary, CWBYMA.
6) Pu C.Lalmuankima, Leader, T.
7) Pu Lalthanruma, Leader, N.
8) Pu C.Sangpuia, Leader, CH.
9) Pu H.Vanlalvena, Leader, V.
10) Pu Lalrinliana (Te-a), Leader, K.
11) Pu Zonunsanga (Pate-a), President, ZCC.
12) Tv.Lalrinngheta, Secretary, Secretary, ZCC.
13) Tv.Lalmalsawma, Asst.Secretary, ZCC.
14) Nl.Lalmuanpuii, Treasurer, ZCC.
15) Nl.Malsawmkimi, Fin.Secretary, ZCC.
16) Nl.Elen Lalrintluangi, Commt. Member, ZCC.
17) Nl.H.Lalhminghlui, Commt. Member, ZCC.
18) Tv.Zohmingliana Tlau, Commt. Member, ZCC.
19) Pu Zohmingliana (Ate-a), Commt. Member, ZCC.
CYMA VICE PRESIDENT THAR PU JH ZOREMTHANGA
Chanmari West April 18: CYMA Vice President thar atan Pu JH Zoremthanga CEC member chu thlan tlin a ni.
Ni 15/4/2010 (Ningani) a CEC meeting Pu Lalchungnunga CYMA President kaihhruai chuan CYMA Vice president boral ta Pu C. Zoramliana aiawh turin Pu JH Zoremthanga Vaivakawn CEC Member, Ex-President chu lungrual takin an thlang.
Pu J.H. Zoremthanga hi Central YMA-ah 1995-1997, 1997-1999 khan Assistant Secretary niin, kum 1999-2001, 2001-2003 khan General Secretary hna a chelh a, kum 2003-2005 khan Vice President niin kum 2005-2007, 2007-2009 chhung khan President hna a lo chelh tawh a ni.
Tunah hian Vaivakawnah an chhungkuain an cheng mek a, a nupui Dr. Lalmalsawmi Hmar leh a fate 3 nen khawsain hnathawhna lamah chuan Govt. Zirtiri Residential College-ah Selection Grade (Lecturer) hna a thawk mek a ni.
RUIHTHEIH THIL THAHNEM TAK MAN
Ni 14/4/10 (Nilai) zing dar 9 vel khan Sairang Road a Pu C. Thanchungnunga in (mi luah) Chanmari West leh Edenthar ramri a mi atangin Chanmari West branch YMA Kumpuan Duty te chuan sapzu, um puitling vek, um 373 man a ni. He zu hi Rs 2,98, 400/- man hu lai a ni. He zu man neitute hi Lalthansangi d/o Saichhawni (L) Hunthar veng leh Lalduhzuali w/o Ramdinthara Ramhlun South te anni.
Tin, ni 15/4/10 (Ninga) khan Neuva section huamchhung motor silna zawn kawngpuiah taxi MZ-01B 7063, V. Luaizamuana s/o L. Rama, Hunthar veng khalh (a ma taxi) atangin Ganja kg 8 man a ni bawk. Ruihtheihthil man te hi Police hnenah hlan an ni.
Ni 16/4/10 (Zirtawp) zan khan Kumpuan duty te chuan Wonderland School CH Section atangin Mc Dowell Whiskey um puitling um 7 man a ni bawk. He zu man hi school neitute chuan Machhuani Chanmari, Pi Nipuii inluah ta niin an sawi.
Ruihtheih thil hetiang zat kan vengchhung atanga man a ni hi Branch YMA chuan pawi a ti a, veng hming ti chhetu hi a dem takzet ani. (photo gallery en rawh)
CHANMARI WEST BRANCH YMA COMMITTEE NEIH A NI
Chanmari West April 11: Ni 5/4/10 (Thawhtan) zan khan Pu RK Pahlira (Nl. R. Lalramengzami) te inah Branch committee neih a niin thu pawimawh tak tak rel a ni.
Ni 5/4/10 (Thawhtan) zana Br. YMA committee chuan thu pawimawh tak tak hetiangin a rel:
1. YMA DAY denchhena ZCC, Chanmari West in Section te inelna tur Cultural Dance competition buatsaih an rawn dilna chu phalsak a ni a, a hun tur (intihsiakni) erawh ngaihtuah nawn leh ni se.
2.YMA Platinum Jubilee puala Faina Hnatlang neih nise tih a ni a Ni 10/4/10 (Inrinni) zingkarah Branch pum huapin hnatlang mahni section tinah neih nise, hnatlang zat pawh inchhiar ni se, Br. Secy hnenah hriattir ni rawh se. Tin, vengchhung kawrpuia bawlhhlawh paihna awmte hi paih theih tawh loh turin hung phui vek tum ni se, a hung phalna hi V/C te hnenah dil ni se.
3. Kumpuan chungchang: Kumpuan Joint Meetingin a lo rel tawh bawhzui na’n hetiangin thu tih tluk a ni:
i) Vengchhunga mi tlawmngai, chawimawi phute thlanchhuah a, chawimawina neih ngei nise, section tinah mipa 1 leh hmeichhia 1 nise.
ii) YMA Kumpuan hawnna inkhawm chu ni 22/4/10 (Ninga) zanah neih nise, a hun, a hmun leh programme kimchang chu Kumpuan sub-committee leh Br. OB te kutah awm se.
iii) Vengchhunga ruihlo zuar man an nihin, YMA member an nih chuan member nihna hlih sak a ni ang a, tin, YMA member an ni emaw nilo emaw man an nih chuan Chhiatni Fund pekkir an ni ang.
4. Tournament chungchang: CYMA Platinum Jubilee lawmna atana Football leh Basketball Tournament awm turah Br. YMA player te inbuatsaihna ngawrh taka kalpui mek a ni. Basketball player te’n a tul anga an hman atan Rs 1500/- pek a ni. Tin Football Coach atan Tv. Zion Lalramluaha ruat a niin Asst Coach atan Tv Laltlankima te ruat an ni.
5. Damlo tlawh: Tv James Lalchhuanthanga, natna khirh tak tuara damlo Presbyterian Hospital, Durtlanga awm mek chu, damlo kan na’n Rs 1000/- pek a ni.
CHANMARI WEST CHAMPION
Ni 3/4/10 (Inrinni) a Ramhlun Sports Complex a khelh zawh tak ADFA 2nd Division League Final khelhah Chanmari West Sporting Club te chuan Ist MAP Football Academy chu 2-0 a hnehin an champion. CWSC te hian semi final-ah Electric Veng FC 5-4 in an hneh a, hun pangngaiah 3-3 in an inhnehtawk a, extra time-ah Chanmari West an chak. Final match hmuhnawm takah hian minute 3 naah Vanlalhuma’n goal a thun a , minute 88 naah F. Lalnunhlua’n thun belhin 2-0 in an chak ta a ni. Champion hian No mawi leh Rs 10000/- an dawng a Best Player ah hian Chanmari West Sporting Club Player Vanlalhuma thlan a ni.
He Champion theihna chhan hi player te ni bawk mahse CWSC Football hruaitute inpekna ropui tak vang a ni bawk a ni. Sports lama kan hruaitute tan la sauh sauh zel sela 2nd Division mai nilo 1st Div ah pawh inhlangkai zel turin hma la se a lawmawm ngawt ang.
KUMPUAN BAWHZUI NA ATAN JOINT MEETING NEIH A NI
Chanmari West April 4: Ni 30/3/10 (Thawhleh) zan khan Pasaltha Neuva inah Joint Meeting pawimawh tak neih a ni Kumpuan bawhzuinatan a hmalakna tur Joint Meeting hi Kumpuan Sub-Committee koh a ni a, hetah hian section tin OB te leh Branch OB te tel kim tura ngaih an ni. He meetingah hian engemaw rokhawlhna avanga hruaitute an kal kim vek thei lo erawh chu a pawi hle, member kal dan chu hetiang hi a ni; ‘N’ OB : 5, ‘K’ OB: 2, ‘CH’ OB: 5, ‘V’ OB: 1, ‘T’ OB: 2, Br. OB: 3.
Joint Meeting thurelte chu:
1. Kumpuan hawnna programme neih chungchang: Hun remchang hmasa berah kumpuan hawnna programme neih tura ruahman a ni a, programme kimchang chu Branch Executive kutah dah a ni.
2. Ruihhlo do chungchang: Kan khawtlanga ruihhlo ti thin te’n zalen taka an ti leh buaina siam thin an awm chu Joint Meeting chuan a ngaimawh hle mai a, Section tin te mahni sectionah ngawrh lehzual a duty thin nise, tin, buaina leh harsatna siam thinte chu a tul anga Police hnena hlan zel ni rawh se. Tin, ruihhlo zuar thin an awm a man an nih chuan YMA member an nihna hlihsak emaw chhiatni fund pekkir thlenga hrem nise Joint Meeting chuan a duh a mahse hei chu Branch Committee kutah awm se.
3. Zonunzemawi/Tlawmngaihna inzirtir chungchang: Helam hawi inzirtirna hi Section hruaitute’n a tam thei ang ber neih nise. Tin, vengchhung mi tlawmngai, chawimawiphute thlanchhuah a chawimawi ngei nise, a thlanchhuah dan tur chu Branch Committee in rawn duang se.
He meeting hi Kumpuan sub-committe Chairman Pu R. Lalhmachhuana’n kaihruaiin “ Vengchhung nawmna leh ralmuanna tur chuan YMA hruaitute hi huaisen taka kan din ngam a tul a ni” a ti. CWBYMA President Pu T. Ngurkhuma pawhin hruaitute fuihna thu tha tak tak a sawi bakah “Zirlai naupang, tleirawl leh rawltharte hi nakin lawk a kan nula tlangval tur, kan veng hruaitu turte an la nih avangin Zonunzemawi tlawmngaihnate, aia upa zahna te hi kan zirtir makmawh ani” a ti.
MBSE HNUAIA HIGH SCHOOL LEAVING CERTIFICATE, 2010 RESULT A CHHUAK TA
Chanmari West March 28: MBSE hnuaia HSLC 2010 result chu ni 26/3/10 (Zirtawpni) khan tih chhuah a ni a, rampumah pass percentage chu 66.6 a ni.
HSLC 2010 Examination result chu ni 26/3/10 (Zirtawpni) khan Mizoram sawrkar chuan a tichhuak. HSLC exam hi mi 14938 te’n exam tumin form fill up mahse mi 14652 te chauhin an exam a ni. Result tlangpui chu hetiangin:
Exam zawng zawng: 14652
Passed: 9758
Failed: 4561
Compartment: 333
Distinction: 322
First: 1586
Second: 3337
Third: 4513
Mizoram pumah Benjamin Lalfakmawia, St Peter’s Higher Secondary School chu pakhatna a ni.
Chanmari West veng chhunga school awmte pawh an ti tha thawkhat hle a, New Horizon School of Education atanga pass zat hi 77.14% a ni a, Distinction - 4, First-14, Second-29 Third - 34 anni. Springdale School atanga pass zat hi 70% ani a, Distinction-1, First-nil, Second-5, Third-1 an ni. Chanmari West H/S atanga pass zat hi 26.32% a ni a, Second-2, Third-3 leh Compartment-1 an ni. Letter hmu an awm nual bawk. Chanmari West veng chhunga school te hi Mizoram pumah pawh an duai bik lo hle a ni. Zirtirtute tang sauh sauh se a lawmawm ngawt ang. (courtesy: www.mbse.in)
13th AMKA State Championshipah Chanmari West nula/tlangval te che tha
Ni 24-26 March, 2010 chhung awh, 13th AMKA State Championship chu Electric veng YMA Hallah tluang taka neih zawh a ni.
He inelnaah hian Chanmari West tlangval/rawlthar te an che tha hle hetiangin:
1. Vanlalthanpuia s/o TC Lalremsiama ‘V’ Gold 2
2. Vanlalnelawma s/o TC Lalremsiama ‘V’ Gold 1, Bronze 1.
3. Vanlalchhuanawma s/o TC Lalremsiama ‘V’ Gold 1, Bronze 1
4. Malsawmdawngzela s/o TC Lalremsiama ‘V’ Gold 1, Bronze 1
5. Vanlalremtluanga ‘V’ Gold 1, Silver 1
6. Reuben Lalhmingmawia s/o Roluahpuia ‘V’ Gold 2
7. Lalthakimi d/o Lalpianthanga ‘V’ Silver 1
He tournamentah hian Vanlalthanpuia s/o TC Lalremsiama chu BEST FIGHTER a thlan a ni.
Tin, Chanmari West atangin mi pathum(3) Vanlalthanpuia s/o TC Lalremsiama, Vanlalnelawma s/o TC Lalremsiama leh Reuben Lalhmingmawia s/o Roluahpuia te chu April thla a Northeast Games, Shillong, Meghalaya a neih turah Mizoram aiawh a Karate khel turin thlan an ni bawk a ni.
CHANMARI WEST SPORTING CLUB VOLLEYBALL TEAM TE SEMI FINAL AH AN VANDUAI
Chanmari West March 21: Ni 16 -20 March, 2010 chhunga neih, ADVA season ending Volleyball Tournament-ah CWSC hmeichhe volleyball teamte chu semi finalah hnehna chang zo lovin an vanduai.
Ni 16 -20 March 2010 khan F. Lalmuanzova Memorial Volleyball Championship chu Bethlehem vengthlang field-ah neih a ni. He championship hi Aizawl District Volleyball Association (ADVA) buatsaih a ni.
He tournament hi ADVA buatsaih II Division season ending tournament niin Chanmari West Sporting Club pawhin Chanmari west lo ti hmingtha fo tawh tute, mipa team khat (1) leh hmeichhe team khat (1) an thawhchhuak. a, CWSC mipa teamte hi First round-ah an vanduai hlauh a ni. Hmeichhe team te hian CWSC chu semi final an hruai thleng, CWSC hmeichhe player te hi senior, a tam zawk chu nu ni tawh an ni a, an chhuanawm hle mai. Theihtawp chhuahin an bei a mahse semi final ah hian JC Security te lakah 1-3 in hnehna an chang zo ta bik lo a ni. He Tournament hi Ni 20/3/10 (Inrinni) khan Bethlehem Vengthlang field-ah Final hi khelh zawh a ni a, chanchinbu buatsaih lai hian result kan hre hman ta lo a ni.
He tournament ah hian Chanmari West Sporting Club Volleyball teamte hi Pu Lalnunzira leh Pi Vanlalchhuangi te nupa T Section, Pu Lalnunthara Sailo Gemini Enterprise , Pu Lalrinchhana EL-AR Enterprise leh Pu J K Zosangliana Crown Computers te’n an sponsor a ni.
CHANMARI WEST BRANCH YMA MEMBERTE’N GUINNESS WORLD RECORD AN SIAM
Chanmari West March 14: Khawvela a ruala Bamboo Dance (Cheraw) entir tam ber Guinness World Record thar chu ni 12/3/10 (Zirtawp) khan siam a ni ta. He record thar hi AR Lammualah leh Chanmari atanga Sikulpui kawn inkar kawngpui dungah entir a ni. Cheraw hi avaiin bu 671 entir a niin mi 10736 laiin minute 8 chhung an entir a ni. Guinness World Record siamnaah hian kan veng pawhin Branch YMA hmingin bu 2 an entir a heng bakah hian New Horizon School of Education zirlaite leh tunhma lama cheraw a kan veng ti mawi thin tute’n an entir bawk.
London tanga lokal Guinness World Record adjudicator Ms Lucia Sinigaliesi chuan he hun hi a hriatpuiin World record a nih thu a puang a, Mizoram Art & Culture Minister, Pu PC Zoramsangliana hnenah certificate a hlan.
Ms Lucia Sinigaliesi hian “Hei hi khawvela bamboo dance entir tu tam ber leh rei ber a ni a, he record khum tur hi chuan vawiina an entir ang hian traditional dress a mawi taka an inchei ve kher pawh a ngai dawn a ni” a ti.
Mizoram Art & Culture Department Director Pi Bawihchhingpuii pawhin thusawiin “ Hei hi kan hnamzia (culture) leh hnam lam danglam tak khawvelin min hriatpuina ni a ni” tiin a lawmawmzia thu a sawi.
He certificate ah hian ‘The largest bamboo dance was achieved by the people of Mizoram in Aizawl, Mizoram, India, on 12 March 2010’ tih a in ziak a ni.
Subscribe to:
Posts (Atom)
