KUMPUAN BAWHZUINA PUBLIC MEETING

Chanmari West August 29:   Ni 27/8/10 (Zirtawp) zan khan Pu. C. Sangkhuma  in chungah Kumpuan sub-committee hmalakna in CWBYMA chuan Taitesena Section huamchhunga nu leh pate tan Public meeting a buatsaih. Mi 138 vel kalin hun hlimawm leh nuam tak hman a ni.
He inkhawm hi Pu R. Lalhmachhuana Fin Secy leh Kumpuan sub-committee Chairman chuan kai hruaiin Pu K. Lalthakima, Secretary, Kumpuan sub-comm. chu Resource Person a ni. Chairman hian thusawiin “Mahni chauh inthlir lovin midangte thatna tur pawh kan thlir tel a pawimawh a ni. Midangte tanpui thin nge midangte tana harsatna thlentu  ka nih tih kan inzawh a pawimawh” a ti. A sawi zelnaah “Upa lamte inthlahrung taka tuallai an leng hmuh hian lung a tichhia a ni” a ti bawk. Kan khawtlang a lo thatna tur a ke pen theuh turin nu leh pa te leh YMA member te a ngen in a sawm zui bawk.
Resource Person Pu K. Lalthakima chuan khawtlang nun siamthat na’n theihtawpa ruihhlo do a tul  em em a, a tulna leh pawimawhna hre reng si a inkuangkuah san mai hi a dik hauh loh ziate a sawi bawk. Kalkhawmte’n an hlut in sawihona huna sawi pawh an thahnem hle.
Pu T. Ngurkhuma, President, CWBYMA chuan thu sawiin “ Khawtlang nun siamtha tur chuan rinawmna hi a pawimawhin mitin hian khawtlang leh kohhranah kan phak ang tawk theuhin kan nunpui tur a ni.” a ti.

BRANCH HRUAITUTE REPRESENT NA TUR

September - December thla chhunga Branch O/B te Section a an Represent na tur hetiang hian siam a ni. CH-Section : Pu R.L.Thanhnuna, Secretary K-Section : Pu C. Lalzarliana, Treasurer T- Section : Pu K.Darthantluanga, A.Secretary N-Section : Pu R.Lalhmachhuana, Fin.Secretary V-Section : Pu Lalthuamluaia, Vice.President.

YMA PLATINUM JUBILEE LAWM A NI

Chanmari West August 22: YMA Platinum Jubilee lawmna chu Ni 14th August, 2010 dar 11:00 a.m khan Vanapa Hall-ah hman a ni. He hunah hian Central YMA OB lo nitawh tun thlenga min la dampuite mi 39 hnenah chawimawina thuziak leh Souvenir Magazine pek an ni.

Jubilee lawmna inkhawm hi Rev. C. Chawngliana, Chairman, Mizoram Kohhran Hruaitu Committee-in Pathian hnenah hlanin Zaipawl leh mimal zaithiam tak tak ten hun an hmang a, Pu Lalbiakzuala, General Secretary in Platinum Jubilee Sub-Hqrs/Group/Branch hrang hrang ten an hman dan report a pe. 

CYMA President, Lal Chungnunga chuan thusawiin “Mizote zingah Kristian dik leh piangthara inchhál tam tak an awm a, mahse a taka rah chhuah hmuh tur erawh chu duhthusamin an tam lo; nu leh pate'n fate an ngaihsak tawk lo va, Mizote zingah tunlai khawvel sualna kawngah chak taka pên an tam tual tual a, hei hi tu leh fate'n ngaihsak an hlawh tâwk loh rah chhuah niin a lang" a ti. A sawi zel naah chuan “... a bikin Aizawlah ruihhlo a hluar hle a, 'em em a' tih tur khawpa naupang thlengin an rui” tih a sawi a, "Nu leh pate'n an fate dinhmun an hriat chian duh loh avangin, ruihhlo bawihah naupang tê tê an táng mek a ni," a ti bawk. 

Pu J.H. Zoremthanga, Vice President hnen atangin Kumpuan Thupui "Khawtlang Nun Siamthat" ngaihthlak a ni. Mizoramah rorelna dik leh tha a awm tawk loh avangin mi pawngsualtu zinga 70% in an phû tâwk hremna an hmuh loh thu leh, Mizoram sum a hmanna tura hman loh a tam avangin Mizoramah sualna a pung ni a a lan thu sawiin, "Do ngai zingah kut tling lo a sum lak luh a tel a, YMA-in ka do zel a ngai a ni," a ti. YMA-in ruihhlo a do loh laiin mahni inti hlum leh HIV kai an pun thu a sawi a, "Sorkar pawhin ruihhlo do kawngah tan a lak lehzual a tul," tiin a sawi bawk.

He mini vek hian Pu C. Rokhuma, Central YMA President hlui in Platinum Jubilee Souvenir Magazine a tlangzarh. Souvenir Magazine hi Rs. 100/- man a ni a, CYMA Office-ah lei theihin a awm. Jubilee lawmna peng pakhat atan Exhibition buatsaih a ni a, hetah hian Branch hrang hrang ten Chhiatni-a kan in sawngbawl dan chi hrang hrang an pho chhuak a, member ten an hlut hle.

LEIMIN TUARTE CHANMARI WEST IN TANPUI

Chanmari West August 15: Tunlai ruah bawhawkah veng hrang hrangah leimin a nasa hle. Kan veng thenawm mai  Edentharah (Vengchhak), kan veng nen a inri na  bula mi, pawh ni 10/8/10 zan dar 9:00 vel khan  H. Ronghaka in, assam type chhawng hnih chu lei chimin a hnawl tlu a, In chim hian a thlanga Pu Sanghmingthanga in chu a delh tlu tel bawk. In chim hian mi 6 a hnawl tel a, an zinga mi Pu HB Kapthanga (74) chu a malpui veilam a thler a, a khabe-ah hliam tuar bawkin damdawi Inah dahluh a ni a, In chimin a hnawl tel midang 5 chuan hliam an tuar a, damdawi ina admit ngai erawh an awm lo.
Pu H. Ronghaka In hi chhungkaw 3-in luahin a chung hi Pu Lalngaihsaka te chhungin an luah a, a hnuai hi Pu Lalpianmawia leh Pu HB Kapthanga te chhung hian an luah bawk. In chim lai hian in chungah mi 3 an awm a, in hnuaiah hian mi 3 bawk awmin Pu Lalpianmawia fanu chu kawngka bula a din lai niin leimin tur hmu hian a tlanchhuak hman a ni. Pu Kapthanga bakah hian Pu Lalpianmawia te pafa hi an hliam na leh deuh a, ngaihtuahawm erawh an ni lo. A thlanga in a delh hi Pi Chhimchhingi te chhungin an luahlai a ni a, inchhunga awm mi 4 te chu an insaseng hman lo a, hliam na erawh an tuar lo.
In hi leiminin a hnawl tih hriat a nih velah Chanmari West thalaite pawhin tanpui ngai tanpui turin an thawk chhuak nghal a mahse Pu Lalzawmliana (Presbyterian Upa) te in piah kawrah hnawl tam tham takin kawng a hnawh vek avangin mi tamzawk chu an thleng phei thei lo a ni.
In chim hi ni 11/8/10 hian khawtlangin a senghawi hna an thawk nghal a, ni a Chanmari west atangin mi 100 vel zetin va puih a ni in, Branch YMA hmingin Rs 1000/- tanpuina  pek an ni bawk.
Tin hemi zan vek hian Chaltlang Lily Veng huamchhung, Sairang road (New Bagha tia hriat) ah kawngchhak lama lung tla in Pu Vanlalringa in, assam type a deng a, lung hian Pu Vanlalringa nupui Pi Lalrintluangi (27), fa thla 8 mi pai lai chu a lu-ah deng fuhin Aizawl Civil Hospital ah a hliam tuar loin a boral. Pi Lalrintluangi hian a pasal leh fa 4 a kalsan.

LAWMTHU SAWINA

Tunhnai ruahsur avanga kan ram leiminin Kan In chhungkaw hnih luahlai Assam type luah ngam loh a asiam avang leh a thlang in thenga harsatna a thlen avangin pawi kan ti hle a. He kan chhiattawh a phut let nei lo a min buaipuitu, bungrua min senghawi puitu te, VC, YMA leh tlawmngai a tul anga min buaipui a, hnatlang a rawn thawk chhuak zawng zawng chungah lawmthu kan sawi takzet a ni.

In khawngaihna dawngtu,

Vanlalpeka te chhung,

Khuangchera Section

INDEPENDENCE DAY CELEBRATION TOURNAMENT 

(Football & Volleyball)

Chanmari West August 8: Indepentdence Day Celebration Tournament chu Ni 2.8.2010(Thawhtanni) khan Mizoram Football Association(MFA), Aizawl District Football Association (ADFA) leh Mizoram Volleyball Association (MVA) buatsaihin 1st Division leh 2nd Division tan Football leh Volleyball tournament buatsaih a ni.
He tournament ah hian kan veng CWSC bultumin Mipa 2nd Division Football leh 2nd Division Volleyball  Team te pawh tel niin Volleyball Team te hi match 1-na tur ah an bye nghal a, Zirtawpni kha Dawrpui Vengthar 3-0 a hnehin Quarter Final ah an in hlang kai. Nimin Inrinni khan LBN Tuikual te nen Quarter Final an khel leh a, result kan hre hman ta lo a ni.
2nd Division Football tournament ah hi  Pool  A leh B ah then niin Ckan veng  Seeded no.1 ah dah a ni a. 3rd Bn.M.A.P., Electric Veng F/C leh SYS Academy te nen Pool -A ah an awm ho a. Ni.2.8.2010(Thawhtan) khan Electric Veng F/C nen match hmasa ber an khel a, he inkhel hi a hmuhnawmin entu mipui te pawhin an hlut hle a, kan veng team ten goal 1 an phurh hnuin  Electric veng F/C lamah goal 2 thun ve lehin 2-1 in chakna an chang a ni. Nilaini (4.8.10) khan 3rd Bn.M.A.P. nen 1-1 a in draw-in ni 6.8.2010 (Zirtawp) khan SYS Academy nen 1-1 in draw leh in point 5 hmuin Pool Runner dinhmun an luah a, naktip thawhlehni (10.8.10) Dar 12 hian  Pool -B winner 1st Bn.M.A.P nen  Semi- Final an khel dawn a ni. Volleyball leh Football players te hi vengchhung mipui a thei thei tawiawm turin CWSC chuan a ngen a ni.
Tin, he tournament neih mek a sum leh pai leh tha leh zung sengtu vengchhung mi tlawmngai te chungah Chanmari West Sporting Club chuan lawmthu a sawi takzet a ni.

LAWMTHU SAWINA

Ni 31.7.2010 (Inrinni) a YMA Platinum Jubilee puala Thisen Pek Runpui neih zawh takah Sum leh pai thawhtu te, tlawmngaia ei leh in buaipui tute, bungrua leh thil tul dang ui lova thawhtu te, thisen hlu tak petu te leh pek tum a thawkchhuak taksa lam harsatna avanga pe thei ta lo te chungah Branch Y.M.A. chaun lawmthu a sawi takzet a. Tin, hmun leh hma phal taka hmantirtu Chanmari West Middle School thuneitu te hnenah Br.Y.M.A. chuan lawmthu a sawi bawk a ni.

BADMINTON TOURNAMENT

Chanmari West Sporting Club, Badminton Sub-Committee chuan Chanmari West vengchhunga Badminton lama tuimite tan Badminton Tournament buatsaih a ni dawn a. He Tournament hi ni 10/8/10 zan atanga tan tur a niin Chanmari West Indoor Stadium-ah khelh tur a ni. He Tournament ah hian Category hrang hrang buatsaih tum a ni a, badminton lama tui mite lo inbuatsaih lawk turin an in hriattir.
Under  19 yrs
Above 19 yrs  (Mens single leh Double)
Heng bakah hian category hrang hrang tih belh tum a ni bawk.
Entryfee
Single - Rs 50/-
Double -   Player pakhat tan Rs 50/-
Last Date        - Ni 9/8/10 Zing.

THISEN PE HNEM BER RECORD KAN SIAM TA!

Chanmari West August 1: Chanmari West Branch YMA chuan YMA Platinum Jubilee pualin mamawhtute tan ‘Thisen Pek Runpui (Mass Blood Donation’  Civil Hospital Aizawl buaipuiin Ni 31.7.2010 (Inrinni) Dar 10 a tanin  Chanmari West Middle School-ah a nei. Hetah hian Branch YMA zinga Mizorama thisen pe hnem ber Record dinglai mek chelhtu Ramhlun North Br.YMA (171 units, 2010) chu unit 35 a khumin unit 206 pek a ni.Branch dangte cho chhuahna nise an ti hle.
He thisen pek runpui hi CWBYMA President Pu T. Ngurkhuma’n  hawngin “Veng lian ber pawl hian pek hmasak a kan hmingchhe tawh kha kan khum ngei tur a ni  ” tih a sawi. Tin Dr Lily, Civil Hospital chuan “Kum 18 - 60 inkarin pek theih a ni a, mi hrisel pangngai chuan pek ngei hi mi ang nihna a ni” a ti bawk. He thisen pek runpui hi Pu Lalkunga (Pres. Upa) in Pathian hnena a hlan hnuin CWBYMA Br Asst Secy Pu K Darthantluanga chu pe hmasa berah a tang a ni.Thisen petute ei leh in buaipuitu te’n hneh takin thisen petute an chawm a, tin, sound system te, mut leh thutna turte leh silpauline buaipuitute’n hneh takin anmahni chanvo theuh an hlen chhuak thei chu Branch Committee chuan lawmawm ati a, lawmthu a sawi a ni. Hemi atana thisen hlu tak pe tu mi inpe te leh tanpuina petute( apawisa fai chuan Rs 28475) hnenah leh sikul thuneitute hnenah Branch YMA chuan lawmthu a sawi takzet a ni. Hemi ni a senral tlangpui chu Rs 19458 approx ani e.
Thisen pekdan record kimchang hetiangin:
Hming pe zawng zawng - 462
A ni a In register - 372
Thisen pe - 206 (Mipa -176; Hmeichhia - 30)
Pe theilo - 166
Section wise a pekdan:
Section    In report Pe zat
M F Total %
K 80 43 8 51 63.75
V 120 44 3 47 39.16
CH 113 35 7 42 37.17
T 94 32 9 41 43.61
N 55 19 6 25 45.45
Section pe hnem ber K-section hian lawmmanah Tea Urn an dawng a ni.

Branch Asst Secy Pu K. Darthantluanga, 
Thisen pe hmasa bertu chu!!

THISEN PEK RUNPUI

( Record Siam tum a ni )

Chanmari West July 25 : Chanmari West Branch YMA chuan YMA Platinum Jubilee pualin mamawhtute tan ‘Thisen Pek Runpui (Mass Blood Donation’ Civil Hospital Aizawl buaipuiin Ni 31.7.2010 (Inrinni) Dar 10 - 3p.m hian Chanmari West Middle School-ah huaihawt a tum.

Hemi atana thisen hlu tak pe tura mi inpe te hnenah Branch YMA chuan lawmthu a sawi takzet a ni. Hetih rual hian Branch YMA thisen pe tam record siam  ngei Branch YMA chuan a duh takzet a ni. Tanpui ngaite tanpuitu pawla member an nih ang ngeiin, thisen hlutak pe tura inpe memberte’n an inpekna an hlenchhuah ngei theih nan inpuahchah a, hunawl lo insiam ngei turin t Branch YMA chuan a ngen takzet a ni.  Tin, he thisen pek runpui neih tura la inpe remchang lo member tlawmngai tamtak kan la awm tih Branch YMA chuan a hria a, hemi ni hian inthlahrung lova tlawmngai thei apiang thisen pe turin Branch YMA chuan a sawm a ni.

He hunah hian Chanmari West Branch YMA chuan Ei leh In tuihnai tak a buatsaih dawn mai bakah kawng hrang hrangah mawhphurhna  Section leh mimal ah a pe dawn a, kan duty theuh te tlawmngaia a ti hlawhtling a, a tawp thleng theuh turin YMA member te mai bakah vengchhung nu leh pate a ngen a ni.

TANPUINA PE:

Heng Pawl leh Mimal chhungkua te hian tlawmngaih chhuah a Thisen pete chhan let nan sum hlu tak an pe a ni. Kal chhuak thei lo pawhin mawhphurhna lian tak kan nei, thil pek.....a theih reng a ni.

1) Organising Committee -  Rs.10000

2) Lalengliani (CH) - Rs.  1000

THISEN  PE  TURTE   HRIATTUR

1. Zirtawp zanah men rei loh tur.

2. Ruihtheih thil tih loh tur.

3. Zingah chaw puar taka ei tur.

4. Donor’s card nei tawh chuan ken vek tur.

5. Thisen pe tur ten natna leh insawiselna kan neih chuan zawhna min zawhin chhan dan tur thiam tur.

6. Blood Group hriat lawk kher a ngai lo.

7. Thisen pek hi Inrinni (31.7.2010) dar 10:00 a.m. - 3:00 p.m. inkara neih tur a ni a, kal tlai loh hram nise.

Thisen Pe thei tura beisei zat

Sect.      Mipa   Hmeichhia  Total

    CH 84   29         113

    K       61   20        81

    N       38   17       55

    T       76   18       94

    V        84         36      120

 TOTAL    343     120    463 

MUNICIPAL ELECTORAL ROLL HEARING NEIH A NI

Chanmari West July 18: Chanmari West huam chhunga Municipal inthlan lo awm tur a vote la neilo neih diltute ngaihthlakna hun (Hearing) chu ni 16/7/210 (Zirtawp) khan Indoor Stadiumah neih a ni.
Chanmari West veng hi Municipal inthlan lo awm turah hian Chanmari West Ward hnuaiah a awm a, he ward ah hian Chanmari West, Hunthar leh Edentharte an awm a ni. Tunah hian Chanmari West ward hi Municipal ward zinga vote nei tlemna ber a ni hrih.
Hearing hi zing dar 10 atang chawhnu dar 1 thleng neih a niin sawrkar lam tirhin Election Office (DC Office) atangin Assistant Municipal Electoral Registration Officer (AMERO) Pi H. Rochungnungi a lokal a, veng chhunga NGO hrang hrangte leh Political Party tin atanga aiawh te’n an tawi awm. He hunah hian mi 400 bawr vel vote neih dil thar an awmin, hun chep tak karah duhthusam a tihfel a ni lo niin report kan dawng.
Zirtawp zan vek hian NGO leh Political party tin a hruaitute’n Emergency meeting an nei nghal a, Hearing neih chungchangah hian a kalpui danah an  lungawi thei lo a ni. Nilenga neih tur ni a ngaih si zing dar 10 atang chawhnu dar 1thleng chauh neihpui an ni a, hemi chhung hian ngaihthlak zawh hman a ni lova chumi chunga khar a ni hian voters chungchangah felhlel a awm theih avangin hearing hi neih that leh turin sawrkarah dilna lehkha thehluh nise tiin an rel.

ZU IN PHALNA NEI MI 251

Chanmari West July 11: Kumpuan Sub-Commt. leh Chawngbawla Section commt joint meeting ni 24.6.2010 a neih in a lo rel tawh angin ni 8/7/10 (Ninga) zan khan‘Khawtlang nun siam that’ zirhona Public meeting chu YMA Park-ah neih a ni.
He inkhawm hi Kumpuan committee Chairman Pu R. Lalhmachhuana chuan kaihruaiin “Mizoramah hian sawrkar phalna a zu in thei chu mipa 246 leh hmeichhia 5 anvaiin mi 251 chiah an ni, chuti a nih laiin zu in thin hi kan va tam si em, khawlaiah rui buai a bengchheng siam kan tam si hian khawtlang nunphung kaihhruaina hi tihmakmawh a ni”  a ti. He inkhawmah hian CH section a  nu leh pa an kal thahnem hle. 
      Pu K.  Lalzuithanga’n  thupui sawiin sawihona hun thiam takin a hawng a, kalkhawmte’n hlawkthlak an ti hle. Sawihotute zingah Pu Vanlalhnema’n “Kan khawtlangah hmeichhe pawngsual leh mipat hmeichhiatna hman dikloh tam ta hi kan nula te fengchhing lutuk vangte pawh a niin school naupang hmeichhiate hian kekawr ha ve tawh se” a tih chuan lawm a hlawh hle. Pu Vanlalsawma’n sawihona atangin khawhar in kal chungchanga nu leh pate mawhphurhnan kan hlamchhiah tan ta leh CH section thalaite inpek lehzual a ngaihna sawiin kalkhawmte a fuih bawk. 
Sawiho naah hian thutha tak tak ngaihthlak a ni a, Pu P.C.Lalrinawma  chuan  “Nu leh pa zah hi a pawimawh a, eng dinhmunah pawh ding mah ila min hlangkaitu nu leh pate hi tluk theih an ni lo, chuvangin duat taka enkawl a zah an tul a ni “ a ti. Tin, Tv H.Lalrinmawia pawhin “Naupang kum 15 hnuailam zan leng nasa lutuk pawh hi nu leh pate mawhphurhna a ni in, kan fa te kan zilh ngam tur a ni a, tunlaiin mahni fa te hlau zawk nu leh pa kan tam ta hian kan khawtlang nun a tibuai a ni” a ti. Pu K.Lalramhlunan kan sum lak luh dan kan in hriat tawn dan te, nuai 5 in a thawh theih chin te sawiin, “Ei ru te hi hmusit ngam ila, Kohhran pawh hian hetiang mi te hi hre ngam se” ati bawk. Tin, Pu K.Lalthakima  pawhin, “YMA ten faina kan ngaipawimawh in faina hnatlang te pawh kan nei thin a, tin, bawlhhlawh bawm te pawh kawi tin deuh thawah khai a niin, heng te hi hmang tangkai thin ila, nu leh pa te pawhin kan fa te faina chungchang zirtir nasat a pawimawh a ni” a ti. He inhmuhkhawmah hian CWBYMA Office bearer te an fakawm hle, ei in zawng zawng an buaipuiin, rorel tu mai nilovin an mahni in hmahruaia kalkhawm mipuite ei in an hrai hi an entawntlak hle a ni. 

PUBLIC MEETING 

Chanmari West July 4 : Kumpuan Sub-Commt. leh Chawngbawla Section commt joint meeting ni 24.6.2010 a neih chuan Ch-Section huam chhungah Kumin YMA Kumpuan ‘ Khawtlang nun siam that’ zirhona Public meeting neih tum a ni.
Kan khawtlang inrelbawlna leh khawtlang nun han thlir hian nu leh pa te nena he khawtlang nun siam that hi zirho a hun hle tawh reng a ni. Kan vengin chhiat kan han tawh chang te hian YMA hruaitu lam thlirna a tang chuan a beidawn thlak rum rum chang a awm fo thin, thlanlai tur thalai awm ta mang lote, Ai a upa zahna lo tlahniam ta em em mai te, kan mizo hawihhawmna kan tlakchham zia te, mitthi lumen zana tlaivar peih thalai kan tlem tawh zia te hi hmuhhmaih chi a ni ta lo. kan khawtlang hi zu leh ruihhlo in a run mek a, tuna kan thalai tamtak he ruihhlo bawih a tang mek te hi chhanchhuah an ngai a, an mahni in  he bawih atang hian an tal chhuak thiam lova, nu leh pa leh khawtlang tangrual hian a tlai lutuk hma hian kan theihpatawp kan chhuah a hun ta ani lawm ni. mipat hmeichhiatna lama kan thalai te in hman nasat zia te, mithiam te leh zirchhiang tute sawi ang hi a nih phei chuan Chanmari West nih pawh zahthlak khawp a ni ta e. He kan veng Chanmari West siam tha a, veng entawn tlaka siam tur hian tu innge mawhphur chuang ang le,  nu leh pa leh YMA thalai zawng zawng te kan vaia mawh hi a ni dawn lawm ni? YMA in bul an tum a, a mawh ah ngaiin tan an la a, hei hi nu leh pa te pawh hian inthiarfihlim san lova, theipatawpa tan kan lo lak ve a ngai tawh a ni hi, kan tanrual thiam loh zawngin kan khawtlang hian kan la tuar ngei ang, chutih hunah zawng a tlai tawh si ang a, chhung tinhi mipat hmeichhiatna hman khawloh leh zu leh ruihhlo a vang hian kan la rum ngei ang. Hawh u chu hun a thlen hma ngei hian kan theihtawp chhuah ila, tuna Kumpuan Comt. leh Section Comt. in zirhona hun a buatsaih tur ah hian YMA member zawng zawng leh nu leh pa te kan zavaiin i kal hram ang u.

Hetiang programme hi Section dangah pawh Section Commt. te nen tangrual a neih zel tum a ni

Programme

A hun : 8th July, 2010. (Ninga) zan Dar 7:30.
A hmun : YMA Park.
Chairman         : Pu R.Lalhmachhuana. Chairman Kumpuan Sub-Committee.
Power point Presentation : Pu K.Lalzuithanga, Asst. Secretary
(He mi hunah hian Discussion pawh neih tel tum a ni)
Refreshment Refreshment Refreshment
Banna : Chairman kutah

(He mi zan hian World Cup Semi- final pawh Section lam hmalakna in
Big Screen a en ho tum a ni)

CHANMARI WEST BIAL VOTERS TLEM BER

Chanmari West June 27: Ni 25/6/10 (Zirtawpni) khan D.C. Office-ah Aizawl Bawrhsap Pu C. Thanchhuma hovin Aizawl Municipal Inthlanna tur Electoral Roll enfel turin NGO, Pol.Party aiawhte leh ERO leh AERO te, Officer pawimawhte an thukhawm.

Aizawl Municipal Council Inthlanna hmasa ber tura Electoral Roll hman turah hian VC Electoral Roll chu behchhan niin MLA Electoral Roll nen a inang lo a, Municipal Inthlana Electoral Roll-a tel tur chuan VC inthlan a tel thei chin chauh, Mizorama cheng nghet, ram neitute (Mizote) chauh thun theih a ni a; Gorkhali te erawh chu kum 1950, January 26 hma lama lo awm tawhte leh an thlah kal zelte chu an tel thei a ni.

Municipal Election chungchanga hriattur te :

Draft Electoral Roll chu June 28, 2010-ah tihchhuah a ni ang;

Claims & Objection tih theih hun chhung July 1-10, 2010 a ni a,

Claim leh Objection chinfel hun atan July 12-23,2010 ruat a ni.

Siamthatna leh chhut fel hun chhung July 24- August 4,2010 ruat a ni.

August 6, 2010-ah Final Electoral Roll of Wards peihfel a ni ang.Tuna Aizawl Municipal Ward (Bial) 19-ah hian Electoral Roll-a awm 165241 niin, Ward (Bial) khata Voters tamna ber chu Ward No.18-na (Mission Veng Bial) a ni a, voters 13217 awmin tlemna ber Ward No.6-na Chanmari West Bial a ni a, voters 5771 an awm. Polling Station hi voters 500 – 1200 inkara awm tura tih a nih lain, voters 1200 aia tam awmna 16 a awm a ; 500 tlin lohna 4 a awm. Booth Area te ber PTC Sakawrtuichhun ah voters 229 chauh an awm a ni.

Tuna kan tarlan Draft Electoral Roll hi 2009-a siam a ni a, danglamna tam lutuk lo tura beisei a ni a; mahse inthunluh thar emaw, paih tur emaw sawisel duh tan hun hawn chhung hian vengtin ten uluk taka tan la theuh turin beisei an ni. Pu C. Thanchhuma chuan Political Party tinte chu a dik thei ang ber leh ram tana tha turin Sorkar tawiawm zel turin a ngen a; Party induhsakna leh inngeih lohna lam tilang hauh lova, a fel thei ang bera Roll siam tura tawiawm turin a sawm a; NGO te - YMA, MUP, MHIP ten mahni venga mite chinfel kawngah tha taka sorkar tawiawm turin a ngen nghal bawk.

Chanmari West veng a Enumerators turte chu :-

1. C.Vanlalchhuangi (Machhuangi) Part No.VI/I

2. Lalrinliana (Sir Te-a) Part No.VI/2

3. Lalrinchhana (Rina) Part No.VI/3

YMA DAY ROPUI TAKA HMAN A NI

Chanmari West June 20: YMA Platinum Jubilee (75 Years) YMA Day 2010 chu Mizoram chhung leh Mizoram pawna Mizote chenna hmunah ropui taka hman a ni. YMA Day hi Branch hrang hrang ten khawtlang tana hna tangkai thawhna Ni-ah an hmang a, Branch tam takin thisen pein, a thenin mirethei/hmeithai In an sak sak a, Thlanmual samfai, khawchhung thenfai leh intihhlimna hun atan hman a ni.

Chanmari Westah chuan Ni 15/6/2010 zingkarah YMA Buk-ah YMA Platinum Jubilee lungphun chu Pu T Ngurkhuma’n (President CWBYMA) in a hawng. Hemi ni vek tukthuan eikhamah Chanmari West middle Schoolah YMA Day vawi 75 na chu ropui taka lawm a ni. He hun hi Pu T Ngurkhuma, President in kaihhruaiin Pu R. Lalhmachhuana chuan Khawtlang nun siamthat thupui ah hmangin member kalkhawmte thu a chah. Intihhlimna hun hlimawm tak hman a ni in fiamthu thiam KC Tluanga’n he hun hi a hmanpui bawk. YMA Day denchhena hnam lam intihsiakna a pakhatna Khuangchera Section te’n Cheraw an entir chuan mipui mit a ti tlai hle. YMA Day functionah hian vengchhung zaithiam tak tak te’n hun hmangin kalkhawmte beng an ti tlai hle a ni. Refreshment, Seat arrangement, Light & Sound, Silpauline etc buaipuitu te’n hneh takin an chanvo an hlen thei bawk a ni.

He hun pawimawh takah hian Chanmari West venga mi tlawmngai, mamawhte hnena thisen vawi 10 chuang lo pe tawhte chawimawina hun hman a ni, thisen petute chu hetiangin (Bracket chhunga mi hi an thisen pek tawh zat a ni): 1. Pu PC.Lalrosanga V (10), 2. Pu VL Huma K(10), 3. Pu Zosangpuia K (10), 4. Tv Jacob Lalrinsanga N (10), 5. Pu J.Lalnangliana CH (10), 6. Pu Kawlramvela CH (10), 7. Pu Lalrinsanga T (10), 8. Pu K.Lalthakima CH (10), 9. Pu Lalbiakmawia V (11), 10. Pu Remsangliana V (11), 11. Tv Lalduhawma Hnamte V (11), 12. Pu R.Lalmalsawma V (11), 13. Pu R.Lalngilneia V (11), 14. Pu C.Lalmuankima T (11), 15. Tv H.Lalrinmawia CH (11), 16. Pu C. Lalthazuala V (11), 17. Pu Lalnunhlima Hauhnar T (12), 18. Pu R.Vanlalruata T (12), 19. Pu F.Lalhmingmawia CH (12), 20. Pu C.Lalramzauva (Azauva) CH (12), 21. Pu Vanhmingliana Sailo T (12), 22. Pu PC.Lalawmawia V (13), 23. Pu R.Lalremsiama V (14), 24. Tv Lalhmingsanga Pautu N (14), 25. Pu Lalbiaktluanga CH (15), 26. Tv H.Lalchhuanmawia K (15), 27. Pu J.Lalrova V (16), 28. Pu Lalrimtuia K (17), 29. Pu K.Lalthlanpuia CH (18), 30. Pu Lalsangzuala Hauhnar K (19), 31. Pu Lalchhandama Ralte CH (19), 32. Pu RK.Ramherliana V (21), 33. Pu Jonathana T (22), 34. Pu C.Lalsangzuala V (24), 35. Pu R.L.Thanhnuna T (24), 36. Pu R.Lalnunmawia V (26), 37. Pu RK.Rozidinga T (26).

HNAM LAM INTIHSIAK RESULT

YMA Platinum Jubilee Cultural Dance Competition 2010 chu tluang taka hman zawh a niin YMA Day ah result puan a ni, Result hi medal tally a chhut a ni. Result hetiangin:

1. Khuangchera Section (1st Sarlamkai, 2nd Cheraw) Rs. 7000/-

2. Chawngbawla Section (1st Cheraw, 4th Sarlamkai) Rs 5000/-

3. Vanapa Section (3rd Cheraw, 2nd Sarlamkai) Rs 4000/-

4. Taitesena Section leh Neuva Section Rs 3000/-

Section tinte’n Cheraw bu khat extra an nei theih vek avangin Rs 500/an dawng vek. Tin, Sarlamkai a lam hnem ber lawmman hi Taitesena Sectionin Rs 1000/- an dawng.

YMA DAY

Chanmari West June 13: June 15 (Thawhlehni) hi YMA Day a lo ni dawn leh ta reng mai. Kumin hi YMA din cham kum 75 na a lo ni ve leh reng ta bawk nen Chanmari West Branch pawhin ropui taka lawm tumin ruahmanna a siam a hun hman dan tur pawh hetiangin duan lawk a ni :

1. Ni 14.6.2010(Thawhtan) Zan dar 9:00-ah Branch Secretary Pu R.L.Thanhnuna te In chung zawlah Jubilee mei det tur a ni a, tin, hemi hunah hian Jubilee dar vawi 75 vuak tur a ni. YMA Member te’n ngaihpawimawh a kal a tha khawp mai. Tin dar vaw tura ruatte phei chuan a theihhram chuan pha lo se a tha ngawt mai.Taitesena Section te’n hemi huna kalkhawmte thingpui an buatsaih sak dawn a ni.

2. Ni 15.6.2010(Thawhleh) zing dar 7:00-ah YMA Buk-ah Jubilee lungphun hawnna neih tur a ni a, hetah hian Branch Executive Member,Section Committee,Sub-Committee leh YMA Aw Editorial Board te chu kal ngei tura beisei kan ni. Lungphun hi kan Branch President Pu T.Ngurkhuma’n hawnna a nei dawn a ni. Hemi hunah hian theitui in ho tur a ni in Taitesena Section te’n an buaipui dawn a ni.

3. Ni 15.6.2010(Thawhleh) Dar 10:30 a.m hian Middle School-ah YMA Day lawmna pui ber neih tur a ni a, YMA member leh nu leh pa te chuan ngaihpawimawh a tel vek a tha awm e. Tin, thisen vawi 10 chin lo pe tawhte chawimawina neih tur a nih avangin, chawimawina dawng turte chu kal ngei ngei thei se a lawmawm ngawt ang.

YMA DAY PROGRAMME

A hun : Ni 15.6.2010 (Thawhleh) Dar 10:00 am

A hmun : Chanmari West Middle School.

Chairman : Pu T.Ngurkhuma, President.

Hunserh : Tv Zairemmawia, Executive Member

Branch Report : Pu R.L.Thanhnuna, Secretary

Solo : Nl Jenny V.L.Dinpuii,Neuva Section

Thupui Sawi : Khawtlang Nun Siamthat

Sawitu : Pu R.Lalhmachhuana, Fin.Secretary

Solo : Nl Zorinpuii, Khuangchera Section

Thisen pe te

Chawimawina : Pu Lalthuamluaia,Vice.President.

Extempore Speech : Pu C.Lalzarliana, Treasurer

Hnamlam result puan

leh lawmman sem : Cultural Dance Org. Coommittee

Solo : Tv C.Zonunmawia,CH Section

Fiamthu : Tv K.C.Tluanga,Neuva Section

Lawmthu sawi : Pu K.Darthantluanga,Asst.Secretary

Banna : Chairman kut-ah

Cheraw : Lawmman 1 na la atangin

REFRESHMENT

HNAM LAM INTIHSIAK NEIH A NI

‘YMA Platinum Jubillee Cultural Dance Competition 2010’ chu Ni 12/6/10 (Inrinni) khan neih a ni. He intihsiak hi Tv. V. Biaknghinglova’n kaihhruaiin Art & Culture Joint Director Pu Ngurbiaka chu khuallian a ni. He intihsiakna ah hian Seat Arrangement Neuva section te’n buaipuiin Property Sub-comm. in Light & Sound System an buaipui a, refreshment tuihnai tak Khuangchera section te’n an buaipui bawk a ni. Result hi YMA Day a puan tura ruahman a ni. Lawmman hi 1 na - Rs 7000/-, 2 na Rs 5000/-, 3 na Rs 4000/-, Participation Prize Rs 3000/- (section hnih tan), Cheraw bonus Rs 500/- theuh leh sarlamkai entir tam ber Rs 1000/ te a ni.

Kum thar CHANMARI WEST SPORTING CLUB Committee peng hruaitu thar

Chanmari West June 6: Kum 2010 Season chhung hian Sub-Committee Pathum Football Sub- Committee, Volleyball Sub-committee, Badminton Sub-Committee te siam a nih bakah Game displine dangah Manager leh Asst. Manager te ruat a ni.

Football Sub- Committee

Chairman : Pu RK.Rozidinga

Vice Chairman : Pu H.Vanlalvena

Secretary : Pu Lalchhuanliana

Treasurer : Tv Zohmingliana Tlau

Fin.Secretary : Pu John Zosangliana

Volleyball Sub-Committee

Chairman : Pu H.Lalramhluna

Vice Chairman : Pu C.Lalthanzuala

Secretary : Tv Israela

Treasurer : Dr. Lalramliana

Fin.Secretary : Pu F.Lalhmingmawia

Athletic

Manager : Pu Lalramhluna

Asst. Manager :

Tv. Zohmingliana Tlau

Pu Gordon Zosangliana

Pu C.Vanlalhruaia

Basketball & Cricket

Manager : Pu R.Lalsangzuala

Asst. Manager :

Tv. Lalnunhlima

Pu F.Lalhmingmawia

Tv. Henry Lalremruatpuia

Pu Vanlalhluta

Badminton Sub-Committee

Chairman : Pu Lalbiakhlua

Vice Chairman : Pu RK.Ramherliana

Secretary : Pu Vanlalhluta

Treasurer : Pu Lalliansanga

Fin.Secretary : Pu Lalchhanhima

Table Tennis

Manager : Pu RK.Ramherliana

Asst. Manager : Tv. Lalfakzuala

Pu Vanlalhruaia

Contact Sports

Manager : Pu Zonunsanga

Asst. Manager : Pu H.Laltanpuia

Pu Zoramthara

Tv Lalnunzawma

Kum 2010 chhunga Sporting Club member tur Club hruaituten an rawn la leh dawn a , kum 8 chhin chunglam a duh a piang tan Club member a nih theih ang a, Membership fee hi Rs. 5/-a ni.

Basketball Player te Pu R.Lalsangzuala hnenah registration a tih theih a, Player te a rang lama tih fel tur a ngen an ni. Football Player 3rd leh 2nd Div te pawh Player registration Pu Lalchhuanliana hnenah tih theih a ni bawk e.

Hnam lam intihsiaka tel turte hriattur pawimawh

Chanmari West Branch leh Zofa Cultural Club tangkawpin an buaipui ‘YMA PLATINUM JUBILEE CULTURAL DANCE COMPETITION 2010’ chu Ni 12/6/10 hian chaw hma dar 10-ah neih a ni dawn. Hemi huna section tina lam tur te leh hruaitute tana hriattur pawimawh tak tak a awm a, chungte chu:

1. Cheraw ah hian minute bituk a awm lovang

2. Sarlamkai hi minute 8 chhunga khunglen tur a ni.

3. Section tin lam hun tur hi a hmunah pawh chawp a ni ang.

4. Point belhkhawma a sang ber pakhatna a puan a ni ang.

Endiktu turte chu Art & Culture Department a instructor/instructress te an ni ang. Engemaw harsatna (thubuai / hlabuai) awm palh thei a ni, chutiang a thleng a nih chuan Technical Committee in thutawp a siam ang.

HNAM LAM INTIHSIAKNA TUR ZIR MEK A NI

Chanmari West May 23: YMA Platinum Jubilee denchhena Section wise hnamlam intihsiak ‘YMA PLATINUM JUBILEE CULTURAL DANCE COMPETITION 2010’ inbuatsaihna chu ngawrh taka kalpui mek a ni. He competition hi Ni. 12/6/10 a neih tur a niin ‘Sarlamkai’ leh ‘Cheraw’ hmangin Chanmari West Indoorah intihsiak tura ruahman a ni.

He inbuatsaihna ah hian Section tin hruaitute an fakawm hle, thahnemngai taka memberte khawrh chhuakin zantin lam hi zir a ni. Section tinah hnam lam hi Zofa Cultural Club (ZCC) member te’n an zirtir thin. Hnam lam zir hi thenawm khawveng hnaite tan bengchhengin ninawm viau mahse Mizo hnam hmakhua a nih avangin tuar hram hram a tha hle a ni.

KUMPUAN COMMITTEE KAMCHHUAK

1. YMA Kumpuan 'Khawtlang nun siamthat' bawhzui nan Section tinah Section Committee te nen tlangtlangin Section chhung YMA member, Nu leh Pa te nen Khawtlang nun siamthat chungchang zir ho tum a ni a, he programme hi June - August thla chhunga neih zawh hman tum a ni.

2. Kumpuan kaihhruaina in a sawi angin Do ngai te Zu leh Ruihhlo Veng chhunga a awm a rem ti lova, zuruih buai leh khawlai a bengchhen te, midang tana hnawksaka awm te hi khawtlang dan kalh tlat a nih avangin theihtawpin a do zel dawn a, Tin, heng do ngai do kawng ah hian Section tin te thahnemngai leh zuala khawtlang tan a ni tih hre renga hma la zel turin a ngen tak meuh a ni.

3. Kumpuan Committee hian Zu leh Ruihhlo lama harsatna neiten chhanchhuahna an chan theih nan theihtawpa hmalak a tum a, helam a harsatna neite chuan Kumpuan Committee te hnenah engtiklai pawhin a thlen theih a, chumi kawng ah chuan YMA member te leh Veng chhung Nu leh Pa te pawhin thahnemngai taka an tawiawm tlat a beisei a ni.

4. YMA member, thalai zawng zawng te kan mizo tlawmngaihna / Zonun zemawi chhawmnung zel tur leh tanpui ngaite tanpuina kawngah pawh nasa leh zuala taima turin a ngen a, helam hawi inzirtirna pawh Section tina neih turin hma a la mek a ni.

(Kumpuan Committee member zawng zawng leh Branch OB te zanin dar 8:00 ah Kumpuan duty neih tur a ni a, YMA Parkah in nghahkhawm tur a ni ang).

BRANCH COMMITTEE NEIH A NI

Chanmari West May 23: Ni 18/5/10 zan khan Branch Executive Committee vawi 7na chu Pu HV Lalthavela K Section te inah neih a ni.

He committeeah hian committe hmasa thurel bawhzui dan Secretary hnen atangin ngaihthlak a niin sawizui nghal a ni:

1) Kumpuan Hawnna inkhawmah Branch YMA a nihna nei zawng zawngte leh vengchhung a chhungkaw tin aiawhzo tur kalkhawm tura inngen chu kalkhawm that tawk loh thu ngaihthlak a ni. He inkhawma thupui hawngtu thusawi chu Video copy siam a ni a, a duh apiang lei theih turin Kumpuan subcommittee te’n an buaipui dawn a ni.

2) UD & PA Deptt in BPL Survey tura an rawn ngenna chu sectionte hmalakna zarah zawh tahwkhat a ni.

3) Branch YMA Guitar chu chang duh an awm chuan tihral nise, Rs 1000/- aia hniam lovin chhan tir nise tih a ni.

4) Section Wise Hnamlam intihsiakna turah ZOFA Cultural Club te’n Rs 25000 an thehchhuak chu committee chuan lawmawm a ti hle a, Branch YMA chuan Rs 10000/- thehchhuah ve nise tih a ni.

5) CYMA leh SSA thawhhona MoU No 1 in a tarlan angin, naupang sikul kairual sikul kai lo kum 6-14 inkar zawnchhuah hna chu section te’n hma lo la se ni 10/6/10 hma in Branch Secretary hnenah thehluh tum nise tih ani. Sikul kai lo zawn turah hian an hming, nu/pa hming leh kum ziahlan tur a ni.

6) YMA Platinum Jubilee denchhena ni 26 & 27/8/10 a kum 45 hnuai lam lengkhawm zai intihsaiknaah chuan tel loh mai nise tih hrih a ni, thuleh a awm a nih chuan boruak awmdan a zirn ngaihtuah nawn leh mai nise tih a ni bawk.

7) YMA Platinum Jubilee lawmna tur atan Aizawl khawchhunga Branch YMA, a thei apiangin Rs 1000/- aia tlemlo thawh tura min ngen angin Rs 1000/- thawh nise tih a ni.

8) YMA Platinum Jubilee lawmna atan mi chanhai leh mamawhtute tan ni 26/6/10 khian thisen pek nise tih a ni. Record siam tum a nih avangin section tin te’n thisen petur zawng chhuakin ni 20/6/10 aia tlai lovah Branch Secretary hnenah thehluh nise tih a ni.

9) YMA Day hman dan tur chungchang sawiho a ni a, sawihona eng atangin Branch O/B, Section Leader theuh leh Editor YMA Aw te’n lo siam rem se tih a ni. Tin, YMA Day pual hian kan vengchhunga mi harsate hnenah YMA Day Present hlan nise, present dawng turte section te’n lo zawngin hi ni 31/5/10 hmain Branch Secretary hnenah hriattir nise tih a ni.

10) YMA Park a motor park thinin harsatna a thlen chhoh mek chu sawiho a ni. Parkah hian zan riaka motor dah phal loh a nih avangin a hungna mawi hnaitak Park sub-comm te’n lo buaipui se tih a ni. Tin, sub-centre kawtah pawh motor dah phalloh a nih laiin motor dah a la ni fo chu dah a nih tawhlohna tura hma lo la turin Park sub-comm leh N-sec te hma lo la turin ngen an ni.

11) Branch YMA Plastic chair Neuva Section in Pasaltha Neuva ina dah an rawn dilna chu phal sak an ni. Tin, chhinchhiahna la awmlote pawh chhinchhiahna lo siam se tih a ni. Chair hi hmundangah hman duhna a awm a nih chuan Neuva section in hma lo la zel se tih a ni.

KUMPUAN HAWN A NI

Chanmari West May 16: Ni 14/5/10 (Zirtawp) zan khan Chanmari West Branch YMA chuan kumpuan hawnna a nei.

Central YMA kumpuan ‘Khawtlang nun siamthat’ hawnna programme CWBYMA in a hman hi Pu Lalthuamluaia Vice President CWBYMA in a kaihruai a, Nl K. Lalthanpuiin Pathian hnena he inkhawm a hlan hnuah Nl Maggie chuan thiam tak maiin ‘Tlanna mak’ hla sa in kalkhawm mipuite a awi. Kumpuan hawnna thuchah hi Pu Vanneihtluanga’n a sawi a,

Pu R. Lalhmachhuana Fin Secy CWBYMA leh Chairman, Kumpuan sub-com chuan lawmthu sawina hun a hmang. He inkhawmah hian Pu Lalthuamluaia chuan he kumpuan pawimawhzia sawiin “Mimal thawh tur bik a ni lova, keimahni theuh hi a mawhphurtu kan ni tih hi homeworkah nei theuh ang u” tiin kalkhawmte a chah. Tin, Pu T. Ngurkhuma President CWBYMA chuan ‘YMA hi zirna in pawimawh tak a ni a, zirtu leh zirtirtu kan nih vek avang hian i tang sauh sauh ang u’ a ti bawk. Kumpuan thupui sawi hawngtu Pu Vanneihtluanga chuan “Do ngai kan ramah hian a awm a, tha kan thlah ruala rawn pawng nghal zat chu RUIHHLO a ni”a ti. A sawi zel naah hmeichhiat mipat hman khawlohna ah kan insum theihloh avang hian “Mizoram hi pul thei reng dinhmunah kan ding a ni” a tiin “Veng thanglai tan chuan thil enchhin hunlai a ni, Khawtlang hruaitute’n

khawtlang thatna turin ‘enchhin teh ang’ tih an nei a nih phawt chuan phunnawi loh tur, a tha lo a nih chuan a ngaiah an letpui leh em em ang che u” a ti bawk He inkhawm a hlawhtlinna tura section tinte mawhphurhna Branchin a pek chu tha taka an tih hlawhtlin a vangin section tinte leh sub com. te chungah Branch chuan lawmthu a sawi mawlh mawlh a ni.

FAMILY LAND RECORD SURVEY

Family land record survey chu Sawrkar leh Central YMA hmalaknain khaw tin a in tinah neih a ni dawn. Kan veng chhungah pawh Branch hmalaknain Section tin hruaitute’n in tinah survey an rawn nei ang. He survey hian pawimawhna tam tak a nei chungte chu : Ram mamawh tak takte hriat theih na’n, Khua leh tui rammi dik takte chauhin ram neitu nihna an neih theih na’n,

Mi hausa leh thei bikte’n mi dang an nep chek lutuk tur ven na’n, Ram hralh a sumdawngte ven na’n, Chhiah dik leh kim zawka khawn theih na’n, Ram development ti thuanawp khawpa ram pass leh compensation pung thut ven na’n, Ram singsak felna (Land reforms) bul tanna tur a ni, Ram neih theih chin bituk (Land Ceiling act and rule) tlawh chhan atan etc. Tin, he Land record atang hian Patta/Pass book siam a ni anga, chu chu khua leh tui nihna lantirtu leh Department dang hmalakna atan pawh phut thin a ni ang. He patta/pass book hmang hian chhiah lak a ni ang a, heta tang tho hian ram dilte enfiahsak anni ang. He land record a chuang lo chu ram neilo anga ngaih tur a nih avangin ram neih ang chu kim taka formah hian ziahluh

tur a ni a, zep then a awm a nih chuan an zep then lai ram kha ram ruak anga ngaih tur a ni. Tin, a form a intiamna ah pawh hian family head ngeiin sign tur a ni. He survey hi tan nghal mai a ni dawn a, chhungkaw hotu ber EPIC No., mahni LSC, Huan Pass, Periodic Patta No.etc lo inrinlawk theih nise a lawmawm ngawt ang