YMA  GENERAL  CONFERENCE  2010 
A TIAK TA

(KUMPUAN BAWHZUI THA LAWMMAN 3na KAN DAWNG)

Chanmari West October 24: 65th YMA Gen. Conference, Ni 19-21 Oct.2010  chhunga neih chu a tiak ta.. Lunglei a nghah YMA Conferenceah hian Rorel Palai 1097 an kal a. Rorel palai bakah Chhimtu palai hi 3000 chuang niin, palai kal zingah hian C. Thanmawia (89) Khatla Br. chu upa ber a ni a, C. Zoremmawia (11) s/o C. Zoramliana (L) Tuikual chu N Br chu naupang ber a ni. Chanmari West Br. atangin member 16 an kal a, Mizoram a Branch YMA 800 chuang zingah Kumpuan bawhzui tha lawmman 3 na (Certificate leh ` 2000)  an rawn hawn a ni. He Conference chhunga thil thleng langsar zingah Usher zinga mi Tv Zodinsanga Lunglei Chanmari Br. a mi chu  ni19/10/10 zan khan Bike in a chesual palh a, Aizawl Civil Hospitalah phurh phei niin nikhaw hrelovin a awm a ni. Rorel tlangpuite chu -
1. Kum 2010-2011 CYMA Budget atan ` 72,20,864 pawm a ni.
2. YMA KHAWIH 
(1) YMA kalphung inzirtir uar ni rawh se
(2) Kan ram thing chereu zel tur ven nan Kuang atan thingphel hmang tlem turin leh remchang dang hmang zawk turin CYMA in hma la rawh se.
(3) Mizo hming hawha hnamdang sumdawngte titawp turin CYMA in hma la rawh se.
(4) Reserve Bank of India phalna nei lo, a pung tam tak pek tiama mipuite sum la lut thinte khuahkhirhna dan hi khauh taka kenkawh a nih theih nan CYMA in hma la rawh se.
SORKAR KHAWIH
(1) Mizoram Drugs Control Act hi kan ram mil turin siam ni ve rawh se
(2) National Highway 54 hi sorkar-in National Highway a nih angina enkawl rawh se
(3) Mizorama kawngpui hrang hrang te hi tun aia tha zawka siam turin sorkar ngen ni rawh se.
(4) Halpuah leh halmawi hi engtik hunah pawh khap chhunzawm zel turin sorkar ngen ni rawh se.
3. Kum 2011 YMA General Conference thlen diltu Sihphir Joint YMA leh Sub Headquarters YMA, Kolasib te chu Secret Ballot a Vote lak a ni a. Kum 2011 YMA General Conference chu Sub-Headquarters YMA, Kolasib ten Kolasib-a an thlen tura thlan a ni.
4. Kum 2010-2011 Kumpuan atan ‘Khawtlang Nun Siamthat’ pawm a ni.

MPF COMMON PLATFORM 
MIPUIIN HLUT

Mizoram People Forum (MPF), Chanmari West buatsaih AMC inthlan lo awm tur a Ward VI-na Candidate te tana Common Platform chu mipuiin an hlut hle. He hunah hian Bialtu MLA Pu Lalthanzara pawh a rawn tel ve a ni.

He hunah hian MPF Chairman Pu PC Lalnunthara (Pres. Upa) chuan kaihruaiin Pathian hnena hlanna hun a hmang a, Pu R. Lalhmachhuana Secy chuan MPF hmalaknate leh kalphung a sawi bawk. Pu C. Lalzarliana Jt Secy chuan lawmthu sawina hun a hmang a, Chairman in ‘Kristian kan nih angin candidate te leh an party te’n thudik chauh aupuiin tan i la, thu puarpawleng mai mai aupuiin inepna’n hmang lovang u’ tiin he inkhawm hi a khar a ni.

Kan Candidate te’n inbuatsaihna thatak hnuaiah thu tha tak tak an sawi a Pi Biakhluni chuan thu sawi hmasa in ‘Ram leh khawtlang hmasawnna atan hian tawng chidang thiamlo pawhin Pathian hruaiin engkim kan ti thei a ni, mipuite kan tanrual a ngai’ a ti. Pi Zamanthangi chuan ‘Politics ruihchilh lovin rilru thiang tak hmangin mipuite’n vote i thlak ang u’ a ti bawk. Floor atangin zawhna pathum ve ve chhan phalsak a nih laiin zawhna 4/5 vel ve ve zawh anni in felfai takin an chhang thei bawk a ni.  He inkhawm hi veng mipuite’n an hlutin kalkhawm pawh an thahnem hle a, mipuite thutna leh sound system buaipui tu CH Sec CWBYMA te an fakawm hle.

AIZAWL MUNICIPAL COUNCIL - WARD NO - VI  CANDIDATE TE BIHCHIANNA

CONGRESS & ZNP CANDIDATE PI BIAKHLUNI:

Pi Biakhluni hi 28th October, 1958 ah a piang a, Vanlalbela leh Vanlalthangi fa 8 te zingah a naupang ber dawttu a ni. Tunah hian K-Sec  (K-20) Chanmari West-ah an chhungkuain an cheng mek a ni.

Ram leh khawtlang tana inpe mi a ni Chanmari West VC ah kum 2002 atangin thlantlin a la ni char char, 2002-2006 chhung VCP a ni a tunah hian VC member nilai mek a ni bawk.

Rampum huap chuan kum 1991 atanga 2002 chhung Headquarters Mahila Executive Committee a ni a, 2003 - 2010 thleng hian Joint Secretary a ni, kum 2008 atangin Aizawl North III Block Congress Committee Presidentah thlan tlin niin tunthlengin he dinhmun hi a la chelh chho mek a, kuminah MPCC Executive Committeeah thlan a ni leh bawk a ni.

MHIP ah Headquarters Executive Committee member a ni a, Panchayati Committee-ah treasurer niin Social Welfare Deptt hnuaia Advisory Board-ah Member nilai a ni bawk.

Kohhran lamah chuan Salvation Army niin, Home League Council member leh League of  Mercy Council member a ni bawk.

MNF & MPC CANDIDATE PI ZAMANTHANGI:

Pi Zamanthangi hi 3rd Sept, 1961 ah Phuaibuang khuaah a piang a, Sanghleia (L) leh Thangthluaii te fa 6 te zinga a naupang ber dawttu ni. Tunah hian K-Sec Chanmari West-ah an chhungkuaiin an cheng mek a ni.

Kum 1981 khan Phuaibuang High School atangin HSLC a zova, Kum 1984 ah Pu F. Lalrova nen an innei a, pasal nei chunga college kal tha lehin 1986 ah PU (Arts) thatakin a zo a ni. Zirna lama rualawt tak a nih avangin  harsa tak chung pawha fate lehkha zirtirin a fate hian High School an zo vek tawh a ni.

Ram leh hnam vei tak leh khawtlang thatna tura rilru sengin MPC partyah a awm a. MPC Women Wing Gen. Headquarter-ah Gen. Secretary kum 4 lai a chelh a, tin, MPC Gen Hq ah Executive Member a ni tawh bawk.

Politics a chawlhsan hnuah khawtlang tana inhmang lehin kum 2009 & 2010 ah Chanmari West Br MHIP President ah thlantlin a ni. MHIP President a nih chhungin vengchhungah hmasawnna thil thar duhawm tak tak a awm a ni.

Kohhran lamah Presbyterian Kohhran niin, Inkhawm tantu, Kohhran Hmeichhe Bial puitu leh hmeichhe inkhawm a pulpit sermon nei thin a ni. 

MPF IN COMMON PLATFORM BUATSAIH DAWN 

Chanmari West October 17: Mizoram People Forum(MPF), Chanmari West bultumin 18.10.10 (Thawhtan) zan hian Ni 3/11/10 a AMC inthlan lo awm tur a Ward VI-na Candidate te, veng mipuite’n an hriatchian lehzualna’n Chanmari West Br. YMA Parkah zan dar 7:00 a tan turin Common Platform buatsaih a ni dawn. Candidate te’n thusawina hun an hmang ang. 
MPF hian inthlan lo awm tur atan NGO, Kohhran hruaitu leh Party tinte nen inrawnkhawmin thuchhuah, candidate te leh mipuite hriat leh zawm tur atan ngenna an siam, avaia tarlang lovin a pawimawh zual kan rawn tarlang e, hetiangin:-
 i) Inthlan hautak leh senso sang lutuk awmlo turin theihtawp chhuah theuh ni se.
 ii) House to house campaign hi thil diklo tam tak inphumruk theihna leh senso siam theitu a nih avangin tih loh ni se.
 iii) Sum leh therhlo hmanga vote lei leh hralh hi tih loh nise.
iv) Mipui, pawl hrang hrang leh kohhrante pawhin political party leh candidate te hnenah thil phut neih tur a ni lo.
v) Thawm bengchheng siam loh leh mahni mihring puite zah/pawisak.
vi) A tak ram thleng thei tur leh tihhlawhtlin tur, policy leh programme duan ni se.
vii) Mimal chungchang thudik ziktluak lo hmanga in beih loh ni se; Party policy leh programme hi campaignna leh inzawrhna atan hman ni se.
viii) Party Candidate te chu Mi hmingtha, mize nghet leh rilru puitling ni se; mi taima leh rinawm; diklo leh kut tling lova sum leh thil dang hmuh tum lo mi etc.
ix) Party tin/Candidate te’n inthlan ni ah vantlang tana thingpui lum hi tih loh ni se.
x) Polling Booth area bul hnaia Electoral roll en leh number pek chhuah hi Political Party-ten a mala buaipui lovin, MPF kaihhruainain, fimkhur taka buaipui ni se.
Heng thawhhona thuthlung hi bawhchhia an lo awm a, finfiah ngei a nih chuan MPF in a zau thei ang leh a remchan dan angin vengchhung PA system/ nitin chanchinbu/ Local TV-etc, ah te puanzar an ni ang.

YMA  GENERAL  CONFERENCE  2010

65th YMA Gen. Conference, 2010 chu  Ni 19-21 Oct. hian Leitlangpui Run, Sub-hqrs., Lunglei-ah neih a ni dawn. CWBYMA member Conference kal duh hming la pe lo kal tum si awm a nih chuan Br. Secretary hnenah zawhfiah ni bawk se. Kal tur mahni motor ken tumte pawhin a theih hram chuan hruaitute hriattir a finthlak khawp ang.
Conferenceah hian rorel bakah, programme a a landan chuan malzai-91, thusawi-20, hnamlam-5 zaipawl-28, fiamthu-5, fashion show-1, Hawaiin guitar solo-1 leh a dangte pawh ngaihthlak leh en tur a awm dawn a ni
Chanmari West Branch hi Counter No 10, YMA information Centre, Rahsi Vengah in report tur a ni. Palai kaltute’n an lo hriat atan Lunglei Traffic rules hetiangin tih danglam hret a ni: 
1.L.P. Thangzika Point (Tlabung peng) leh M.S. Point (Bazar veng) inkar a Parking area zawng zawng hi YMA conference chhimtu te tan reserve a ni. Hemi chhunga Private motor park thin ten hmun dang hmun dang Private parking ah motor te an park tur a ni. Pick-up stand  a ding zawng ten Chanmari Biak In thlang kawngpui phei remchang lai Parking nan an hmang ang a. Tata 407 Stand hmangtuten Parallel Road a, kawngpui zau lai remchang apiangte Parking nan an hmang bawk ang.
2. Tlabung peng atanga Thuamluaia Mual panna kawngah YMA Conference function awmlaiin motor lian tlan luh phal a ni lo.
3. Thuamluai Mual chhak kawng, Bazar High School panna lam kawng hi Two Wheeler tan One-Way a ni ang a, chho zawng/haw lam chauh tan kal phal a ni.

  

AIZAWL MUNICIPAL COUNCIL KAN 

IN THLANG DAWN E

Chanmari West October 10:   Aizawl Municipal Council inthlan chu Nov 3 hian neih a ni dawn ta.


AMC Inthlan atan hian Municipal Returning Officer pathum (3) ruat an ni a, berawn duhte tan an Telephone No. ah te hian biak theih an ni : 


1.    Pu J. Hmingthanmawia, MCS             2329205 (O)
    Addl. Deputy Commissioner &             2323164 (R)
    Municipal Returning Officer
    (Ward No. I - VII)
2.    Pi Sangchhin Chinzah, MCS             2322115 (O)
    Addl. Deputy Commissioner &             2335223 (R)
    Municipal Returning Officer
    (Ward No.  VIII - XIII)
3.    Pi Lalzarmawii, MCS                 2301779 (O)
    Jt. Director, DM&R and                 2318621 (R)        
    Municipal Returning Officer
    (Ward No. XIV - XIX)
 
MRO hnuaiah hian Assistant Municipal Returning Officer pahnih (2) theuh an awm bawk ang. Heng bakah hian Election Observer tur mi 10 ruat an ni a, Model Code of Conduct Monitoring Cell pathum (3) din a ni bawk.
Aizawl Municipal Council inthlan hmasaber atana hriattirna chu Mizoram Gazette-ah tihchhuah a ni a, chuh tumte tan hming thehluh hun leh inthlan chungchanga hriattur pawimawh te chu a hnuaia mi ang hi a ni :-


1.  Hming thehluh theih hun                            : 11th October, 2010 thleng
2.  Nomination Paper endik hun                    : 12th October, 2010    
3.  Inhnuhdawh theihna hun                          : 14th October, 2010 thleng    
4.  Inthlanni                                               : 3rd November, 2010
                 (7:30 AM - 4:00 PM)
5.  Vote thlak that a tul chuan vote thlak ni     : 4th November, 2010
                                         (7:30 AM - 4:00 PM)
6.  Vote thlak that a tul loh chuanin vote         : 4th November, 2010      
      chhiar hun                                                                (9:00 AM onwards)
7.  Vote thlak that a tul chuan vote thlak ni    : 8th November, 2010
            (9:00 AM onwards)    
8.   AMC inthlan leh a kaihnawih hna reng reng chu ni 16th November, 2010 ral hmaa zawh fel vek tur a ni
    
AMC Inthlan tur hian Veng hrang hrang 76 huamin AMC huam chhungah hian Polling Station 174 a awm a. Inthlan atan hian Election Commission of India chuan EVM 240 hman a rawn phalsak tawh a ni. EVM te enfiah hmasak ber chu 7th-8th Oct, 2010 hian DC Office Conference Hall-ah neih a ni bawk a ni.
Chanmari West hi Ward No.VI kan ni a, hmeichhe thlan tlinna tur bial kan niin Hunthar leh Edenthar te nen a awmho tur kan ni. Hriat theih chinah zirtawpni thlenga Chanmari west ward a nomination file te chu hetiangin:
Congress/ZNP          : Pi Biakhluni, Chanmari West
MNF/MPC : Pi Zamanthangi, Chanmari West  

CHANMARI WEST BRANCH YMA IN 

LAWMMAN 2na DAWNG

Chanmari West October 3:   Ni 1/10/10 (Zirtawp) khan Association for Voluntary Blood Donors  (AVBD) leh MSACS tangkawp chuan Vanapa Hallah VOLUNTARY BLOOD DONATION DAY an hmang.
He hun hi Dr Eric Zomawia, Project Director, MSACS chuan kaihruai in Pu Lalchungnunga President CYMA chu Chief Guest a ni . Pu C. Lalnunnema GS, AVBD chuan report pe in “Kumin January atanga August in karah Damdawiin hrang hrang thisen pek za a 75.24 chu a mamawhtu apiangte tana a thlawna pek a ni a. Hei hi a vaiin Thisen Units 10610 a ni a, A thlawn a thisen petute hi kumtin an pung deuh deuh” a ti. A sawi zel naah chuan “January- August chhung hian thisen pek zawng zawng hi Units 14101 a ni a, Units 10610  chu VoluntaryDonation a ni. Sept 2009 atanga  August 2010   chhunga pawl hming a thisen pek hi Blood Bank 10-ah units 12944 a ni. Mizoramah thil tha lam kawng a hmasawnna ah voluntary blood donation a hmasawnna hi a thang chak ber pawl a ni a, 1993-ah 01.79%, 2000-ah 13.63%, 2002-ah 36.41%, 2008-ah 64.90%, 2010 ( Jan- Aug) - ah 75.24% a ni” a ti bawk.
Hemi ni hi a thlawna thisen pek pawimawhna in zirtirna hun atan hman a niin pawl hminga thisen pe tha zual te chawimawina hun hman a ni. Lawmman hi Category 4-ah thenin pakhatna dawngtute hetiangin:  Unit 352 pe tu NSS Govt Hrangbana College; Unit 286 petu Ramthar Branch YMA; Unit 150 petu KTP Chaltlang Branch; Unit 124 petu 3rd Bn MAP. 
Chanmari West   Branch  YMA chuan unit 206 pe in NGO hminga Mizoram puma vawikhata thisen pe tam ber lawmman 2na (Dekchi lian) kan dawng, hei hi Chanmari West thalaite inpekna vang liau liau a niin khawtlang hruaitute pawh an lawm hle a ni. AVBD Secretary  chuan pawl hminga thisen pe tha zual chawimawina an pek chhan chu hun lo kal zel turah thil tha intihhmuh a inelna atana ti an nih thu sawi.

TAITESENA SECTION BUNGRAW IN HAWN A NI

Chanmari west Br YMA Buk a Taitesena Section bungraw in chu Ni2/10/10 (Inrinni) zingkar khan hawnna hun hman a ni. He hawnna inkhawm hi Pu Lalngaihawma Asst Leader T-Sec YMA chuan kaihhruaiin, Pu T Ngurkhuma President CWBYMA chuan a hawng. Pu C. Lalmuankima,  Leader T Sec YMA/Work Supervisor chuan report a pe a, he hna thawh theihna atana sum petu UD&PA chungah leh Branch hruaitute leh memberte chungah lawmthu a sawi bawk. Tin, Br. YMA Adviser Pu HVL Zarzoenga’n thusawina hun a hmang bawk a ni.   Hun hmangtute hian bungraw in changtlung tak mai T-section te’n an puitlin thei hi a lawmawm zia an sawi.

T. Ngurkhuma Pres. CWBYMA in T-Sec bungraw in a hawng

BAWLHHLAWH PAIH TURIN V/C IN MAWHPHURHNA LA

Chanmari West September 26:   Chanmari West vengchhunga bawlhhlawh paih a mawhphurhna chu UD & PA nena inremsiam angin Chanmari West V/C in mawhphurhna a la dawn.
Chanmari West V/C leh UD&PA, Mizoram sawrkar inremsiam tawn angin bawlhhlawh paih motor chuan October ni 4 atangin kartin thawhtanni leh nilaithawhtanni zingah Chanmari West a bawlhhlawhte a rawn phur thin tawh dawn a ni. Bawlhhlawh paihna motor lo channa tur hian hmun (point) hrang hrang ruahman  a ni a, heng point siamna nilo hmun dangah paih phal a ni dawn lo. Tin bawlhhlawh paih tum motor nang hmanlote an awm a nih pawhin mahni bawlhhlawh hawn leh mai tur a ni a, heng paihna point siamah te hian bawlhhlawh hnutchhiah a rem dawn lo a ni.
Bawlhhlawh paihna motor channa hmun turte hetiangin:
1. Salvation army Biakin bul, Turning Point. ‘N’
2. Pu Dengthanga Point ‘K’
3. Pu K. Hmingliana Point ‘K’
4. Pi Biakhluni Point ‘K’
5. Pu Zothansanga Point ‘K’
6. Pu RK Daniela Point ‘K’
7. Pu R. Rohnuna Point ‘T’
8. Pu H. Lalthlamuana Point ‘T’
        9. Pi Lianchhingi Point ‘T’
     10. Pu J. Kapthianga Point ‘T’
     11. Pu Lalmalsawma (Sena) Point ‘T’
     12. Pu P Zakhuma Point ‘T’
     13. Pu Lalthara Point ‘CH’
     14. Kawipui Point ‘CH’
     15. Pu Ramparliana Point ‘V’
     16. Pu R. Kawlkunga Point ‘V’ 

CHANMARI WEST V/C TE’N THUCHHUAH SIAM

  Chanmari West  V/C chuan ahnuaia mi ang hian thuchhuah a siam:
I. Ui leh Ar khuahkhirh chungchang: Ui leh Ar, ranvulhtute’n pawnah chhuahtir/tlattir phal a ni lo. Tilui an awm a nih chuan Ui-ah ` 200 leh ar-ah ` 100 a neitute’n an chawi ang. Mahni ran vulh theuhte i khuahkhirh ang u.
II. Kawngpui dunga mototr dah thinte, mihring leh lirthei dang kalna tichep khawpa motor dah lo turin an in ngen nawn leh a, hetiang tilui te chu thuneitute hnenah thlen a nih pawhin sawibuai theih a ni lovang.
III. DLAO atanga thu hmuh angin kum 2010-2011 ranchhiah (animal tax) khawn a hun leh ta a, V/C te’n hun remchangah an rawn khawn dawn a, ranvulhtute an hriattir lawk a ni.
IV. Ruah sur laiin septic tank sah thin an awm tih hriat a ni a, hei hi ti tawh lo turin an ngen a, tilui an awm chuan sawrkar thuneitute hnenah thlen a nih pawhin sawisel theih a ni lovang.
V. Chanmari West NLUP Implementing Board ruat thar an ni. Hengmite hian NLUP dawng tur thlante an endik ang a, NLUP pawisa sawrkarin a sem atangin heng Board memberte hian mawhphurhna an la dawn bawk a ni
Board memberte chu hetiangin:
1. Pu B. Ropianga (Rev.)
2. Pu Lalrinawma (Pres. Upa)
3. Pu Vanlalsawma
4. Pu T. Lalthangfala
5. Pu R. Lalhmachhuana
6. Pu Saithanchhunga (UPC Upa)
7. Pu K. Lalzuithanga
8. Pu Lalmalsawma Sena
9. Pu Lalsangzuala Hauhnar (Pres. Upa)
10. Pu Zothangzuala Chhangte (Pres. Tual Upa)

PUBLIC MEETING - 

KUMPUAN BAWHZUINA KALZEL

Chanmari West September 19:   Ni 17/9/10 (Zirtawp) zan khan CYMA Kumpuan bawhzuina’n Govt. Middle School, Chanmari West-ah CWBYMA Kumpuan Sub-committee leh Neuva Section hmalakna in Neuva Section huamchhunga nu leh pate leh YMA memberte tan Public Meeting neih a ni. 
He inkhawm hi Kumpuan Chairman leh Br Fin Secy Pu. R. Lalhmachhuana’n kaihruaiin hunserh a hmang nghal. Inkhawm hruaitu hian kalkhawmte fuihin “Kan khawtlang mualphona leh mawina hi keimahni kuta awm a ni, chuvang chuan kan nitin nunah hian thil tha tiin thilthalo erawh hnualsuat ang u” a ti. A sawi zelnaah chuan “...kan khawsak phung hian midangte pawi a lo sawi reng thei, midangte kan tihnat lohna turin kan nun kan fimkhur a ngai a ni” a ti bawk.
Pu C. Lalramzauva (Tetea) chuan presentation nei in “Mizoramah ruihhlo a hluar leh ta hle mai a, hei hian awlsam taka a ngawlveina a thlen a, chu chuan khawtlang a tibuai thin a ni. Kan vengchhung ngeiah pawh ualau taka vantlang zah miah lova ti an tam khawp mai” a ti. Tin, “Ruihhlo hluar zia tilangtu chu CADS hnathawh zara ni 29/5/10 atanga ni 16/9/10 inkara ruihhlo an man hlutzawng (` 8435570.00) atang hian a hriat a ni” a ti bawk. Hmeichhiat-mipatna in pawi a khawih nasat zia a sawi naah “HIV kai an pung a kan ramah him bik lai a awm lo, naupang kumtlinglo khawihchhiat an tamin neih inang inkawp kan pung hluai maite hian chhiatna namenlo kan hmabak em? tih min ngaihtuah tir thin” a ti.

Kalkhawmte atangin sawihona pawh neih a ni a Pu Lalthanruma chuan “Ruihhlo do kan tih hian vengchhunga nu leh pate hian YMA kutah hian kan burbun tawp mai hi chu a felhlel deuh a ni, mitinin mahni chhungkuaah, kan inchhungkhur theuhah hian do ila a hlawk ngei ngei ang” a ti a. Pu T. Ngurkhuma pawhin “ Ruihhlo zuar thinte pawh hmu i la YMA a inhmang lemlo chuan kan en liam mai mai thin hi a pawi a ni. Mizo kan nih a, Kristian kan nih bawka, Chanmari West mi kan nih bawk chuan ruihhlo zuarte leh awmtha duhlote chu hruaitute emaw thuneitute emaw hnena hrilh leh hlan hi kan zavaia mawhphurhna a ni tih i hre thar ang u” a ti bawk.Tin, Pu CT Vawra chuan thalaite zinga sex hluarna chhan tam tak zingah kan nulate incheidan hi a bul pakhat a ni a ti a, a thil hmuh sawiin “Ka lenna a nula pakhat chu a kekawr chhanah a **** a hmuh theih, rin loh deuhin patling pawhin kan lo melh leh thin” a ti a, kalkhawmte’n an lawm hle.
He inkhawmah hian N-Sec hruaitu 17 kalin, Kumpuan sub-com atangin 4 an kal a, Br. OB 3 an kal bawk. Mipui erawh section danga neih tawh khaikhin chuan an thahnem lo hle. Nu leh Pa, thalaite’n zir ngai kan nei  tilang chiangtu a ni awm e. Kal an thahnem lo chungin kalkhawmte erawh an tui tlang hle. 

CHANMARI WEST KARATE PLAYERS CHE THA

All Mizoram Karate Association (AMKA) buatsaih Dt 14-17 September, 2010 chhunga Champhai khawpuia Inter-District Karate Championship 2010 neihnaah Chanmari West atanga Karate Players fehchhuak mi 7 ten Gold Medal la vekin an che tha hle. An medal lak dan chu hetiang hi a ni :-


Sl.
No. Hming                Pa hming            Section          Medal Awarded
 1. Vanlalthanpuia     T.C.Lalremsiama         V           Gold-2 & Silver-1
 2. Lallawmkimi     R.Lalbiaksanga(L)       V           Gold-1 & Silver-2
 3. Reuben Lalhmingmawia    Roluahpuia V           Gold-1 & Silver-2
 4. Vanlalnelawma     T.C.Lalremsiama         V           Gold-1 & Silver-1
 5. Malsawmdawngzela    T.C.Lalremsiama    V           Gold-2 & Bronze-1
 6. Vanlalchhuanawma      T.C.Lalremsiama    V           Gold-1
 7. Lalthakimi                H.Lalpianthanga  V           Gold-1


Jonathan Lalsangliana S/o K.Lalchullova, N-Section chu he Championship Official a nih bakah, Aizawl District Team Coach atana hman niin, Aizawl District Team hi a pumpui-ah a champion pui bawk a ni.

YMA CCC MEETING NEIH A NI

Chanmari West, September 12: Central Coordination Committee (CCC) Meeting chu Ni 8/9/10 dar 10:30 khan CYMA Hall-ah neih a ni. 
CCC meeting hi Pu Lal Chungnunga, President, Central YMA-in kaihruaiin member an kal tha thawkhat hle a, thu pawimawh tak tak relin YMA General Conference agenda tur pawh rel fel nghal a ni.
Thurelte:
I. YMA General Conference chungchang :
YMA General Conference 2010 hi ruahman lawk ang chuan 19-21 October thlaah Lungleia neih tur a ni. Conference programme Cable TV-a live pek chhuah chu CCC Meeting Palaite chuan tha an ti tlang a chuvang chuan kumin  Conference chu nu leh pa leh kalve theilote pawhin mahni inlum atangin an thlir thei dawn a ni. Agenda tur hi CEC/Sub-Hqrs./Group in a thlitfim hnuah CCC hian ngun takin an thlirho leh a, kumin chhunga Conference agenda atan chuan hetiang hi nise a ti:
YMA Khawih
1. YMA kalphung inzirtir uar ni rawh se.
2. Kan ram thing chereu zel tur ven nan Kuang atan Thingphel hmang tlem turin    leh remchang dang hmang zawk turin CYMA-in hma la rawh se.
3. Mizo hming hawha hnamdang sumdawngte titawp turin Central YMA-in hma        la rawh se.
4. Reserve Bank of India phalna nei lo, a pung tam tak pek tiama mipuite sum la    lut thinte khuahkhirhna dan hi khauh taka kenkawh a nih theih nan CYMA-in      hma la rawh se.
Sawrkar khawih
1. Mizoram Drugs Control Act kan ram mil turin siam ni ve rawh se.
2. National Highway 54 hi Sorkar-in National Highway a nih angin enkawl rawh se.
3. Mizorama kawngpui hrang hrang siamtu Contractor te hnathawh danah thuk zawka inrawlh turin Sorkar ngen ni rawh se.
4. Halpuah leh halmawi hi engtik hunah pawh khap chhunzawm zel turin Sorkar ngen ni rawh se.
II. Kumpuan chungchang:
CCC meetingah hian kum 2010-2011 atan YMA kumpuan neih leh neih loh ban pharin vote lak a ni a, a tam zawk duh dan angin kumpuan kan nei leh dawn a ni. A hnuaia mite 2 atang hian YMA General Conference 2010 in tha a tih zawk kan hmang dawn a ni.
1. Khawtlang Nun Siamthat
2. Ruihhlo Do
III. Ruihhlo do report:
Sub-Hqrs. YMA hrang hrang - leh Central Anti Drugs Squad (CADS) atangin Ruihhlo Do hmalakna report pek a ni a. He hna tan atanga hun rei lote chhunga Ruihhlo thahnem tak man chhuah a ni hi a lawmawm rualin mak tih a tling hial a ni.
IV. Budget thlirho:
Pu R. Lalngheta, Treasurer, CYMA chuan kum 2010-2011 chhunga Central YMA Budget - Hmuh tur leh Hmanna tur a vaiin ` 72,15,864.00 chu meeting-ah a pharh a hei hi siamrem ngai laite siamremin 65th YMA General Conference 2010-ah pharh turin dah a ni.

BADMINTON TOURNAMENT ZO FEL TA

Chanmari West, September 1:  Chanmari West Sporting Club buatsaih  Badminton Tournament (Local) neih chu zawhfel a ni ta.
CWSC Badminton Sub-comm hmalakna  a buatsaih Badminton Tournament hi Ni 17 - 28th  August, 2010 chhungin neih a ni a, Men’s single, Doubles leh Under 19 ah te inelna buatsaih a  ni. He tournamentah hian Players thahnem tak an telin hmasawnna duhawmtak chhar chhuah a nih thu leh tawiawmtute zawng zawng chunga lawmthu te, tin, shuttle cock dozen 1 pe tu New Horizon School of Education Principal Tv. Lalsawmzuala chungah an lawmzia thu buatsaihtute lam atangin kan dawng.
Lawmman ah Certificate mawihnai tak leh Trophy 1na  atanga 3na thleng te pek anni. He tournament neih zawhtak result chu hetiang a ni:
Men’s Single
1. Pu Lalthanzuala T-Section
2. Pu. H. Zohmangaiaha T-Section
3. Pu Lalremruata CH-Section
Men Doubles
1. Pu H. Lalthlamuana & Pu H. Zonunthara
2. Pu Kawlengmawia & Pu Rodingliana Tochhawng 
3. Pu H. Zohmangaiha & Pu Lalrinchhana
Under 19
1. Lalbiaksiama CH-section
2. Alex Lallawmsanga K- Section
3. Vanlaltanpuia T-Section

PLATINUM JUBILEE LENGKHAWMZAI 
INTIHSIAK ZAWHFEL A NI

Ni 26 & 27.8.2010 khan Vanapa Hall-ah YMA Platinum Jubilee Inter Branch YMA Lengkhawmzai intihsiak neih a ni a, hetah hian Branch 41 an tel a, Chanmari West Branch YMA erawh rokhawlhna avangin kan tel ve thei ta lo a ni. Intihsiak result hetiang a ni:
1. Ramthar Veng - ` 20,000.00+Trophy
2. Ramhlun South - ` 15,000.00+Trophy
3. Tuikual North - ` 10,000.00+Trophy
4. Tuithiang - ` 5,000.00
5. Bungkawn - ` 5,000.00
6. Chawnpui - ` 5,000.00
7. Rawpuichhip - ` 5,000.00
8. Tuikual South - ` 5,000.00
9. Chhinga Veng - ` 5,000.00
10. Edenthar - ` 5,000.00
Khuangpu thiam ber:
Lalrinzuala leh Lalrinfela Sailo, Tuithiang - `  500.00+Certificate
Hla hril thiam ber:
Nl. Ruthi Lalrinawmi, Tlangnuam - ` 500.00+Certificate
Member kal tam ber:
Tuikual North - ` 1,500.00
Member kal tam ber (Percentage):
Tuivamit - ` 1,500.00
Zaipawl tel zawng zawng - ` 4,000.00 theuh pek anni bawk.

KUMPUAN BAWHZUINA PUBLIC MEETING

Chanmari West August 29:   Ni 27/8/10 (Zirtawp) zan khan Pu. C. Sangkhuma  in chungah Kumpuan sub-committee hmalakna in CWBYMA chuan Taitesena Section huamchhunga nu leh pate tan Public meeting a buatsaih. Mi 138 vel kalin hun hlimawm leh nuam tak hman a ni.
He inkhawm hi Pu R. Lalhmachhuana Fin Secy leh Kumpuan sub-committee Chairman chuan kai hruaiin Pu K. Lalthakima, Secretary, Kumpuan sub-comm. chu Resource Person a ni. Chairman hian thusawiin “Mahni chauh inthlir lovin midangte thatna tur pawh kan thlir tel a pawimawh a ni. Midangte tanpui thin nge midangte tana harsatna thlentu  ka nih tih kan inzawh a pawimawh” a ti. A sawi zelnaah “Upa lamte inthlahrung taka tuallai an leng hmuh hian lung a tichhia a ni” a ti bawk. Kan khawtlang a lo thatna tur a ke pen theuh turin nu leh pa te leh YMA member te a ngen in a sawm zui bawk.
Resource Person Pu K. Lalthakima chuan khawtlang nun siamthat na’n theihtawpa ruihhlo do a tul  em em a, a tulna leh pawimawhna hre reng si a inkuangkuah san mai hi a dik hauh loh ziate a sawi bawk. Kalkhawmte’n an hlut in sawihona huna sawi pawh an thahnem hle.
Pu T. Ngurkhuma, President, CWBYMA chuan thu sawiin “ Khawtlang nun siamtha tur chuan rinawmna hi a pawimawhin mitin hian khawtlang leh kohhranah kan phak ang tawk theuhin kan nunpui tur a ni.” a ti.

BRANCH HRUAITUTE REPRESENT NA TUR

September - December thla chhunga Branch O/B te Section a an Represent na tur hetiang hian siam a ni. CH-Section : Pu R.L.Thanhnuna, Secretary K-Section : Pu C. Lalzarliana, Treasurer T- Section : Pu K.Darthantluanga, A.Secretary N-Section : Pu R.Lalhmachhuana, Fin.Secretary V-Section : Pu Lalthuamluaia, Vice.President.

YMA PLATINUM JUBILEE LAWM A NI

Chanmari West August 22: YMA Platinum Jubilee lawmna chu Ni 14th August, 2010 dar 11:00 a.m khan Vanapa Hall-ah hman a ni. He hunah hian Central YMA OB lo nitawh tun thlenga min la dampuite mi 39 hnenah chawimawina thuziak leh Souvenir Magazine pek an ni.

Jubilee lawmna inkhawm hi Rev. C. Chawngliana, Chairman, Mizoram Kohhran Hruaitu Committee-in Pathian hnenah hlanin Zaipawl leh mimal zaithiam tak tak ten hun an hmang a, Pu Lalbiakzuala, General Secretary in Platinum Jubilee Sub-Hqrs/Group/Branch hrang hrang ten an hman dan report a pe. 

CYMA President, Lal Chungnunga chuan thusawiin “Mizote zingah Kristian dik leh piangthara inchhál tam tak an awm a, mahse a taka rah chhuah hmuh tur erawh chu duhthusamin an tam lo; nu leh pate'n fate an ngaihsak tawk lo va, Mizote zingah tunlai khawvel sualna kawngah chak taka pên an tam tual tual a, hei hi tu leh fate'n ngaihsak an hlawh tâwk loh rah chhuah niin a lang" a ti. A sawi zel naah chuan “... a bikin Aizawlah ruihhlo a hluar hle a, 'em em a' tih tur khawpa naupang thlengin an rui” tih a sawi a, "Nu leh pate'n an fate dinhmun an hriat chian duh loh avangin, ruihhlo bawihah naupang tê tê an táng mek a ni," a ti bawk. 

Pu J.H. Zoremthanga, Vice President hnen atangin Kumpuan Thupui "Khawtlang Nun Siamthat" ngaihthlak a ni. Mizoramah rorelna dik leh tha a awm tawk loh avangin mi pawngsualtu zinga 70% in an phû tâwk hremna an hmuh loh thu leh, Mizoram sum a hmanna tura hman loh a tam avangin Mizoramah sualna a pung ni a a lan thu sawiin, "Do ngai zingah kut tling lo a sum lak luh a tel a, YMA-in ka do zel a ngai a ni," a ti. YMA-in ruihhlo a do loh laiin mahni inti hlum leh HIV kai an pun thu a sawi a, "Sorkar pawhin ruihhlo do kawngah tan a lak lehzual a tul," tiin a sawi bawk.

He mini vek hian Pu C. Rokhuma, Central YMA President hlui in Platinum Jubilee Souvenir Magazine a tlangzarh. Souvenir Magazine hi Rs. 100/- man a ni a, CYMA Office-ah lei theihin a awm. Jubilee lawmna peng pakhat atan Exhibition buatsaih a ni a, hetah hian Branch hrang hrang ten Chhiatni-a kan in sawngbawl dan chi hrang hrang an pho chhuak a, member ten an hlut hle.

LEIMIN TUARTE CHANMARI WEST IN TANPUI

Chanmari West August 15: Tunlai ruah bawhawkah veng hrang hrangah leimin a nasa hle. Kan veng thenawm mai  Edentharah (Vengchhak), kan veng nen a inri na  bula mi, pawh ni 10/8/10 zan dar 9:00 vel khan  H. Ronghaka in, assam type chhawng hnih chu lei chimin a hnawl tlu a, In chim hian a thlanga Pu Sanghmingthanga in chu a delh tlu tel bawk. In chim hian mi 6 a hnawl tel a, an zinga mi Pu HB Kapthanga (74) chu a malpui veilam a thler a, a khabe-ah hliam tuar bawkin damdawi Inah dahluh a ni a, In chimin a hnawl tel midang 5 chuan hliam an tuar a, damdawi ina admit ngai erawh an awm lo.
Pu H. Ronghaka In hi chhungkaw 3-in luahin a chung hi Pu Lalngaihsaka te chhungin an luah a, a hnuai hi Pu Lalpianmawia leh Pu HB Kapthanga te chhung hian an luah bawk. In chim lai hian in chungah mi 3 an awm a, in hnuaiah hian mi 3 bawk awmin Pu Lalpianmawia fanu chu kawngka bula a din lai niin leimin tur hmu hian a tlanchhuak hman a ni. Pu Kapthanga bakah hian Pu Lalpianmawia te pafa hi an hliam na leh deuh a, ngaihtuahawm erawh an ni lo. A thlanga in a delh hi Pi Chhimchhingi te chhungin an luahlai a ni a, inchhunga awm mi 4 te chu an insaseng hman lo a, hliam na erawh an tuar lo.
In hi leiminin a hnawl tih hriat a nih velah Chanmari West thalaite pawhin tanpui ngai tanpui turin an thawk chhuak nghal a mahse Pu Lalzawmliana (Presbyterian Upa) te in piah kawrah hnawl tam tham takin kawng a hnawh vek avangin mi tamzawk chu an thleng phei thei lo a ni.
In chim hi ni 11/8/10 hian khawtlangin a senghawi hna an thawk nghal a, ni a Chanmari west atangin mi 100 vel zetin va puih a ni in, Branch YMA hmingin Rs 1000/- tanpuina  pek an ni bawk.
Tin hemi zan vek hian Chaltlang Lily Veng huamchhung, Sairang road (New Bagha tia hriat) ah kawngchhak lama lung tla in Pu Vanlalringa in, assam type a deng a, lung hian Pu Vanlalringa nupui Pi Lalrintluangi (27), fa thla 8 mi pai lai chu a lu-ah deng fuhin Aizawl Civil Hospital ah a hliam tuar loin a boral. Pi Lalrintluangi hian a pasal leh fa 4 a kalsan.

LAWMTHU SAWINA

Tunhnai ruahsur avanga kan ram leiminin Kan In chhungkaw hnih luahlai Assam type luah ngam loh a asiam avang leh a thlang in thenga harsatna a thlen avangin pawi kan ti hle a. He kan chhiattawh a phut let nei lo a min buaipuitu, bungrua min senghawi puitu te, VC, YMA leh tlawmngai a tul anga min buaipui a, hnatlang a rawn thawk chhuak zawng zawng chungah lawmthu kan sawi takzet a ni.

In khawngaihna dawngtu,

Vanlalpeka te chhung,

Khuangchera Section

INDEPENDENCE DAY CELEBRATION TOURNAMENT 

(Football & Volleyball)

Chanmari West August 8: Indepentdence Day Celebration Tournament chu Ni 2.8.2010(Thawhtanni) khan Mizoram Football Association(MFA), Aizawl District Football Association (ADFA) leh Mizoram Volleyball Association (MVA) buatsaihin 1st Division leh 2nd Division tan Football leh Volleyball tournament buatsaih a ni.
He tournament ah hian kan veng CWSC bultumin Mipa 2nd Division Football leh 2nd Division Volleyball  Team te pawh tel niin Volleyball Team te hi match 1-na tur ah an bye nghal a, Zirtawpni kha Dawrpui Vengthar 3-0 a hnehin Quarter Final ah an in hlang kai. Nimin Inrinni khan LBN Tuikual te nen Quarter Final an khel leh a, result kan hre hman ta lo a ni.
2nd Division Football tournament ah hi  Pool  A leh B ah then niin Ckan veng  Seeded no.1 ah dah a ni a. 3rd Bn.M.A.P., Electric Veng F/C leh SYS Academy te nen Pool -A ah an awm ho a. Ni.2.8.2010(Thawhtan) khan Electric Veng F/C nen match hmasa ber an khel a, he inkhel hi a hmuhnawmin entu mipui te pawhin an hlut hle a, kan veng team ten goal 1 an phurh hnuin  Electric veng F/C lamah goal 2 thun ve lehin 2-1 in chakna an chang a ni. Nilaini (4.8.10) khan 3rd Bn.M.A.P. nen 1-1 a in draw-in ni 6.8.2010 (Zirtawp) khan SYS Academy nen 1-1 in draw leh in point 5 hmuin Pool Runner dinhmun an luah a, naktip thawhlehni (10.8.10) Dar 12 hian  Pool -B winner 1st Bn.M.A.P nen  Semi- Final an khel dawn a ni. Volleyball leh Football players te hi vengchhung mipui a thei thei tawiawm turin CWSC chuan a ngen a ni.
Tin, he tournament neih mek a sum leh pai leh tha leh zung sengtu vengchhung mi tlawmngai te chungah Chanmari West Sporting Club chuan lawmthu a sawi takzet a ni.

LAWMTHU SAWINA

Ni 31.7.2010 (Inrinni) a YMA Platinum Jubilee puala Thisen Pek Runpui neih zawh takah Sum leh pai thawhtu te, tlawmngaia ei leh in buaipui tute, bungrua leh thil tul dang ui lova thawhtu te, thisen hlu tak petu te leh pek tum a thawkchhuak taksa lam harsatna avanga pe thei ta lo te chungah Branch Y.M.A. chaun lawmthu a sawi takzet a. Tin, hmun leh hma phal taka hmantirtu Chanmari West Middle School thuneitu te hnenah Br.Y.M.A. chuan lawmthu a sawi bawk a ni.

BADMINTON TOURNAMENT

Chanmari West Sporting Club, Badminton Sub-Committee chuan Chanmari West vengchhunga Badminton lama tuimite tan Badminton Tournament buatsaih a ni dawn a. He Tournament hi ni 10/8/10 zan atanga tan tur a niin Chanmari West Indoor Stadium-ah khelh tur a ni. He Tournament ah hian Category hrang hrang buatsaih tum a ni a, badminton lama tui mite lo inbuatsaih lawk turin an in hriattir.
Under  19 yrs
Above 19 yrs  (Mens single leh Double)
Heng bakah hian category hrang hrang tih belh tum a ni bawk.
Entryfee
Single - Rs 50/-
Double -   Player pakhat tan Rs 50/-
Last Date        - Ni 9/8/10 Zing.

THISEN PE HNEM BER RECORD KAN SIAM TA!

Chanmari West August 1: Chanmari West Branch YMA chuan YMA Platinum Jubilee pualin mamawhtute tan ‘Thisen Pek Runpui (Mass Blood Donation’  Civil Hospital Aizawl buaipuiin Ni 31.7.2010 (Inrinni) Dar 10 a tanin  Chanmari West Middle School-ah a nei. Hetah hian Branch YMA zinga Mizorama thisen pe hnem ber Record dinglai mek chelhtu Ramhlun North Br.YMA (171 units, 2010) chu unit 35 a khumin unit 206 pek a ni.Branch dangte cho chhuahna nise an ti hle.
He thisen pek runpui hi CWBYMA President Pu T. Ngurkhuma’n  hawngin “Veng lian ber pawl hian pek hmasak a kan hmingchhe tawh kha kan khum ngei tur a ni  ” tih a sawi. Tin Dr Lily, Civil Hospital chuan “Kum 18 - 60 inkarin pek theih a ni a, mi hrisel pangngai chuan pek ngei hi mi ang nihna a ni” a ti bawk. He thisen pek runpui hi Pu Lalkunga (Pres. Upa) in Pathian hnena a hlan hnuin CWBYMA Br Asst Secy Pu K Darthantluanga chu pe hmasa berah a tang a ni.Thisen petute ei leh in buaipuitu te’n hneh takin thisen petute an chawm a, tin, sound system te, mut leh thutna turte leh silpauline buaipuitute’n hneh takin anmahni chanvo theuh an hlen chhuak thei chu Branch Committee chuan lawmawm ati a, lawmthu a sawi a ni. Hemi atana thisen hlu tak pe tu mi inpe te leh tanpuina petute( apawisa fai chuan Rs 28475) hnenah leh sikul thuneitute hnenah Branch YMA chuan lawmthu a sawi takzet a ni. Hemi ni a senral tlangpui chu Rs 19458 approx ani e.
Thisen pekdan record kimchang hetiangin:
Hming pe zawng zawng - 462
A ni a In register - 372
Thisen pe - 206 (Mipa -176; Hmeichhia - 30)
Pe theilo - 166
Section wise a pekdan:
Section    In report Pe zat
M F Total %
K 80 43 8 51 63.75
V 120 44 3 47 39.16
CH 113 35 7 42 37.17
T 94 32 9 41 43.61
N 55 19 6 25 45.45
Section pe hnem ber K-section hian lawmmanah Tea Urn an dawng a ni.

Branch Asst Secy Pu K. Darthantluanga, 
Thisen pe hmasa bertu chu!!