Branch YMA Executive Committee neih a ni

Chanmari West, August 7: Chanmari West Branch YMA Executive Meeting chu Ni 2.8.2011 (Thawhleh) zan khan Pu R.Lalhmachhuana (Vice President) te in Vanapa Section-ah President kaihhruainain neih a ni.
He meeting ah hian vengchhung leh YMA hmasawnna tur kawng hrang hrang ngaihtuah leh rel a ni a. Section leh Sub-Committee-in thu an thlen te ngaihtuah ho a ni bawk. Meeting ah hian Committee hmasa leh he committee inkara thil thleng  leh pawimawhte Secretary hnen atangin report hrang hrang ngaihthlak a ni a, ruihtheih thil avanga vengchhung atanga chhuak tura an tih Pi Vanlalpari  W/o Vanlalthanga Neuva Section a mite chu   warning vawi-2 pek hnu pawha an la chhuah duh loh avangin Ni 7.8.2011 (Sunday) hma ngeia chhuak tura tih nawn leh an ni a, chanchinbu buatsaih lai hian vengchhung an chhuahsan thu report dawn a ni.
Member Secretary Aizawl Municipal Council Ward No-VI hnen atanga thu hmuh angin Solid Waste Management  Member Branch YMA aiawh tur mi pahnih heng Pu R.L.Thanhnuna leh Tv.Zairemmawia te ruat an ni.
Zawlbuk sak mek chu sum neih ang ang hman zawh thawkhat tawh a nih avangin vengchhunga chhungtin te hnenah thawhlawm khawn nise tih rel a ni a, a tul anga hma lo la turin Working Committee kutah dah a ni.
Meetingah hian YMA memberte tan Chanmari West Branch YMA Sport 2011 buatsaih nise tih a ni a, a hun atan hian Ni 19-24.9.2011 ruahman a ni. He Sport neih turah hian member mipa leh hmeichhia te Football leh Volleyball hmangin intihsiak tur a ni. 2011 Sport neih turah hian a tul anga hma lo la turin Organising Committee din nghal a ni a, heng a hnuaia mite hi ruat a ni.
Chairman :- Pu R.Lalhmachhuana, Vice President.
V.Chairman :- Pu Lalrinliana
Secretary :- Pu R.K.Rozidinga
Asst. Secy :- Tv.Zairemmawia
Members :-
1.Pu R.Lalbiakhluna - CH
        2. Pu Zonunsanga (Patea)-   K
  3. Pu R.Lalsangzuala        -   T
4. Tv.R.Lalrinngheta         -   V
5. Nl.Lalramengi              -   N
Neuva Section leh Taitesena Section te’n Section bungrua tur lei an rawn dil chu phalsak an ni.
Tin, Kumpuan Sub-Committee Secretary Pu Lalhmingliana’n engemaw rokhawlhna a neih avanga a phatna chu pawmsak a ni a, a aiawh tur hian Asst.Secretary nilai Pu K.Lalzuithanga chu ruat niin Asst.Secretary atan Pu C.Lalramzauva(Tetea) chu ruat nghal a ni bawk.
Vengchhungah chhiattawk Lumen ngai kan awmin tlangval/rawlthar mitthi in bawr vela zu in leh rui kan awm ta fo mai chu Br.YMA committee chuan a ngaimawh hle a, khauh zawka hmalak tum a ni.

YMA  MEMBERTE  HNENA  HRIATTIRNA

Ni 23.9.2011(Zirtawp)zing dar 5:00 khian Central YMA buatsaihin Half Marathon Race(21 kms) tlan tur a ni a, hetah hian mipa 5 aia tam lo leh hmeichhia mi 5 aia tam lo tlan tur a ni. Tin,Ni 7-10.9.2011 chhung hian T.T Tournament neih tur a ni bawk a, kan Branch YMA aiawha tel tumte chuan Ni 21.8.2011 ral hma in Branch Secretary Pu R.L.Thanhnuna hnenah mahni ngei kalin in report tur a ni e.

ZCC HMALAKNAIN  HRUAITUTE   INTIHHLIMNA NEIH  A  NI

Chanmari West, July 31 : Ni 23.7.2011 (Inrinni) khan Zofa Cultural Club hmalaknain Assam Rifles Lammual-ah  Chanmari West vengchhunga pawl hrang hrang hruaitu heng ZCC, Section YMA  leh Sporting Club Sub-Committee hruaituten Football hmangin intihhlimna an nei a ni.
He hunah hian hruatu hrang hrangte an kal tha hle a, hruaitu kalkhawm te hian ` 3200/- thawhkhawmin heng pawisa tlingkhawmte hi lawmman atan leh ei leh in lei nan hmanral nghal a ni. He intihhlimna Football One Day Tournament hi hruaitu kalkhawm ten zawngchhangthlak an tiin an hlim hle a, match 7 khelh a ni a, hruaitu hrang hrang Taitesena, Khuangchera, Neuva, Chawngbawla, Vanapa Section, Football leh Volleyball Sub-Commitee te an inkhel kual a ni. Semi- Final ah hian Vanapa Section, Neuva Section, Football Sub-Committee leh Zofa Cultural Club te an lut a. Football Sub-Committee leh Neuva Section YMA hruaituten Final hi thleng chhovin Neuva Section hi 2-0 a chakin an champion ta a ni.
He hun hlu tak mai hlawhtlinna tura hruaitu thawkchhuak zawng zawngte chungah leh Branch YMA hruaitu tawiawm tute chungah Zofa Cultural Club chuan lawmthu a sawiin hruaitute inpumkhatna tha tak kan neih theih nana hmang chhunzawm zel turin hruaitu zawng zawngte duhsakna a hlan a ni. (see photo)

Vengchhung a chhiat kan tawh dan (w.e.f July 2011)

Mitthi Zat :- 21

Mipa :- 12

Hmeichhia :- 11

Section hrang hrang :

T-7, V-1, K-7, N-2 leh CH-4 an ni.

Central Executive Committee Meeting neih a ni

Chanmari West, July 17 : Ni 16.7.2011 (Inrinni) chawhnu dar 1:00  khan Central YMA Committee Room-ah CEC Meeting neih niin Pu Lal Chungnunga, President-in a kaihruai a, member 47 an kal a ni.
He meetingah hian CEC hmasa leh tun CEC inkara YMA hmalakna report ngaihthlak a ni a, YMA History 1996-2010 ziak turin Pu Lalbiakzuala, General Secretary, CYMA ruat a ni a. YMA Day leh Chhandamna Camping neih zawh tak thlirletna neih niin, CYMA chuan he camping hi a hlawhtling hlein an hria. 
YMA General Conference 2011 Ni 25-27.10.2011 a YMA Sub-Hqrs. Kolasib-a neih tur chungchang sawiho a ni a,  kumpuan thupui ‘Khawtlang Nun Siamthat’ sawi turin Pu Vanlalruata, Asst. Secretary ruat a ni Detail Programme Committee hetiang hian ruat nghal a ni :-
Chairman :- J. Lalsailova,
Fin. Secy.,CYMA
Secretary - Tv. Lalhmachhuana,CEC.
Members - 1) Nl. Lalramengzami CEC  2) Dr. Lalnuntluanga CEC  3) Pu K. Laldawngliana CEC              4) Pu Roneihthanga CEC te an ni. Gen. Conference Agenda, Kumpuan rawtna chu August 2011 chhunga thehluh tur a ni a, Danbu leh Chhiatni Thatni Kaihhruaina lam hawi telh loh tur a ni. Kumin hi CYMA Hruaitu thlan kum a ni a, Nomination thehlut turte chuan September  thla ral hma ngeiin an remtihna la in CYMA Office-ah thehluh tur a ni. Meeting-ah hian 65th YMA General Conference thurel bawhzui dan thlirho a ni a, Thurel bawhzui dan tha hle a hriat a ni a, hnamdang Mizo hming hawha sumdawngte dap chhuah chungchangah Secretaries ten ruahmanna siamin a hmuna fankual nise an ti.
Central Anti Drugs Squad (CADS) Convener thar atan Pu R. Lalngheta, Treasurer an ruat bawk.
Tin, Central YMA sumte hi hun lo kal zel turah mamawh a la nih reng dawn avangin kumtinin Chartered Accountant Audit tir thin tawh nise tih a ni a, Financial Year anga kalpui chu CEC chuan  rem a ti bawk a ni. Meeting-ah hian Sanction Demand pahnih Press Sub-Comittee - ` 40,000 leh Literature Sub-Committee ` 85,040 Total ` 1,25,040 chu passed a ni bawk.(source CYMA web-page)

   ‘CH’ Section huamchhunga YMA member inhmukhawm

Ni 21/7/11 (Ninga) zan khan Chawngbawla section huamchhunga YMA member kum 35 chin hnuai lamte chu Section hruaitute’n ko khawmin Springdale School ah thu tha leh pawimawh in zirtir leh in hrilhhriatna te, HIV/AIDS Awareness Campaign atante hun hman a ni. Member kalkhawm an thahnemin kalkhawmte’n an hlut hle. Tin, he inkhawmna hmun hmantirtu Pu Lalremruata Principal Springdale school chungah section hruaitute an lawm hle a ni. He inkhawm hi Pu Lalramliana Asst Leader in kaihruaiin Tv Lalhmunmawia Pachuau Fin Secretary in hunserh a hmang a. Pu Lalbiakthanga Khiangte Adviser CWBYMA chu thusawi tur a sawm niin ani bakah hian Pu K. Lalthakima Leader leh Pu C. Lalramzauva te’n thu an sawi bawk. Tin he inhmuhkhawm a ei leh in senso zawng zawng hi World Vision in an tumsak vek a ni. Pu Lalbiakthanga Khiangte chuan “Mizoramah ruihhlo a hluar em em a, heng ruihhloin a tihbuai vanga zan rei tak tak thleng a khawlai a hnawksak te hi Police ten man an tum em em vang pawh ni hran lo a man ngei ngei tul hi an awm reng a ni. Mipa chauh an ni lo, hmeichhia pawh an bang bik lo a, hei hian nawhchizawrhna ah te, mahni intihhlum duhna ah te a hruailut thin a ni. Tin, accident thlentu tamber a ni bawk” a ti.

Enge an sawi ?
@ “Tunlaiah hna a vang tawh em em a chutihlaiin phai lama hna hmuhsaktheitu inti nazawng rin loh a tha, hmelhriat hnai takin an sawi hmuh che u a nih pawhin chian hmasa zel rawh u, a tawpah nawhchi zawrhna a hruailuh tam tak an awm a ni. I fimkhur hle ang u” - Lalbiakthanga Khiangte
@ “Changkang kan tehna hi enge niang le? Mifing pui pui leh hausa pui pui awmkhawm I la, kan tlawmngaihna hi hniam viauin kan khawtlang hi ralmuang lo viau bawk si se changkang kan ni ang em?

- K. Lalthakima

@ “HIV hi a hlauhawm em em kan tihrualin  nun uluk mi tan chuan kai mai hi thil awlsam a ni lemlo, tin a kai te pawh thinhrik leh endawng loh tur a ni a natna pakhat ve mai a ni bawk”- C. Lalramzauva

Assembly Budget Session neih mek a ni

Chanmari West, July 17 : Mizoram State Assembly Budget Session chu neih chhunzawm mek a ni a, he session hi Ni 7.7.2011 atanga tan niin Ni 28.7.2011 a tawp tura ruahman a ni.
He Budget Session neih mek ah hian Ni 14.7.2011 khan State Budget tura ruahman Cheng Vaibelchhe 4,216.09 chu Finance Minister changtu Pu H.Liansailova chuan a pharh a ni. He budget pharh ah hian NLUP chu ngaih pawimawh ber tura dah a ni a, chhiah thar lakna tur kawng hrang hrang siam thar a awm bawk a ni. Budget pumpui ceng vbc. 4,216.09 zinga vbc.2,410.27 chu Non Plan niin, cheng vbc.1,700 chu Plan Fund a ni. NLUP atan hian cheng vbc.234-dah a ni a, Central Sponsored Scheme atangin cheng vbc.15.83 hmuh beisei a ni bawk.
Budget langsar zual te chu :- MLA Local Area Development Scheme atan cheng nuai 1,000 dah a ni a, hei hi constituency pakhat atan nuai 25 zel ruahman a ni. Lunglei HPC tan cheng vbc.7 dah a ni. Tui connection leh lirthei lamah chhiah tihpun tum a ni bawk a ni.
Mizoram Sorkar hian nikum sorkar kum liamta thleng khan cheng vbc.3,410.21 leiba a nei a ni.Kumin sorkar kuma leiba a neih belh tur chu cheng vbc.170.51 a ni.

Central YMA buatsaih Gospel Camping neih zawh a ni.

Ni 10.7.2011(Inrinni) khan Krista Hnungzuitu Tawngtai Bethel Camping Centre, Chawnpuia Central YMA  in a buatsaih Ruihhlo ngai leh Hmeichhe rahbi tleute puala Chhandamna Camping a buatsaih chu neih zawh a ni. Tarlan tawh angin he Campingah hian Campers 561 an awm a, an vai hian Pathianah siamtharna an chang a ni. Ni 11.7.2011 (Thawhtanni) khan Central YMA chuan Pathian hnenah lawmthu sawiin Bawng an talh a, Campers-te Pathian fakin an zaikhawm a, Testimony ngaihthlak niin, tlaiah hlim taka Ruai theh a ni.

NGENNA

1. Kan Branch YMA member Tv Lalthanpuia Tochhawng S/o TC Lalremsiama ‘V’ Section a mi chu  Asia Karate Championship neih turah India Ram aiawh turin a kal a.Ni 22.7.2011(Zirtawp) khian a khel dawn a, hlawhtlinna a chan ngei theih nana Pathian hnena lo tawngtaipui turin vengchhung mite min sawmin min ngen tak meuh meuh a ni.
2. H.Zoramthanpuia S/o Lalhruaia (T-Sect)chu Manhunt reality show-ah a la tling ve a, thawhlehni (19.7.11) tlailam dar 5 thleng hian vote theih  a ni. Veng mipuite kan veng tlangval hi vote theuh i tum ang u. He number ah hian vote tur a ni e:- 9862648903 

Central YMA-in a buatsaih Chhandamna Camping chu neih  zawh a ni

Chanmari West, July 10: Ni 27th June atanga neih tan Ruihhlo ngaite leh Hmeichhe rahbi tleu tawhte tana Central YMA-in Chhandamna Camping Krista Hnungzuitute Tawngtai Bethel Camping Centre, Chawnpui-a a buatsaih chu nimin Inrinni khan neih zawh a ni.
Central YMA-in Kumpuan bawhzuina peng pakhat atana Camping a buatsaih ah hian Campers 498 (Mipa 392 leh Hmeichhia 106) an lut a ni. He Camping tanpui nan hian mi thahnemngai tam tak hnen atangin Camping tanpuina dawn a ni a, Central YMA chuan tanpuina petu zawng zawng chungah lawmthu a sawi. Aizawl khawpui chhung Branch YMA te thawhkhawm bakah heng ahnuai a mite hnen atang hian Camping tanpuina dawn a ni.
1. Holy Cross Bakery, Tuikual North - ` 10,000.00
2. T. Pachhinga, Tuikual - `   1,000.00
3. B. Vanlalruati, Mission Vengthlang - `   2,100.00
4. Dawrpui Kohhran Hmeichhia - ` 18,016.00
5. Maxi Cab Owner’s Association, Gen. Hqrs. - `   3,000.00
6. Central Kohhran Hmeichhe Committee - ` 20,000.00
7. C.B. Thangluta Bawngkawn Chhimveng - `   1,000.00
8. Dawrpui Branch MHIP - ` 10,000.00
9. Mosia Agency, Chanmari - ` 10,000.00

Central YMA Thu leh Hla

@ Ni 4-5.7.2011 khan Regional Level Consultation with State Government and other stake holders meeting NEDFI House, Guwahati-ah neih a ni a,hetah hian Pu Vanlalruata,Asst. Secretary a kal a, hetah hian Sorkar Project ruahmanna leh enkawlnaah tlawmngaipawlte thuk zawka inrawlh tura rawtna awm chu sawiho a ni. Tin, Planning Commission member hnenah Ramngaw leh Nungchate humhalha YMA te hmalak dan sawipui a ni bawk.
@ Ni 5.7.2011 khan Vaphai Village Council huamchhunga Saikumphaia ramdangmi dan lova Mizorama lo lutten khua an din, Tuipuiral Group YMA ten hmalakpui tura Central YMA-a an rawn thlen, Central YMA te pawhin Mizoram Sorkar-a hma la tura a ngen tawh chungchang sawihoin LAD Minister Office Chamber-ah meeting neih a ni a, hetah hian Pu Lalbiakzuala, Gen.Secretary leh Pu R. Lalngheta, Treasurer te an kal.
@ Ni 7th July, 2011 khan Central YMA hnuaia Ruihhlo Do pawl CADS te chuan Heroin (No 4) Hawng 4 an man

Training On ND&PS ACT, MLTP ACT, neih a ni.

Chanmari West, July 3: Council of Minister rawtna angin Training On ND & PS Act, MLTP Act, ADC  Act, etc. for NGOs, Police & Excise Personnel chu Ni 28-29.6.2011, Dar 10:00AM khan  ATI Auditorim-ah neih a ni. He Training ni 2 awh ah hi  Pu R. Lalvena IAS, Director,  ATI in a kaihruai a. Pu Lal Thanhawla, Chief Minister in a hawng a ni.
He hun hawngtu Chiel Minister Pu Lal Thanhawla chuan hawnna thu sawiin ‘Mizoram Kristian za-a za chhal ngamna ramah ruihhlo zuarte an zalen hle a. Hremna na tak dan kan neih sa a awm reng chungin an tang rei thei lo hle thi hi engtia hma lak tur nge ni ang tih chungchang ngaihtuahna atanga he Training hi buatsaih a nih thu sawiin khawtlang, ram leh hnam pawhin kan duh lo em em zuara min tibuai thintute hi kan Customary Law leh Traditional Law lam atangin "Tlangchil" leh "Peizawn" mai dan a awm lo maw tih thlengin ngaihtuahna a lo hman thin thu a sawi a. Drugs ti thinte chu chhanchhuah ngai, Pathian thu hmanga enkawlna mamawh tak an ni’ a ti a. Central YMA-a CADS te hnathawh fakin Pu Hawla chuan thahnemngaia an mante hun reilote chauh an tanga an chhuak leh mai thin te chuan mi thahnemngaite a tihnual mai ang tih a hlauhthawn thu a sawi bawk a, henga kan tan ho theihnan sorkar lam mite, dan lam hre mite leh tlawmngaia thawk thinte tana Training neih ho hi thil pawimawh tak a nih ngei a beisei thu a sawi a ni.
Ni 28.6.2011 ah hian Pu Vanlalena, Chief Judicial Magistrate in Assam Drugs (Control) Act, 1950 chungchang a sawi a, Pu K.L.Liana, Special Judge in ND & PS Act chungchang a sawi bawk a. Tlailamah sawihona hun an hmang nghal a ni. A ni hnihna Ni 29.6.2011 ah hian MLTP Act, 1995 leh MLTP Rules, 1996 chungchang Pu LH Lianhrima, Advocate, High Court in a sawi a. Pu Vanneihtluanga, Freelance Writer-in MLTP Act/Rules chungchanga mipuite ngaihdan sawiin   Pu Lalsawirema, Addl. Govt. Advocate-in MLTP Rules chungchanga Excise lama thawkte tihtur a sawi bawk. He Training kharna inkhawmah hian Pu R. Lalzirliana, Home Minister leh Pu JH Rothuama, Excise Minister-ten an telpui bawk a ni.
Training-ah hian Central YMA atangin CEC Member engemawzat, Kumpuan Committee leh CADS Member-te an tel a. Excise leh Police bakah Judicial Magistrate engemawzat an tel bawk a ni.
(Source CYMA Website)

HRIATTIRNA  LEH  NGENNA

@ Ni 26.6.2011(Sunday) tlai dar 4 khan kan vengchhunga Vai Cement Mistiri leh Helper awmte koh khawm an ni a,Central YMA in an hlawh tur Mistiri ` 300/-aia sang lo, Helper ` 170/-aia sang lo a thawk tura ngen an ni. Tin, kan vengchhunga Vai chhawr thinte pawh  Central YMA in an hlawh tur a bituk bak a chhawr lo turin kan in ngen a ni.
@ Thlanmuala bungrua te hi chhiattawk an awmin a tuka thlan siam te tan hman remtih a ni a, thlan cheithat emaw siam danglam emaw kan awmin hman phal a ni lo tih veng mipuite hriattir kan ni e. Bungrua kan hman te felfai taka senghawi leh thin turin CWBYMA chuan a ngen bawk a ni.

Branch Executive Meeting neih a ni.

Chanmari West, June 26: Ni 21.6.2011 (Thawhleh) zan khan Branch Executive meeting Nl.Lalramengzami (V-Section) te inah neih a ni. He meeting hi President in a kaihhruai a,  meeting ah hian YMA Day hman zawh tak thlirletna, hruaitu intuaithar thupui sawiho leh thu pawimawh hrang hrang rel a ni.
Thurel tlangpui :-
1. YMA DAY thlirletna:- Ni 15.6.2011 (Nilai) a YMA Day hman zawh tak thlirletna neih a ni a, he hun hman zawhtak a Section hrang hrang a YMA memberten Branch YMA leh YMA Day Programme committee in a lo rel leh buatsaih anga intihhlimna hrang hrang neih an rawn ti hlawhtling thei chu committee chuan lawmthu a sawi takzet a. Tin, he hun hman zawh taka Thingpui leh Ar sawhchiar tuhnai tak min buatsaihsaktu vengpa tlawmngaite chungah pawh lawmthu a sawi takzet a ni.
2. Hruaitu Intuaitharna thupui sawihona :- Ni 24.3.2011-a YMA hruaitute intuaitharna kan neiha thupui hrang hrang hruaitutena kan sawiho  zinga ‘Inpumkhatna’ chu hetiang hian sawihona neih a ni.
a) Branch leh Section : Branch leh Section te kan inpumkhatna a that viau lai hian hmasawnna tur tam tak kan la nei niin alanga. Branch YMA chak zawka a kal theih nan hruaitute mahni hma zawn theuh ah taima lehzual zawka hma kan lak chhoh a pawimawh hle.
b) Section leh Section : Section tin te kan hmalakna kawngah in erna rilru pu lova a thalam zawnga in el kan thiam a pawimawh hle. Chhiatni thilah chhiattawkte awmna section te kutah engkim dah mai lova a tul ang ang a kan thawhho a inpuihbawm thin nise. Chhiattawk an awma mahni section chhung chauh a lan tum lova section dangah pawh lan hram tum thin nise, chutiang tur chuan tan la thar leh theuh thei ila a lawmawm hle ang.
c) Section leh Sub-Committee : Section leh Sub-Committee te hi Branch tichak tura din a nih ang tak hian mahni Secion huamchhungah theuh tun aia chak zawka hmalak theih nise. Branch YMA chakna tur leh hmalakna tur siam chungchangah Section leh Sub-Committee te theihtawpa kawng hrang hranga hmalak tlan thin ni bawk se Branch YMA in tun ai hian hma kan sawn ngei ang tih a rinawm a ni.
Hruaitute intuaitharna neih a Section hrang hrang ten thupui kan sawiho  chu Branch Commitee in a ennawn leh vek tawh a, a khaikhawmna Section tina  pek tawhte a theih anga lo bawhzui turin Branch YMA Committee chuan Section tinte a ngen takzet a ni.

HRIATTIRNA  LEH  NGENNA

Branch YMA chuan Central YMA - in Vai mistiri rate a bithliah chungchangah vengchhunga Vai mistiri zawng zawngte chu kohkhawma tha tak leh zaidawh taka thil awmzia sawipui a tum a, Vengchhunga Vai Mistiri zawng zawngte chu vawiin tlai Dar 3:00 hian Primary School-ah kalkhawm vek tura ngen leh hriattir an ni. Vengchhunga vai mistiri inluah nei zawng zawngte chu an inluahtu vai mistiri te lo hrilhhriat theuh tur leh Permit Original leh Xerox Copy keng tura hriattir theuh tura ngen kan ni e. He hunah hian Branch Executive member zawng zawngte kim taka kal vek tura hriattir an ni bawk a ni.
Central YMA -in Vai Mistiri leh Helper hlawhbi a tuk  Mistiri in  ` 300/-aia tam lo leh Helper in ` 170/-aia tam lo a chhawr tura  min ngenna chu Branch YMA chuan khawtlang mipuite zawm a tihlawhtling theuh turin a ngen tak meuh meuh a ni.

YMA Day hlimawm taka hman a ni.

Chanmari West, June 19: YMA Day Vawi-76 na chu Ni 15.6.2011 (Nilaini) nileng khan Indoor Stadium-ah hlimawm tak leh ropui taka hman a ni. YMA Day hi chawhma dar 10:00 ah Function tan a ni a,  function hi Pu R.Lalhmachhuana, Chairman YMA Day Programme Committee leh Branch YMA Vice President ni bawk chuan a kaihhruai a ni.
He hunah hian Section hrang hranga memberten infiamna items chi hrang hrang hmangin hun an hmang a, zing dar 6:00 ah hun hmang tanin Mass Road Racing a tan a ni a, vengchhung a YMA member 76 lai mai YMA Day vawi-76 na denchhen hian an tlan a ni. Tin, tlan zawng zawngte hi Ball-pen tha tak pek vek an ni.
Zing dar 10 atangin Indoor Stadium ah YMA Day lawmna hi hman chhunzawm leh nghal a ni a, Vanapa Section chuan Opening Song mawi tak maiin hun an rawn hawng a, Kumpuan Chairman leh Branch President ni bawk Pu T.Ngurkhuma chuan Kumpuan thupui ‘Khawtlang Nun Siamthat’ hmangin thu tha tak tak a sawi bawk a ni. Infiamna hrang hrang in Section ten inelna thianghlim tak hmangin hun an hmang bawk a, chhun lamah  Ar sawhchiar tuihnai tak ei ho a ni.
Section ten infiamna hrang hrang a inelna an neih zawh hnuin a kharna inkhawm leh lawmman semna hun hman zui nghal a ni a, he hunah hian vengchhunga zirna leh infiamna lama mi hlawhtling te hnenah chawimawina hlan nghal a ni. Section hrang hrang Secretary te inzaisiakna neih chuan kalkhawmte beng a ti tlai hle. He hun hi vengchhunga pawl hrang hrang MUP, Local Council hruaitute leh memberten an hmanpuibawk a ni. YMA Day a Section hrang hrangten inelna an neih ah hetiang hi result a ni.
1st Khuangchera Section
2nd Neuva Section
3rd Vanapa Section
4th Taitesena Section
5th Chawngbawla Section
Lawmman pakhatna dawngtu section hian Silpaulin dawngin pahnihna in Dekchi, pathumna in Steel no an dawng a, palina leh pangana te hian Enamel no an dawng bawk a ni.
Intihsiakna Result
MASS ROAD RACING :
Men
1-na Lalremruata K-Sect.
2-na LalmawizualaK-Sect.
3-na Hmingthanmawia N-Sect.
Women
1-na Jenny Malsawmtluangi N-Sect.
2-na Lalramnghaki V-Sect.
3-na Lalruatfeli T-Sect.
KAWIKAH (W):
1-na V-Section
2-na K& N-Section
3-na C-Section
BALL KICK (M):
1-na Zomuanpuia N-Section
2-na Lalhriatzela (Sena)CH-Section
3-na Rosangpuia CH-Section
MUSICAL CHAIR (W):
1-na Irene Fanai V-Section
2-na Lalawmawii K- Section
3-na Lalhmangaihi CH- Section
TUG OF WAR (M):
1-na N-Section
2-na K-Section
3-na V-Section
TUG OF WAR (W):
1-na K-Section
2-na N-Section
3-na V-Section
CHINESE CHECKER (W):
1-na Zoramthari K-Section
2-na Lalthlamuanpuii T-Section
3-na Irene Lalhmingmawii K-Section
RING THEH :
1-na K-Section
2-na N-Section
3-na V, CH & T-Section
DART THROW :
1-na Samson Zothanpuia K-Section
2-na Malsawmzela K-Section &
Saitluanga Sailo V-Section
3-na VL.Thakima V-Section
K.Lalremruata CH-Section
        Vanlalhluta N-Section
DRAUGHT BOARD :
1-na C.Lalrintluanga V-Section
2-na L.Ringzuala T-Section
3-na K.Rosiama K-Section
CARROM BOARD :
1-na Vanlalsanga  & Joseph          
 Lalduhsaka T-Section
2-na Nundanga & K.Lalengmawia        K-Section
3-na Lalfakzuala & Lalhruaitluanga    K-Section
SECRETARY  SOLO :
1-na HV.Lalthavela, K-Section
2-na RK.Rozidinga, T-Section
3-na Zairemmawia, N-Section
H.Lalrinmawia CH-Section leh Hmingthansanga V-Section te an zai loh avangin ` 500/-an section in a chawi dawn a ni.
ATTENDANCE :
1-na N-Section
2-na K-Section
3-na CH-Section
OVERALL
1st - K Sect., 2nd-N-Sect., 3rd-V-Sect., 4th-T-Sect. & 5th-CH-Sect.

(YMA DAY Thlalak Photo Gallery-ah)

Central YMA Hall-ah CEC Meeting

Chanmari West, June 12: Ni 7th June, 2011 zan dar 7:00 khan Central YMA Hall-ah CEC Meeting neih a ni a, Pu Lal Chungnunga President-in kaihruaiin member 42 an tel a ni. Pu Lalbiakzuala, Gen. Secretary hnen atangin reports ngaihthlak a ni bawk.
Thurel tlangpuite :-
1. YMA General Conference thurel Hnamdang dan lova sumdawng chungchang lo zirchiang tura Study Group te thil hmuhdan tlangpui report ngaihthlak a ni a, Study Group te rawtna hrang hrang pawm a ni. Chung rawtna te chu :- a) Non Tribal Mizo hming hawha sumdawngte enfiah a, dan anga sorkar-in an chunga action a lak theih nan Trade & Commerce leh Taxation Deptt-ah an permit neihte uluk zawka ennawn tura ngen nise. b) All DC (ILP Cell) ah an permit pek chhuahte an purpose of stay ang lova hnathawk te dapchhuak tura ngen nise. c) Aizawl khawpui chhunga Mizo hming hawha sumdawng nia hriatte an awmna veng Branch YMA OB te phungbawmah sawmin dapchhuah nise, ti tawh lo tura ngen leh hriattir nise. Hei hian kawng sira Apple etc. zuarte pawh huam tel se, Mizo Iron Rod Dealer Association te pawh sawm nise.
2. YMA General Conference thurel RBI phalna nei lova a pung tam tak tiama sum la thin zirchiangtu Study Group ten an hmuhchhuah Chief Minister hnena thlen bak a dang 10 hmuhchhuah belh a nih thu ngaihthlak a ni a, hengte hi sorkar-ah thlen leh nise tin a tul angin media ah pawh tlangzarhin inzirtirna uar zawka neih nise tiha  ni.
3. Ruihhlo ngaite puala Gospel Camping 27.6.2011-10.7.2011 inkara neih tur chungchang sawiho a ni a, he Campingah hian Pu Lalsanglura Ralte, Sons of God Ministry Speaker chu sawm nise tih a ni.
4. Lengpui Branch YMA atanga Model Branch YMA Lengpui indan an dilna chu pawm a ni a, he Branch thar lo piang tur hi 25th November, 2011-ah an indang ang. Tin, Vengnuam Branch YMA, New Serchhip chu Venglai Branch YMA, New Serchhip tia an thlak chu pawmpui a ni.
5. FOMTU ten hlawhfa rate an siam a, Mizo Head Mistiri hlawh ` 500/- an tih chu kan ram Economic ngaihtuahin a sang lutuk a hriat a ni a, ` 400/- a tihniam tura ngen nise. Tin, Mizoram sawrkar-in Minimum Wages rate thar a siam tak avangin Labour/Helper hlawh ` 170/- a kalpui nise. Meeting hi tluang takin zan dar 10:15 ah zawh a ni. (Sourse CYMA Website)

YMA DAY HMAN DAN TUR HETIANG HIAN DUAN A NI

YMA Day Programme Committee’te chuan kumin 2011 YMA Day Ni 15.6.2011(Nilaini) a lo thleng tur atan hetiang hian memberte intihhlimna tur leh programme hman dan tur a duang. 1. MASS ROAD RACING (M&W) :- Ni 15.6.2011(Nilaini) zing dar 6:00 ah kawngkawipui (CH Sect.) atanga Vaivakawn lamah tlan thla in, Company peng atanga Sairang road ah tlan phei zelin, Edenthar-a Lalsangliana Petrol Pump atanga Chanmari ‘W’ lamah rawn chho lehin, tlan tanna ah tawp tur a ni. He Racing neih tur a Point hrang hrang-a duty turte :- 1) Hunthar kawngkual : Section tin Asst.Leader zawng zawng. 2) Company Peng : Section tin Treasurer zawng zawng. 3) Lalsangliana Petrol Pump : Section tin Leader zawng zawng. 4) Kawngkawipui : Pu T.Ngurkhuma, Pu R.Lalhmachhuana leh Pu Lalthuamluaia 5) Guide : Pu C.Lalzarliana, Pu K.Darthantluanga leh Dr.Lalramliana.
Hriat turte :- a) Mass Road Racing Flag off : Pu Vanlalsawma, Adviser. b) Tlan thleng hmasa te tan 1-na atanga 3-na thleng lawmman siam a ni ang. c) Tlanna tur nilo a tlan, shortcut a tlan leh motor-a bet/chuang tleng hmasa an awm a nih chuan pawm a ni lo ang. d) Duty na point tin ah tlan zawng zawng ten thil lak tur a ni a, la kim lova tlan thlen awi a ni lo. 2. YMA DAY Function :- A hun : Ni 15.6.2011(Nilaini) Dar 10:00 AM. A hmun : Indoor Stadium. Chairman : Pu R.Lalhmachhuana, Chairman YMA Day Programme Committee. Hunserh : Chairman. Kumpuan Thupui Sawi (10min) : Pu T.Ngurkhuma, Chairman Kumpuan Sub-Committee. Chawimawina hlan : Pu R.L.Thanhnuna, Secretary. Opening Song : Vanapa Section. INTIHSIAKNA ITEMS & KAIHHRUAINA 1. KAWIKAH(Women): 1) Section tin atangin mi 5 theuh.Mi 1 in vawi 3 zel a kap ang. 2) Section tin ten kawi 5 theuh in tum tur a ni. 3) Kawi hi a bi ah 5 chawn a ni ang. In charge : a) Convener : Nl Vanlalmaunpuii(Lalnui) - V b) Nl Lalthlamuanpuii -T c) Nl Lalramengi -N d) Nl Ellen Lalrintluangi - CH e) Nl Irene Lalhmingmawii - K 2. CARROM BOARD(Men) : 1) Section tin atangin pair 2 theuh. 2) In charge : Section tin Secretary te.Convener Pu RK.Rozidinga. 3) Incharge atana ruatte hian Carrom Board 2,hmanrua an mamawh ang leh kaihhruaina an ngaihtuah ang.Tin,Board 3 a khelh tur a niin,best of 3 a khelh a ni ang. 3. DRAUGHT BOARD(Men) : 1) Section tin atangin 2 theuh. 2) Incharge : Section tin Asst.Leader te.Convener Pu Lalngaihawma. 3) Incharge atana ruatte hian Draught Board hmarua mamawh ang leh kaihhruaina an ngaihtuah ang.Tin, best of 3 a khelh tur a ni. 4. CHINESE CHECKER(Women) : 1) Section tin atangin mi 2 theuh. 2) Incharge : a).Convener : Nl C.Zomuankimi - CH b) Nl Zosangzuali - K c) Nl PC Lalhmangaihi - T d)Nl H.Lalchungnungi - V e) Nl Lalthachhungi - N f) Incharge te hian hmanrua an mamawhte an ngaihtuah ang. 5. MUSICAL CHAIR(Women) : 1) Section tin atangin mi 5 theuh. 2) Incharge : Section tin Asst.Secretary te.Convener Pu Lalchhanhima(Puia) 3) Incharge te hian hmanrua an mamawh tur an ngaihtuah ang. 6. RING THEH(Mixed) : 1) Section tin atangin mi 20 theuh.Mi 1 in vawi 3 a theh ang. 2)Incharge: Pu R.Lalmalsawma,Executive Member - Convener leh Pu Lalramhluna Hauhnar - Executive Member 3) Incharge te hian bottle 3 leh ngun an ngaihtuah a ang a,hming leh record an buaipui ang. HRIAT TUR DANG : 1. Refresment atan Ar sawhchiar siam tur a ni a. 2. Intihsiakna item hrang hrangah (Open tel lovin) mimal tan lawmman 1-na atanga 3-na thleng a ni ang. 3. A pumpui lawmman atan hetiang hian ruahman a ni. 1st : Silpouline & Certificate 2nd : Dekchi 3rd : Steel No 4th : Enamel No 5th : Enamel No. 4. Section tin ten YMA Flag leh mahni Section Colour flag ken/tar theuh tur. 5. Item hrang hrang result hi Medal Tally a lak tur a ni. 6. Incharge hrang hrang : 1) Sound System : T-Section. 2) Seat arrangement : K-Section 3) Sanitation : V&N-Section 4) Sound System (Mass Road Racing) : CH -Section. 5) Banner : Pu K.Darthantluanga Asst.Secretary

BRANCH  YMA  EXECUTIVE  MEETING

( YMA Day hman dan tur rel )

Chanmari West, May 29: Ni 31.6.2011 (Thawhleh) Zan khan Chanmari West Branch YMA Executive Meeting chu President, Pu T.Ngurkhuma kaihhruainain, Pu K.Lalthakima, Leader Chawngbawla Section In ah neih a ni a, he meeting ah hian Branch Secretary hnen atangin hmalak tawhna hrang hrang ngaihthlak a ni. Meeting  ah hian hruaituten intuaitharna an neih a thupui thenkhat thlirho a ni a, YMA Day Programme Commitee ten YMA Day hman dan tur an duan te thlirho a ni bawk.
Thurel Tlangpuite :-
1. Hruaituten intuaitharna hun an neih a thupui thenkhat hetiang hian thlirho a ni :-
a) Tlawmngaihna :- Hemi chungchangah hian hruaitu kan nih ang ngeiin, memberte aia nasa zawka tanlak lehzual nise, Branch level atanga nasa zawka infuih thar ni rawh se.
b) Aia upa zah :- Kan tlahniam zel ni a hriat a ni.Aia upa zah hi mizo nun zemawi a nih avangin vawng nung zel ila,  YMA kalkhawm na mai ni lo, nu leh pa te pawh hemi kawngah nasa zawka tan la tura infuih thar zel nise.
c) Sakhuana :- Kristian nun dan tha ngaisanga a zawm tura Motto nei kan nih angin, sakhuana ah chanvo langsar chelhtu ni lo mah ila, hruaitu kan nih angin nasa zawka sakhuana ngaihpawimawh hram ni thei se.
d) Ruihtheihthil :- YMA memberte chu heng ang kawngah hian inhnamhnawih lo tura thuvawn/thuthlung nei kan ni tih hria a fihlim tum theuh nise tih a ni.
e) Inthenawm khawvenna :- ‘YMA chu tanpui ngaite tanpuitu’ tih a nih angin inthenawm khawvenna ah hruaitu kan nihna hmuh theih ngei tura tanlak nise, thenawm khawvengte thlamuantu nih tum theuh tura tanlak nise.
f) Branch hnatlang :- Branch hnatlangah hruaitute kan kal tha lo thin chu tanlak lehzual theuh tum nise tih a ni bawk.
2. YMA Day lo awm tur hi hlimawm taka hman nise, he hun denchhen hian hnatlang leh thildanga hman dan tur hetiang hian ruahmanna siam a ni :-
1) Ni 11.6.2011 (Inrinni) zingkarah thlanmual samfai hnatlang Branch huap a neih.
2) Ni 13.6.2011 (Thawhtan) zingkarah Section tin in mahni Section huamchhungah faina hnatlang neih tur a ruahman a ni.
3) Ni 15.6.2011(Nilai) zingkarah Mass Road Racing neih tur a ni.
4) Ni 15.6.2011(YMA Day ni) ah Zing Dar 10a.m - 3:00p.m thleng hian Indoor Stadium-ah Program hman tur a ni a, he hun ah hian Infiamna chi hrang hrang hmangin Section-wise intihsiakna hlimawm tak neih tur a ni. Intihhlimna bakah hian vengchhunga kawng hrang hranga mi hmingtha (zirna, infiamna, e.t.c.) te chawimawina hun hman tum a ni bawk. Intihsiakna Items tur te phek 4-na ah tarlan a ni.
3. Central YMA in Khawtlang Nun Siamthat bawhzuina atan a ruihhlo ngaite puala Chhandamna Camping, Bethel Camping Centre, Chawnpui a June 2011 a buatsaih tur atan tanpuina pe tura
min rawn ngen angin ` 2000/- pek nise tih a ni.
4. Secretary Village Health & Sanitation Committee, Chanmari West hnen atangin Sanitation atana hmalakna turin ` 10,000/- Branch YMA a rawn pek chu Committee chuan lawmthu a sawi takzet a, heng sum te hi Section hrang hrang te hmalakna atan  ` 2,000/- theuh in sem a ni.
5. Chanmari West Mistiri Association chuan thlan siamna atan hmanraw tangkai tak tak engemawzat a pe chu Committee chuan lawmthu a sawi mawlh mawlh a ni.

YMA Day Programme a Section-wise intihsiakna turte chu :-
a) Carrom Board : Double(Men) - Section tin atangin pair 2 theuh.
b) Draught Board(Men) : Section tin atangin mi 2 theuh.
c) Chinese Checker(Women) : Section tin atangin mi 2 theuh.
d) Musical Chair(Women) : Section tin atangin mi 5 theuh.
e) Ring theh(Mixed) : Section tin atangin mi 20 theuh, mi 1 in vawi 3 theh tur a ni ang.
f) Dart Throw : Open tur a ni ang a, point lak danah i/c ten mawh an la ang.
g) Balloon Passing(Mixed) : Section tin atangin Mipa 10 leh hmeichhia 10 theuh a ni ang a, hemi bikah hian point lak a ni lovang.
h) Kawikah (Women) : Section tin atangin mi 5 zel, mi 1 in vawi 3 zel kah tur a ni ang. tur.
i) Ball Kick(Men) : Section tin atangin mi 5 zelin, mi 1 in vawi 3 zel pet tur a ni ang.
j) Chana chhar : Hun bituk chhungin a duh apiang tan.
k) Tug of War(M&W) : Section tin atangin mipa 500kgs aia rit lo leh hmeichhia 450kgs aia rit lo an ni tur a ni.
l) Inzaisiak : Guitar/Khuang hmangin Section tin Secretary te an zai ang a, Guiter hi inperhsak awih a ni lo.
Items hrang hrang te tih zawh hunah hian lawmman semna hun hman nghal tur a ni.

Khawtlang Nun Siamthat’ chungchang Talk Show buatsaih

Chanmari West, May 29: Ni 24.5.2011(Thawhleh) chawhnu Dar 2:30 khan Central YMA huaihawtin I&PR Auditorium-ah YMA Kumpuan "Khawtlang nun siamthat" chungchangah Talk Show neih a ni.
He Talk Show hi Pi P.B. Lianthangpuii, IPRO in a Host a, Panel member ah Pu Lal Chungnunga, President, Central YMA, Pu Lalbiakthanga Khiangte, Aizawl SP, Pu H. Zosangliana, President, MJA, Dr. H.T.C. Lalrinchhana, Senior Civil Judge leh Dr. C. Lalhrekima, Psychiatrist, Aizawl Civil Hospital an ni. He Talk Show ah hian Ruihhlo do kawnga CYMA hmalak dan, Ruihhlo do a hlawhtlin nan engtia kalpui tur nge, kan ngaihhlut zawng leh ngaihsan zawng tih danglam, Khawtlang nun siamthat dan leh hrai nen a kalkawp chungchang leh Khawtlang nun siamthat na a chhungkaw pawimawhna te sawi a ni. He hun ah hian Central YMA hnuaia ruihhlo dotu, Central Anti Drugs Squad (CADS) in a din tirh atanga tun thlengin tanpuina sum ` 7,19,005/- a dawng tawh tih tarlan a ni. (Source CYMA Website)

CWSC EXECUTIVE MEETING NEIH A NI

Chanmari West Sporting Club Executive Meeting Vawi-1na chu Ni 27.5.2011(Zirtawp) zan khan Pu Lalliansanga (Malala) te In K-Section ah Vice President Pu C.Lalthanzuala kaihhruaina in neih a ni. He meeting ah hian kum 2011-2012 chhunga Sport displine (Sub-Committee) hrang hrang enkawltu tur te ruat an ni.Sub-Committee peng hrang hrang a hruaitu tur an ruat te chu heng mite hi an ni :-
Football Sub-Committee :-
Chairman : Pu Zonunsanga (Pate-a) - K-Section
Vice Chairman : Pu RK.Rozidinga - T -Section
Secretary : Pu Lalhmingliana (Puia) - T -Section
Treasurer : Pu R.Lalsangzuala - T -Section
Volleyball Sub-Committee :-
Chairman : Pu C.Lalthanzuala - T -Section
Vice Chairman : Pu F.Lalhmingmawia - K-Section
Secretary : Tv. Isarela - K -Section
Treasurer : Pu Vanlalhluta - N -Section
Tin, heng bak Displine bakah hian Athletics ah Tv. Zohmingliana Tlau, V-Section, Pu F. Lalhmingmawia K Section leh Tv. Thangsuanmanga CH section chu Incharge atan ruat a ni a, Babminton bikah hian Pu C. Lalzarliana Ch Section, Pu C. Zonunsanga T Section, Pu Lalbiakhlua T Section leh Pu R.K. Ramherliana V Section-te Incharge atan ruat an ni bawk. Contact Sport -ah Pu H. Laltanpuia K Section, Pu Lalchhuanliana T Section, Tv. Zohmingsanga Ch Section leh Pu Henry Lalremruatpuia N Section te incharge an ni bawk. Kum 2011-2012 atan a Sporting Club member fee atan ` 5/- tih a ni a, member hi a duh apiang tan nih theih a ni. Section hrang hranga hruaitute member ni duh zawng tura tih an ni bawk. Chanmari West Sporting Club Adviser atan Pu Vanlalhuma Chairman Local Council chu ruat a ni. Sport lama kan veng a lo changkan theih nan Chanmari West mipui te hian Chanmari west Sporting Club  hruaitutte hi i tawiawm zel ang u.

Branch YMA President, Secretary leh CEC Member ten Central YMA Hall-ah Emergency Meeting an nei

. Chanmari West, May 15:    Ni 9.5.2011 (Thawhtan) zan dar 7:00 khan Aizawl khawpui chhunga Branch YMA President, Secretary leh CEC Member ten Central YMA Hall-ah Emergency Meeting an nei.

        He Meeting hi Pu Lal Chungnunga, President, Central YMA-in a kaihruai a, member kal dan hetiang hi a ni. Central YMA OB - 6, CEC - 46, Branch YMA - 154, Total - 206 an ni.

        Branch YMA President, Secretary leh CEC Member ten Central YMA Hall-ah Emergency Meeting ah hian 13.4.2011-a CCC Meeting-in hnamdang (Vai) Mistiri hlawh Rs. 300 aia tam lo leh Helper hlawh Rs. 150 aia tam lo a lo bithliah chu Branch tinin chak taka bawhzui a, khuah taka ken kawh nise a ti a, he thutlukna hi Kohhran hrang hrang te an Headquarters theuhah min lo zawm sak tur ngen nise tih a ni. Hei hi Kohhran hrang hrangah pek nghal an ni bawk.  Tin, Bank lem chungchang sawizui a ni a, hemi chungchanga Central YMA hmalakna report ngaihthlak a ni a, NEREFS ltd-in loan an pek chhuahna form-a Branch YMA President te hming ziah hnan ngai a tih chu Central YMA hriatpui loh a ni. He meeting-ah hian Kumpuan bawhzui dan leh Ruihhlo do report te ngaihthlak a ni bawk.   

ZAWLBUK WORKING COMMITTEE DIN A NI

YMA in Zawlbuk kan sak mek chu hun engemaw chen chhunzawm tawh loh a nih avangin, chhunzawm leh nise tih rel a ni a. A tul ang leh buaipuii ngaite lo buaipui a hma la turin Branch Office Bearer te kaihhruaina in ‘Working Committee’ din nise tih Branch Executive Committee in a lo rel angin YMA Zawlbuk sak chhunzawmna turah Branch Office Bearers meeting chuan  hetiang hian Working Committee din a ni.

    Chairman Cum Manager    : Pu K.Darthantluanga
    Vice.Chairman             : Pu C.Lalzarliana
    Secretary                 : Pu Lalrinliana(Tea)
    Asst.Secretary            : Nl Lalramengzami
    Members:
        1.   Pu T.Ngurkhuma,     7.   PuR.Lalhmachhuana
        2.   Pu Lalthuamluaia    8.   Pu VL Thakima
        3.   Pu K.Lalthakima    9.   Pu C.Lalmuankima
        4.   Pu Lalthanruma    10. Pu Vanlalsawma
        5.   Pu R.Lalthazuala    11. Pu VL Huma
        6.   Pu R.L.Thanhnuna.    12. Tv Zothankima(Atea)
    Work Supervisor      : Pu K.Lalengmawia

Aizawl Khawpui chhung Branch President leh Secretary te kohkhawm an ni dawn.

Chanmari West, May 8:    Ni 9.5.2011 (Monday) Zan dar 7 hian Central YMA Hall, Tuikhuahtlangah Aizawl khawpui chhunga Branch YMA President leh Secretary te  chu Central YMA CEC te nen Emergency Meeting neih a ni dawn.
    Naktuk zana meeting neih tur ah hian Branch tin atangin President leh Secretary theuh kal tur a tih a ni a. Mizorama hnamdang (Vai) Mistiri leh Helper te hlawh Ni 13.4.2011-a CCC meeting-in a lo rel tawh bawhzui dan tur chungchang ngaihtuah ho a ni dawn a ni. Hnam dang mistiri-te hlawh hi ni khatah ` 300/- aia tam lo, helper-in `150/- tiin CCC meeting chuan a lo rel tawh a ni. Tin, heng bakah hian Mizorama chhunga Bank lem hmanga sumdawng chungchangte leh YMA Kumpuan ‘Khawtlang Nun Siamthat’ bawhzui dan turte sawiho a ni ang. Central YMA chuan  Branch President leh Secretary te kal theuh turin a ngen a, kal thei lo te chu aiawh Branch Office Bearers pahnih tal tel ngei turin a ngenin a hriattir  a ni.

Branch YMA Executive Meeting 

neih a ni.

Chanmari West, May 1: Ni 26.4.2011 (Thawhlehni) zan khan Chanmari west Branch YMA   Executive meeting chu President, Pu T.Ngurkhuma kaihhruaina in Pu Lalthanruma, Neuva Section In ah neih  niin he meeting ah hian Zawlbuk sak mek leh CWBYMA Hruaitu Intuaitharna thupui thlirho na neih a ni.
Meeting ah hian kan Branch YMA in YMA Zawlbuk kan sak mek chu hun engemaw chen chhunzawm tawh loh a nih avangin, chhunzawm leh nise tih rel a ni a. A tul ang leh buaipuii ngaite lo buaipui a hma la turin Branch Office Bearer te kaihhruaina in ‘Working Committee’ din a rel a ni. Tin, tun dinhmun ah hian Zawlbuk sakna atana pawisa leh hmanrua kan neih dan chu hetiang hian report ngaihthlak a ni bawk. 1) Sum : ` 6,73,767/- 2) rod : 181 Quintals.
Ni 24.3.2011 zana Hruaitute Intuaitharna Progmamme hun kan hman tak thupui hrang hrang sawihona kan neih tawh chu thlirho leh a ni a, tuna kan kalphung baka hma kan sawn theihna a nih beisei in hetiang hian chhiatni bik a tan kal tum nise tih a ni.
1. Lumen Chungchang :
a) Lumen  ngaiah Section  hruaitu ten mahni  Section kan ngaih pawimawh angin, section dang pawh ngaih pawimawh nise.
b) Branch hruaitu te lumen ngai an awmin tan la leh zual se, a theih chin chinah hruaitu (Chairman) insiam thin nise.
c) Darkar 3(thum) dan velah thingpui sem nise.
d) Boruak awmdan a zirin hruaituin hun hman thin nise.
2. Thlanlaih chungchang :
a) Lumen ngai a awma kan tlaivar lo a nih chuan thlanlaih ah tal tan lak nise.
b) Thlan kan laih in hruaitu ten awmze nei deuh a kaihhruai thin nise.
c) Thlanlaih hi a hma thei ang bera tan thin nise.
d) Thlanlai tur hian hruaitu ten memberte sawm thin nise.
3. Khawhar lenpui chungchang :
a) Khawhar lenpui-ah tanna hun hmang thei turin hruaitu ten tan lak nise.
b) Inchhungah hruaitute thut luh hram nise.
c) hruaitute tan hun hma a thlen tum thin nise.
4. Khawhar In riah chungchang :
a) Hruaitu, khawhar In riak rual chu khawhar in riah hram nise. Riah dawn chuan a hma lam a in put luh thin nise.
b) In riak tur chu zan dar 10:00 hma a in put luh nise, zan dangah pawh chutiang bawkin.
c) Zu leh ruihtheih thildang rui chung chuan khawhar In riah loh nise.

CENTRAL YMA THUCHHUAK

Search & Rescue Team :Ni 19.4.2011-a CEC Meeting chuan Chhiattawk rikrum thila awlsam taka tanpuina hna thawh zung zung a nih theih nan Aizawl khawpuichhung atan Search & Rescue Team din turin ruahman na a siam a. He Team a mi tur hian Aizawl khawpui chhunga YMA Branch tin atangin mi pahnih(2) Volunteer in ruat tura hriattirna chhuah a ni. heng ruat chhuah te hi Ni 15.5.2011 ral hmain Central YMA Office-ah hming leh Contact No. thehluh vek tur a ni.
Media Workshop : Media Workshop Branch YMA Chanchinbu enkawltu te tan Ni 19.5.2011 (Ningani) Dar 10:00 hian I&PR Auditorium-ah buatsaih a ni leh dawn a. He hunah hian Editor emaw aiawh mi pakhat (1) kal tur a ni.

Central YMA Central Executive Committee (CEC)  meeting neih a ni

Chanmari West April 24: Ni 19.4.2011 (Thawhlehni) khan Central YMA Committee Room-ah Central Executive Committee (CEC) Meeting neih a ni. Meeting hi Pu J.H. Zoremthanga, Vice President-in a kaihruai.
Thurel tlangpuite :- CAG Report-a Central YMA-in hna tan hma a bill  lem siama Revenue Department atanga cheng nuai 20 la chhuak ang tarlan chu pawisa hi Central YMA-in a la chhuak lova, sum hi cheng khat mah a dawng lova, Branch YMA ten Survey hna thawkin a thawk zo apiangin Revenue atangin pawisa hi an lak zawk thu Press Release hmanga siam a ni. YMA General Conference hun SAY ten sawn an dilna chu rampum huapa Committee sangber CCC in a lo rel tawh bakah rampumah puanzar a nih tawh avangin a hun ngaia kaltlangpui nise tih a ni. Vai Mistiri leh Helper hlawh chungchang CCC lo rel tawh chu Sub-Hqrs./Group leh Branch ah thawnchhuah nise, Local Council/Village Council te thawhpuia sawm ni bawk se. He meetingah hian Chhinga Veng, Ramhlun Sports Complex leh Republic Vengthlang atanga Life member nih dilte remtih a ni a, Kolasib Sub-Hqrs.- Serlui Group huamchhunga Vairengte Field Veng dinthar pawmpui an dilna chu pawmpui a ni bawk. Heng bakah hian Sub-Committee hrang hrang hmalakna hrang hrang sawiho a ni bawk. Krista Hnungzuitute Tawngtai Bethel Camping Centre, Chawnpui chu In sak belhna tur atan ` 50,000.00 a tanpui nise tih a ni bawk.

CYMA  CRICKET  TOURNAMENT

Central YMA buatsaih Tantia Inter Branch YMA Cricket Tournament chu zawhfel a ni ta a, Chanmari Branch YMA Team ten Ramhlun Venglai Branch YMA Team te hnehin an Champion. He inkhelah hian Chanmari in Bat hmasain Run 150 an siam a, chu chu umin Ramhlun Venglai te hian Over 20 ah Run 138 chauh an siam theih avangin Chanmari Branch YMA te hi a vawi-3 nan an Champion ta a ni.

2011-2012 atana Chanmari West Sporting Club hruaitu tur thlang

Ni 19.4.2011(Thawhleh) zan khan Kum 2011-2012 atana Chanmari West Sporting Club (CWSC) hruaitu tur thlanna chu Indoor Stadium-ah R.O. Pu RL.Thanhnuna kaihhruaina in neih a ni a, he hunah hian Sporting Club member thahnem tak kal khawmin hun hlimawm tak an hmang a ni.
Kum 2011-2012 chhung a CWSC hruaitu atan  heng mite hi thlanchhuah an ni :-
President : C.Lalzarliana
Sr.Vice President : H.Lalramhluna
Vice President : C.Lalthanzuala
General Secretary : C.Zonunsanga
Asst.Secretary : RK.Rozidinga
Joint Secretary : Vanlalhluta
Treasurer : R.Lalsangzuala
Fin.Secretary : Lalliansanga
Heng thlan chhuah te hian Sub-Committee hrang hrang hruaitu turte an la ruat leh dawn a ni.

Fimkhur tawk loh avanga kumtin ram kan tihkan thin avang hian Mizoram rohlu - thing leh mau leh nungchate nasa takin kan tikhawlo thin. Ram tikang lo turin mitinte i fimkhur tlang ang u. 

CCC  MEETING  NEIH  A  NI

Chanmari West April 17: YMA Rorelna sang Central Co-Ordination Committee (CCC) meeting chu Ni 13.4.2011 (Nilaini) khan President,  Pu Lalchungnunga kaihhruaina in Central YMA Hall-ah neih a ni.YMA Committee rorelna sang ber, Central Co-ordination Committee (CCC), thukhawm chuan Mizorama hnam dang mistiri hlawh chu Rs. 300 aia tam lo ni se an ti.
Central YMA President, Pu Lalchungnunga kaihhruaia CCC meeting chuan, Mizorama hnam dang inhlawhfaa awmte hlawh tur an sawiho a. Hnam dang mistiri-te hlawh chu ni khatah Rs. 300 aiin tam lo se, an ti a, helper-in Rs.150 hlawh se, an tih bakah, ruang endik theih loh vanga Aizawl atanga phurh chhuah theih lawk loh thin pawh a sutkian dan ngaihtuah nise an ti bawk.CCC meeting chuan kumin YMA General Conference, Kolasib Sub-Hqrs YMA-in a thlen tur chu October 25 - 27 chhungin Diakkawn khelmuala neih turin an rel a; General Conference-a thurel thenkhat bawhzui dan thlirho a ni bawk.

Central YMA huaihawtin School Academic Session chungchang sawiho a ni

Nimin 14.4.2011 khan Central YMA huaihawtin CYMA Hall-ah School Academic Session chungchang sawiho a ni a; he huna thusawitu, CYMA President, Pu Lalchungnunga chuan, Mizo thalai, MA leh BA zo tawh thahnem takin intodelh leh rual el an tum lo tiin, "A manganthlak ta hle a ni," a ti.
CYMA President chuan, Mizo thalaite chu rilru put hmang leh ngaihtuahnaah an inenchian a ngaih nasat thu a sawia, "thalaite'n thinlunga inbuatsaih nachang an hriat loh chuan, rêl pawh lo lut lo mah se, chîmral nih a hlauhawm tho," a ti . Mizorama hnam dang awmte'n rilru fím tak pú-in Mizote ei ral an tum a, chumi lakah chuan inven thiam a tul thu a sawi bawk. School Academic Session sawihona leh inrâwntlanna hi chawhma leh chawhnu-ah then a ni a; chawhma lam chu CYMA Gen. Secretary, Lalbiakzuala'n a kaihruai a, chawhnu lamah CYMA Education Sub-Committee Chairman, Dr. R Lalengmawia hoin thupui sawiho na neih a ni.
Sawihonaah hian, tuna Mizoramin sikul calendar a hman mek, January - December chhunga zirna kalpui chu mipuiin an zo lo tana an hriat thu te, phai lama tih dan anga academic session atan April - March hman tha zawka an hriat tawh thute an sawi hlawm. Sawihonaah hian thutlukna an siam a ni lo a; mahse he sawihona atang hian CYMA Education Sub-Committee chuan CEC-a thu thlen tur a duang ang a, chu chu CEC-in a rel leh dawn a ni. Sawihonaah hian Sub-Hqrs YMA, Group YMA, Aizawl khawpui branch leh pawl hrang hrang sawm bikte an tel a ni.

HSLC 2011 RESULT TIHCHHUAH A NI

Chanmari West April 10: Mizoram Board of School Education chuan High School Leaving Certificate examination 2011 result chu ni 7.4.2011 khan a tichhuak a, he result a pass percentage chu 69.99% a ni. HSLC exam ah hian candidate 11,025 awmin heng zinga 7,716 hi an pass a ni.HSLC exama pass 7,716 zinga 3,929 hi mipa an ni a, hmeichhia 3,787 an ni.
HSLC 2011 result ah hian Pakhatna pahnih awmin, chungte chu F.Lalvenhimi d/o F.Lalramenga (New Serchhip) Mt.Carmel School-a kal leh St. Paul’s HSS atangin Sujaya Singha d/o DK Singha niin mark 500 ah mark 466 ve ve an hmu a ni. Top 10-ah hian mi 13 an lang a, hmeichhia 11 niin mipa 2 an tel bawk a ni. HSLC exam ah hian compartmental chance nei 278 an awm bawk a, heng mite hian May 9 ah exam an nei leh dawn a ni. Tun tum HSLC ah hian candidate pass vekna school 144 a awm a, chutih laiin pass awm miah lohna school  29 a awm a, chung zinga school 25 chu zirlai fail vekna school a ni.
MBSE in hriattirna a chhuah danin Exam paper ennawn dil duh tan subject pahnih aia tam lovah dil theih a ni a, subject pakhatah fee ` 100 pein, April 21 hmain office ah dilna thehluh tur a ni.
Hetih lai hian kan vengchhung-ah bik heng New Horizon, Spingdale leh Chanmari West H/S result pawh a tha thawkhat  hle a,  New Horizon School ah hian candidate 44 awmin zirlai 43 an pass a, percentage chu 97.73% a ni a, Distinction-ah 1 awmin, letter hmu 13 an awm a ni. Springdale School-ah hian zirlai 17 exam in mi 13 an pass a, percentage chu 76.47% a ni. Tin, letter hmu mi 4 lai an nei bawk. Chanmari West High School ah hian candidate 11 zinga 8 an pass a, percentage hi 72.73% a ni. Exam centre 296 zingah 165-na an ni. Vengchhung atanga pass zawng zawngte CWBYMA chuan a lawmpui takzet a, hlawhtlinna chang ve lo te pawh hlawhtling ngei turin duhsakna a hlan a ni.

HRIATTIRNA

CYMA leh Fire & Emergency Services tangkawp, Fire awareness campaign-na chikhat, a duh apiang tel theihna Article inziahsiak. Thupui ‘Senmei a hrang lua e’ (Khawchhunga mei kang chhuahna chhan leh fimkhur tulzia te, a tantirh a chet vat hlawkzia leh kangmeiin min tih hreawm zia etc. tilang thei tur article) Word 2500 aia tamlo. Lawmman Pakhatna  ` 10,000, Pahnihna ` 7,000, Pathumna ` 5,000. Article ziaktuten May 2011 ral hma ngeiin CYMA office-ah thehluh tur a ni ang.
Hrechiang duh tan :
Contact : 9436196820/9436140005.

Kan News Editor RK.Malsawmkima nupui neih 

Editorial Board  te nen (7/4/2011)

BRANCH  YMA EXECUTIVE 

MEETING NEIH A NI

Chanmari West March 27: Ni 29.3.2011 ( Thawhlehni) zan khan  Branch Executive Meeting Pu Lalramhluna Hauhnar In Vanapa Section-ah Pu R.Lalhmachhuana, Vice President kaihruainain neih a ni.
He meeting ah hian member tam zawk kalin thu pawimawh tak tak rel a ni a, Adviser Pi Zamanthangi, AMC Ward IV Councilor ni bawk chuan meeting chhung zawng hian a uap bawk a, Chanmari West Branch YMA nen hian khawtlang hmasawnna kawngah theih tawp kan chhuah a kan thawhho chuan kan veng kan khawtlang hian nasa takin hma a sawn ngei ang tih a sawi a ni.
Thurel tlangpui te :
1. Kumin 2011 chhunga Section Budget a tan Rs.4500/- chu lungrual taka pawm a ni.
2. Vengchhunga rawn pem thar an awmin Section-tin te Pem Lehkha ah Epic Number CYMA in a phut angin ngai pawimawh theuh turin committee chuan a ngen a ni.
3. Chanmari West vengchhunga Political Party tin te YMA bungrua hman inkaihruaina zulzuia hmantir remtih a ni.
Ni 24.3.2011 (Ningani) zana Hruaitu Intuaitharna leh Kumpuan ‘Khawtlang Nun Siamthat’ hawnna neih chu chipchiar takin Review-na neih a ni. He hun kan hman tak ah hian  ‘YMA hruaitute hi kan memberte hma a ke pen tur kan ni tih hre thar leh theuh ila a tha ang’ tih Pu T.Ngurkhuma, President chuan a sawi a. Tin, Pu R.Lalhmachhuana, Vice President pawhin ‘YMA hi Sakhuana atanga intan a nih angin hruaitute’n sakhuana ngai pawimawh ang u, engkim a hun takah ti la, engkim a hmun taka kan dah chuan kan pheikhai a rual ngei ang,’ a ti bawk.
Inkhawmah hian Adviser-te an kal kim hle a, Pu Vanlalsawma pawhin thu sawiin ‘ YMA memberte’n nu leh pa te kan kaih harh a tul takzet a ni, hruaitute hian tan ila thar leh ang u’ tiin kalkhawmte thu a chah bawk a ni.

YMA Traditional Games kan branch che tha

Central YMA buatsaih Mizo Traditional Games hmanga branch hrang hrang inelna chu tun kar ningani khan Republic Field-ah tan a ni a. Kan Branch chuan intihsiakna hrang hrangah aiawhtirin, a che tha pawl tak zinga kan tel a, thil lawmawm tak a ni.
A tan ni khan Mizo lungdenah Pu F Lalhmingmawia (K) chuan lawmman pakhatna a la nghal teuh hle a. Kg 8 vela rit lung mum an indensiak a, feet 36.5 dengin, feet 37.1 a thui dengtu Vanlalhruaia (Rangvamual) tluk lo deuhvin pahnihna a ni.
Ningani hian kan branch chu inkawibah hmasa ber tura ruat an ni a. Mahse, darkar thum chhung an tumpui tur Zemabawk an nghah hnuin intihsiakah kan veng hmeichhiate an vanduai ta zawk.
Zirtawpni kha kan branch tan ni tha tak a ni a. Pu Lalrivunga (CH) chuan insuknawr pa teah lawmman pakhatna dawngin, final-ah Lalrinsanga (Sakawrtuichhun) nen an inawr tawk hle a. Kan veng tlangval hian hnehna changin veng a tihmingtha hle a ni.
Pu Lalhmingmawia’n tha takin hun a hmang bawk a. Lungdena pahnihna a nih hnuin insaihruipawhah final a lut leh a. Zirtawpnia final nghal lovin, nimin khan amah aia lian C Lalfamkima (Upper Republic) nen pakhatna an inchuh a, a dinhmun hriat hman a ni ta lo.
Intihsiak khar ni, inrinni thlengin kan branch-in beieina sang tak a nei thei a. Inbuan pa te (kg 65 hnuai)-ah Pu Lalrivunga leh Tv David Vanlalpeka (V)-ten 3rd round lutin pakhatna nih tumin inelna an hmachhawn zui a. YMa chhang pual inelnaah branch aiawh mipa leh hmeichhia an tel bawk a. An dinhmun erawh hriat hman a ni ta lo a ni.
Kan branch aiawhte hi Pu Lalbiakthanga (Adviser)   chuan an kal leh hawna tur motor a tumsak a, a chungah leh branch aiawha Mizo infiamnaa tel zawng zawngte chungah  Branch Committee a lawm hle.
Veng tihmingthaa lawmman latute chhuanawm a tih rualin, lawmman la ve pha ta lote inpekna pawh ropui a ti hle a. Central YMA-in Mizo infiamna chawinun leh tuma hma a lakna kawngah branch aiawha tel zawng zawngte a tihlawhtlingtu zingah an tel vek a. Branch chuan an chungah lawmthu a sawi tak zet a ni.

Central YMA buatsaih Mizo Traditional Games  2011 atan Branch YMA a inbuatsaih mek

Chanmari West March 27: Central YMA chuan Ni 31.3.2011 (Ningani) -a tan turin Mizo Traditional Games chi hrang hrang hmanga YMA Branch te inelna, Ramhlun Sports Complex-ah a buatsaih dawn. He infiamna atan hian kan Branch pawh in tel ve tumin Organising Committee te’n hma an la mek a, inhmuhkhawmna leh veng aiawh tur thlanna neih a ni.
Ni 22.3.2011 (Thawhleh) zan khan Indoor Stadium-ah he intihsiakna a tel turte Section hrang hrang atangin mi thahnem tak an kal khawm a, beisei aiin nula lam pawh an rawn thawkchhuak tha a, a lawmawm hle. Mipa Items bik hi mimal inelna a nih deuh vek avangin kan inthlahrung deuh nge kan thawkchhuak tha vak lova, a kal chhun te chungah Organising Committe leh Branch YMA chuan lawmthu a sawi takzet a ni. Heng kal khawm zing atang hian items hrang hranga tel turte Selection neih a ni. Tin, heng Branch aiawh tura thlanchhuah te hian Ni 25.3.2011 (Zirtawpni) zan khan Indoor Stadium-ah inhmuhkhawmna leh practice na hun an nei leh a ni. Kan Branch YMA aiawh tura thlanchhuah te chu :-
Mipa :
Inbuan Palian : 1. F.Lalhmingmawia ‘K’ 2. T.Lalremruata ‘V’  
Pate : 1. David Vanlalpeka ‘V’ 2. Laltharliana ‘K’
Insaihruipawh
Palian : 1. F.Lalhmingmawia ‘K’ 2. Lalrinfela ‘T
Pate : 1. Lalmalsawma ‘V’ 2. Lallawmawma ‘N’
Insuknawr Palian : 1. F.Lalhmingmawia ‘K’ 2. T.Lalremruata ‘V’
Pate : 1. Lalmalsawma ‘V’ 2. Lallawmawma ‘N’
Lungden : 1. F.Lalhmingmawia ‘K’ 2. Zonunthara(Tetea) ‘V’
Arpa Insual : 1. Lalmalsawma ‘CH’ 2. Lalchawisanga ‘V’
Arpa thai : 1. Laltharliana ‘K’ 2. Lalmalsawma ‘CH’
  3. Lalchhanhima ‘N’ 4. Lalhruaitluanga ‘N’
  5. Henry Lalremruatpuia ‘N’ 6. Ricky Lallawmawma ‘N’
  7. Lalhmuchhuaka ‘V’
Kalchhet : 1. K.Lalchullova ‘N’ 2. Vanzairempuia ‘K’
  3. Lalruatdika(Tetea) ‘N’ 4. Lalchhanhima ‘N’
Tug of war : Tug of war bik hi Ni.5.4.2011 (Thawhlehni) Dar 11 AM ah Ramhlun Sport Complex ah tho neih tur a ni a, Items hrang hrang a Mipa thlanchhuah pariat hian veng ai an awh bawk ang.
Hmeichhia :
Inkawibah : 1. R.Zoremkimi ‘N’ 2. Lalhminghlui ‘N’
 3. C.Lalhruaitluangi ‘V’ 4. Zothansangi ‘N’
 5. Kitty Laltlanmawii ‘V’ 6. Rinchhungi ‘K’
 7. Lalhmangaihzuali ‘K’ 8. Lalrinsangi ‘N’
 9. Lalrinmawii ‘K’ 10.Lalmuanpuii ‘K’
 11.Vanlalmuanpuii ‘V’
( Heng Hmeichhe thlanchhuah te hi Kawikah leh Ketaminu intlansiak items ah te rin nghal tur an ni ang.)
Tlawmngaia tel tura thlante’n harsatna an neih loh beisei a ni. He intihsiakna atana kan hmachhawp kan hlen theihna turin leh lawmman tha tak kan hawn ngei theihnan veng mipuite tawiawmna leh Nu leh Pa ten kan fa te hunawl lo siamsak a lo fuih sauh sauh turin Branch YMA chuan a ngen takzet a ni.

YMA  HRUAITU  INTUAITHARNA  HUN HMAN  A  NI   DAWN

Chanmari West March 20: Branch YMA Executive meeting in a lo rel tawh angin Chanmari West Branch YMA hruaitu intuaitharna chu Ni 24.3.2011 (Ninga) zan Dar 7:00 hian Chanmari West Primary School ah neih a ni dawn.
Hruaitu intuaitharna hun neih tur ah hian thupui hrang hrang sawiho na neia hun hman tur a ni a. Chairman ah President  niin N.Lalrotluangi, Vanapa Section in hun a hmang ang. He  programme  neih  turah hian Local Council member te tel tura sawm an ni. A hnuaia kan  tarlan ang hian Branch OB meeting chuan programee a duang a, a tlangpui tihlan a ni.
1. Inhmelhriattirna:
Branch Hruaitu : Secretary, CWBYMA
Section Hruaitu : Leader (Section)
Sub:Committee : Secretary (Sub-Comm’t)
Editorial Board : Editor, YMA  AW.
2. Thupui Sawi :
1. Chhiani Chungchang: 2. Hmalakna chungchang:
1) Lumen ah 1) Branch hnatlang-ah
2) Thlanlaih 2) Section/Sub-Committee hnatlang-ah
3) Khawhar lenpui 3) Branch Rorel bawhzui-ah
4) Khawhar in riah 4) Section/Sub-Committe bawhzui-ah.
3. Hruaitu nungchang : 4.Inpumkhatna:
1) Tlawmngaihna-ah 1) Branch leh Section
2) Ai a upa zah-ah 2) Section leh Section
3) Sakhuana-ah 3) Section leh Sub-Committee
4) Ruihtheih thil -ah
5) Inthenawm khawvenna-ah
3. Seat arrangement : Vanapa Section.
4. Light & Sound  : Chawngbawla Section
5. Sanitation  : K/N/T - Section
6. Registration : Branch Secretary kaihhruaina in Section leh Sub-Committee.
7. Refreshment : Frooti leh Cake siam nise, a buaipui turin Branch  sum  enkawltu te ruat ruat an ni.
8. Phatna : Rokhawlhna  lian  tham  nei  a  kal lo tan  phatna  ` 50  Branch Secretary emaw mahni awmna  Section/Sub-Committee Secretary te hnenah pek tur a ni.
9. Information :Property Sub-Commettee-in information mike hmangin Ni24.3.2011 zingkar-ah puan nise.Tin, YMA   AW ah  kimchang  tak leh chiang takin tarlan/chhuah  nise.
10.Hriattur pawimawh te:
a) Section tin ten thupui hrang hrang te hi mahni  Section theuh ah an lo sawiho anga an sawihona report kimchang takin chhiarchhuah nise.
b) Hruaitu intuaitharna programme hi a hun takah tan ngei a nih theih nan, Section leh Sub-Committee-in registration hun chhunga inziak lut kim ngei tura tanlak nise.
c) Section tin ten Section Committee-ah OB Incharge te tel ngei turin hriattir nise.
 

BRANCH EXECUTIVE COMMITTEE NEIH A NI

Chanmari West March 13: Ni 7.3.2011(Thawhtan) zan khan Branch Executive Committee Pu TC.Lalhmangaiha CH Section te inah  neih a ni.
Chanmari West Branch YMA Executive committee chu ni 7/3/11 (Thawhtan)zan khan Pu T. Ngurkhuma, President kaihhruaina in neih a ni.  Thurel tlangpuite chu a hnuaia mi ang hi a ni:
REPORT :
Section Member Life Member YMA AW YMA Chanchinbu
Chawngbawla   524     28   181 13
Khuangchera   479     20   195   26
Neuva   390     19   126 21
Taitesena   544     47   220 14
Vanapa   536     30   197 20
TOTAL 2473   144     919 94
a) YMA  Buk luahtu tur atan Pu Lalngaihawma thlan a ni.
b) Red Ribbon Inter Village Football neih zawh takah V/C team te ` 1000 pek an ni.
c) Kum 2011 atan Chhiatni Fund section hrang hrang te’n Category 2 ah khawn leh tur a ni a, Category A ah ` 200 (85%) leh Category B ah `100 (15%) a khawn tur a ni.
Ni 4.3.2011-a Chapchar Kut kan hman zawh tak review-na hun hlimawm tak neih a ni a. He hun a kan Branch YMA in Rallulam, Khuallam leh Cheraw ropui taka entirna hun a neih ah kawng hrang hrang a hma la tute ZCC, CWSC, MUP leh mimal bungraw hmantir tute zawng zawng chungah leh lam mawi taka entirtu te chungah committee chuan lawmthu a sawi takzet a ni. Tarlan tawh angin Chapchar Kut inbuatsaihna ah hian ` 8467 hmanral niin ` 19000 dawn a ni
THURELTE :
a) Kumin 2011 chhunga YMA hruaitu zawng zawng ( Br.Executive, Section, Sub-Comm’t leh Ed.Board) te March thla chawhnu lam hian Intuaitharna hun neih tura ruahman a ni a, programme leh tuldang chu Branch OB te kuta dah a ni.
b) Kan Branch YMA in Type Writer kan hman tawh loh 2 la awm chu Mualkhang leh Rullam Branch YMA te hnenah pek nise tih a ni.
c) Central YMA in Mizo Traditional Games Displine hrang hrang hmanga Sport a buatsaih turah kan Branch pawh tel ve ngei nise a ti a. He Sport atan a hma lo la turin Organising committee din a ni.
Chairman : Pu Lalrinliana (Te-a)
Vice Chairman : Pu H.Vanlalvena
Secretary : Pu RK Rozidinga
Asst.Secretary : Tv.Zairemmawia
Branch OB i/c : Pu K Darthantluanga
Members : Pu F.Lalhmingmawia
Pu TC.Lalhmangaiha
Pu C.Lalmuankima
Nl.Vanlalmuanpuii
Nl.Ellen Lalrintluangi
d) Zarkawt Youth Congress Committee in Ni 14 & 15.4.2011 a Aizawl North III, MLA Volleyball Running Trophy a buatsaih tura kan Branch YMA te tel tura min rawn sawmna chu Branch committee chuan Branch hminga tel turin Chanmari West Sporting Club kutah hlan chhawn nise tih a ni a, tul leh tha an tih anga lo kalpui tura tih a ni.

Chapchar Kut ropui taka hman a ni.

Chanmari West February 6 : Mizo ten’a  Kut chi thum kan neih zinga ropui leh ngaihhlut ber ‘Chapchar Kut’ chu Ni 4.2.2011 (Zirtawpni) Dar 10:30 A.m khan Aizawl Sipai Lammual-ah ropui taka hman a ni.
Chapchar Kut hun hmanna ah hian Chief Minister Pu Lal Thanhawla chu Kut Pa a ni a, Art & Culture Minister leh he kut-a Organising Committee Chairman Pu PC.Zoramsangliana chu Kut Thlengtu a ni. Miss Beth A. Payne (US Consul General, Kolkata) chu Khual Zahawm ah hman a ni bawk.
Chapchar Kut lawmna ah hian kan veng Chanmari West pawhin ‘Rallulam’ entirna hun hman a ni a,  YMA member leh vengchhung naupang engemawzat in lam hi an entir a ni. CYMA hruaitute leh Organising committee pawhin he lam entir thei a YMA a inbuatsaih chu lawmawm an ti hle. He lam entir hun hman ah hian ` 15000/- lawmmnan dawn a ni a, cheraw kanpui leh khuallam entirna ah ` 4000/- dawn a ni bawk. Chapchar Kut 2011 hi kum dang zawng aiin hlut a hlawhin ramdang atang pawhin chhimtu engemawzat leh chanchinbu lam mi an lo kal bawk a ni.

Chapchar Kut Ropui taka hman a ni dawn

Chanmari West February 27 : Mizo ten’a  Kut chi thum kan neih zinga ropui leh ngaihhlut ber ‘Chapchar Kut’ chu Ni 4.2.2011 (Zirtawpni) Dar 10:30 A.m hian Aizawl Sipai Lammual-ah ropui taka hman a ni dawn.
He hunah hian Mizoram Chief Minister Pu Lal Thanhawla chu Kut Pa a ni ang a, Art & Culture Minister leh he kut-a Organising Committee Chairman Pu PC.Zoramsangliana chu Kut Thlengtu a ni ang. Miss Beth A. Payne (US Consul General, Kolkata) chu Khual Zahawm atan hman a ni dawn.
He huna tel tur lam entir tur hian CYMA chuan Khawpui chhung YMA Branch tin te tlawmngaih chhuaha  heng a hnuaia hnamlam te hi entir turin a ngen a ni.
1. Cheraw (Kantluang)
2. Khuallam
3. Chai - Lalvunga Zai
Chapchar Kut 2011 hi ruahman lawk ang chuan Ramhlun Sport Complex a hman  tur a tih a ni a, lammual  chei peihfel thawkhat a nih tak avangin a hmun hi sawn leh a ni. He kut ropui tak hawn nan hian Durtlang Branch YMA Zaipawl chuan ‘Kan Ram Krista Kan Pe’ tih hla an rawn sa ang a, hunserh hi Rev.C.Lalsangliana, Chairman, MKHC chuan a hmang dawn a ni. Tin, CYMA huaihawtin Cheraw kanpui leh khuallam neih tur a ni a, he hunah hian YMA Branch tel zawng zawng te’n cheraw leh khuallam hi an show dawn a ni. CYMA leh Art & Culture Deptt. huaihawtin Chai leh Chhawnghnawh hun hman a ni ang. Mizo zaithiam kan neih lar hrang hrang te he hunah hian an zai dawn bawk a, Mizo hnamzia lan theihna chi hrang hrang en tur a chhawpchhuah a nih dawn bakah hnamlam chi hrang hrang entir a ni bawk dawn a ni. Heng bakah hian Beat Group lar tak tak ten hun an hmang bawk ang.
Kan veng Chanmari West pawhin he hunah hian ‘Rallulam’ entirna hun neih a ni dawn a, he lam hi YMA member te mai bakah naupang engemaw zat in Indoor Stadium-ah ngawrh takin an zir mek a ni.
Chapchar Kut hmanna turah hian Mual sir remchangah Mizo La deh leh Pawnpui tah entir a ni ang a, Kut hmangtu zawng zawng Mizo thawmhnaw a inchei tur a ni a, Hmeichhia te kekawr ha lo tur leh chhung tin te Kut Sa ei theuh  tur leh a nei lote pawhin Kut Artui tal ei theuh turin Chapchar Kut Organising Committee chuan a ngen a ni.

YMA KUMPUAN THUPUI ‘KHAWTLANG NUN SIAMTHAT’ 2011 KAIHHRUAINA

YMA General Conference vawi 65-na chuan, kum 2011 chhunga Kumpuan atan ‘Khawtlang Nun Siamthat’ a lo thlang leh ta a. Nikum lamah he thupui tho hi Kumpuan atan hmangin, khawtlang nun siamthat beihpui kan lo thlak tawh a, kan hlawhtling thawkhat hle a, hmabak thawh laklawh kan neihte thawk chhunzawm turin, kumpuan thupui ngai kan lo thlang leh ta a. Kuminah hian hlawk zawka kan thawh theih beiseiin, kaihhruaina awmsa ennawn a, siamrem hret a ni. Khawtlang nun siamtha turin do ngai leh inzirtir ngai a awm thin. Do ngai dik taka kan do a, inzirtir tur dik taka kan inzir bawk chuan, kan khawtlang nun hi kan siamtha thei tih ring ngam ila. Kan siamthat tum hi khawtlang nun a nih avangin, vawi leh khata tha duak duak thei a ni lo a, a rah chhuak a muangchang deuh a nih pawhin, dawhthei takin kan thawk fat fat ang a, kan la hlawhtling ngei ang.
THEN KHATNA - DO NGAITE

1. Ruihhlo : Ruihhlo hi mimal, chhungkua leh khawtlang nun tikhawlotu, ti raltitu leh thihna thlen tu a ni a. Ruihhlo avanga chhungkaw keh chhia leh boral ta sawi tur an tam ta hle. Chuvangin, khawtlanga ruihhlo zuar leh ruihhlo a awm loh nan mahni huam chhung theuhah theih tawp chhuaha hmalak ni se. Khawtlang nun siamthatna hian sual huat leh do a keng tel tlat a ni. Ruihhlo hian zu leh ruihhlo chi hrang hrang ruih nana hman te a huam vek a. Zu in te, ruihhlo tihching te leh ruih avanga buaina siam te kan zilhhau ngam tur a ni. Ruihhlo do kawnga Sorkarin mawhphurhna a pek Sorkar mite leh V.C te, Local Council te a remchan dan apianga thawhpui nise.
2. Mipat hmeichhiatna hman khawloh : Mizo khawtlang nunah mipat hmeichhiatna kawnga mi inthlahdah chu a hmei a pain mi pangngai zinga chhiar an ni ngai lo. Kristian sakhaw inzirtirnaah pawh sex hman dik loh hi sual lian tak a ni. Chuti chung chuan, tunlai hian nupui/pasal kawplai nei chunga a ruka midang kawpte, innei si lova sex hmante, kumtling lova pawngsualte, naupang chumchiapsex hmanpui a, an nunna laksak zui tak thawmte hial kan hre ta fo mai. Chuvangin sex hmansual hlauhawmzia leh pawizia hi uluk tak leh thiam taka inzirtir a ngai leh zual ta a ni. Mizote zinga sex zalen ta lutuk tiziaawm turin heti zawng hian tan la ila :
a) Naupang ngaihsak a, thlahthlam lo tura tan la thar turin, nu leh pate uar taka ngen ni se.
b) Tihdam theih loh natna HIV/AIDS hi, vei lo tura ngaih zingah pawh vei an tam hle a, sex hman atangin inkawichhawn a ni ber tih hi inzirtir uar sauh sauh ni se.
c) Pawngsual chingho hian an sim mawh viau a, an phu tawk hremna an hmuhna turin thuneitute lamah umzui thin ni se.
d) Tuai leh Patil hi Mizo khawtlang nunphung nena inhmeh lo a ni a, nihphung inang sex lama inkawp chingte phei chu mihring nihphunga sual a ngaih a ni. Inkaihhruaina tha leh inzirtir dan dik hmangin a pumpelh theih a, lo tlulut palh tawh pawh a chhanchhuah theih bawk.
Mihring puite hralh (Human Trafficking) :
Sumdawnna atana mahni mihring puite hralh (Human Trafficking) hi Mizoramah pawh kan lo hre ve tan ta. Mi thenkhat chu sal ang maia hnathawk tura hralh an ni a, mi thenkhat erawh chu mipat hmeichhiatna thila inzuar tura hralh an ni bawk. Mizoram atang ngei pawhin naupang leh hmeichhe thenkhat chu State pawnah inzuar tur leh thil danga chhawr turin hralh chhuah an lo awm ve ta. Hetianga mihring hmanga sumdawnna hi khawvel sorkar hrang hrang pawhin a buaipui mek a nih avangin fimkhur taka inzirtir ni se. Sum tam tak hlawh theihna hna, awlsam taka hmuh theih anga zawrh chi reng reng hi inbumna a ni deuh zel. A tirah tha viau dawnin a lang a, a hnu lawkah nawmsipbawlna tura buatsaih a lo ni leh thin a, chhanchhuah ngai an awm mek a ni. Zirna hmun tha taka awlsam te a luh theihna ni awm taka zawrhte pawh, inbumna a ni duh hle. Buaipui man hlawkna tel duh vanga hnathawh tur leh zirna tha insawihmuh hi mihring puite inhralh dan tlanglawn tak a ni tih hriat a tha. India Hmarchhak mite hi kan dinhmun a hniam avangin zuam kan hlawh bik thin a, buaina tawk pawh kan tam viau nghe nghe a ni.
3. Kut tling lova thil neih : Kawng hrang hranga kut tlinglova sum lak luh hi sual a ni a, kan dodal tur a ni. Sorkar sum leh bungrua mimal tana lak te, hlawkna um luat avanga bungraw chheprelh leh to taka bungraw zawrh te, depde taka Contract hna hrang hrang thawh leh hmantlak loh bungraw supply te, bumna hmanga pawisa inlaksak te hi khawtlang nun ti bawrhbangtu langsar zual an ni a. Mi awmloh hlana thlai, bungrua leh rohlu in ruksak te leh kut tlinglova thil neihte hi kan endawng ngam tur a ni. Kuttling lova hausakte, hnathawk lova sum awlsam kan um lutuk hi bansan a ngai.
THEN HNIHNA
NUNPUI TUR LEH INZIRTIR NGAI TE
1. Chhungkaw tha buatsaih :
Khawtlanga mihring nunhona awmze neihtirtu ber chu chhungkua hi a ni. Chhungkua hi sikul hmasa ber a ni a, chhungkaw nun dik atangin nunmawi a lo chhuak a, chhungkaw nun dik lo atangin sualna a lo chhuak bawk thin.
Chhungkaw nun thain khawtlang nun tha a siam a, khawtlang nun thain hnam nun tha a siam a ni. Chhungkuaah hengte hi inzirtir uar sauh sauh ila :
a) Nu leh pa zah leh chawimawi.
b) Chhungkaw dinhmun mil tawka khawsak thiam.
c) Naupang lutuk a nupui/pasal neih loh.
d) Nu leh pain fate thlahthlam loh a, a tam thei ang bera uap.
e) Mizoramah mahni intihhlum a hluar ta hle mai, hemi veng tur hian chhungkuaah zirtirna tha inpek ni se.
2. Mizo nun zemawi chawi nun :-
Mizo nih tinuamtu, Mizo nun timawitu, Mizokhawtlang nuna chhuanawm tak takte hi chawi nung thar leh turin tan la ila : a) Tlawmngaihna leh rinawmna chhawm nun.
b) Aia upa zah leh naupang zawkte duhsak.
c) Thenawm khawveng laka thilphal. d) Tanpui ngai apiangte tanpui. e) Tawngkam mawi leh hawihhawm hman. f) Midangte ngaihchan nachang hriat.
3. Intodelh leh taimak :- Intodelh hi zahawmna a ni a, mahni thawhchhuah leh rochan phuloa nun leh khawsak hi thil zahthlak tak a ni a. Thatchhiat leh dawngdah avanga nghei reng leh pachhiate hi miten an tanpui chak ngai lo. Ramdang mi leh hnamdang miten kan rama hna an thawh ang hi, a ram neitu thalaite hian kan thawk thei ve theuh a ni. Mamawh ngah chuan hna a thawh tam a ngai a, malsawm tlaka taima taka hnathawh hi intodelhna kawng pawimawh tak a ni tih hi inzirtir uar ila.
4. Ngaihhlut tur thlan thiam :-
a) Zaithiam te, hmeltha te, infiam mite hi mi tinin kan ngaisang a, kan buaipuiin kan phurpui chiam thin.Hnam changkangte erawh chuan tihtur tih loh phah khawpa buaipui chiam an ching ve lem lo, hnam mawl zia deuh a ni awm e.
b) Thawhrim avanga mi hlawhtlingte, rinawm taka mahni hna thawk thinte, ram leh khawtlang tana tangkai zawnga mi inphalte hi an ngaihsanawm a, entawntlak pawh an ni a, chawimawi an phu. Kan tum phawt chuan anmahni ang kan ni ve thei tih hi pawm tur a
ni.
5. Zirna leh thiamna kawnga rual el :-
Zirna leh thiamna hi hmasawnna kawnga rahbi hmasa a ni a. Khua leh venga mithiam an tamna apiangah khawtlangin hma a sawn a, khawtlang nun a nuam nge nge. Chuvangin zirlaite fuihthiam te, zirna kawnga mi hlawhtlingte ngai hlu a, chawimawi a tha hle. Chhel leh taima taka kan zir peih phawt chuan hnamdang te kan phak a ni tih hi zirlai thinlungah tuhin, Sorkara dinhmun pawimawh luah thei turin Central Service exam hrang hrang te hmachhawn tura inbuatsaih a tha hle. Hetih rual hian zirna kawnga hlawhtling lem lo - mitaima, tumruh leh kut themthiam te tan hlawhtlinna a awm tho a ni tih hi thalaite zirtir nise. Vawihnih khat hlawhchham avanga beidawng mai lovin, tumruhna nei tlat turin thalai te zirtir nise.
6. Khawtlang, ram leh hnam hmangaihna thinlung neih :- Thing leh maute leh nungchate hi mihringte nunna hnar an ni a. Tura sangha leh nungcha hraite dodalin, ram kang tur ven hi a ram neitu mitin mawhphurhna a ni a. Tui lakna leh tuikhur hnar vah chereu te hi tuihna tikangtu a ni a, kan humhalh tur a ni. Nungcha leh ranvulh te laka ngilneih hi nunphung tha a ni a, an chunga hleilen leh tihnawmnah te phei chu thiang lo leh hmuingil lohna hiala ngaih thin a ni. Mihringte hi a huhoa cheng leh innghengtawna khawsa kan nih avangin inpumkhat nan inlainat tawn leh inngaichang tawn taka khawsak ho a tul hle. Kan ram neihchhun MIZORAM hi, Pi leh Pu ten ral leh sahrang hmaa min lo sahchhuah sak ram anih avangin enkawl a humhalh tlat tur kan ni a. Kaihruainain a tarlan kan do tur te hmachhawn a, nun ze mawi leh nunphung tha te chhawm nung zelin, a neitu rilru pu a, ram leh hnam hmangaihna thinlung nena hma kan lak phawt chuan Zofate hian hma kan
sawn ngei ang.
CENTRAL YMA TIH TUR :
1. Kumpuan hawnna leh Kumpuan pualin Seminar/Workshop buatsaih ni se.
2. A theih leh remchang chinah Kohhran, Sorkar Department, tlawmngai pawl dang thawhpui theih awmte thawhpui ni se.
3. Kaihhruainain hmalakna tur kawng hrang hrang a tarlan bakah a tul dan azira hmalak ni se.
4. YMA General Conference thupuiah hman ni se.
5. A theih leh remchang angin Central YMA Chanchinbuah tarlan thin ni se.
6. Kumpuan bawhzui tha Group leh Branch tan lawmman a buatsaih ang.
SUB-HEADQUARTER YMA TIH TUR :
1. YMA Sub-Headquarters Conference thupuiah hman ni se.
2. A theih leh remchang chinah Kohhran, Sorkar Department, tlawmngai pawl dang thawhpui theih awm te thawhpui ni se.
3. Kaihhruainain hmalakna tur kawng hrang hrang a tarlan bakah a tul dan azira hmalak ni se.
4. Kumpuan bawhzui tur Committee indin ni se.
5. Zirna in hrang hrangte tlawhin Kumpuan Thupui sawi thin ni se.
GROUP YMA TIH TUR :
1. YMA Group Conference thupuiah hman ni se.
2. A theih leh remchang chinah Kohhran, Sorkar Department, tlawmngai pawl dang thawhpui theih awm te thawhpui ni se.
3. Kaihhruainain hmalakna tur kawng hrang hrang a tarlan bakah a tul dan azira hmalak ni se.
4. Kumpuan bawhzui tur Committee indin ni se.
5. Mahni huamchhunga zirna in hrang hrangte tlawhin
Kumpuan Thupui sawi thin ni se.
BRANCH YMA TIH TUR :
1. YMA Day-ah thupui a hman ni se.
2. Kumpuan pualin vantlang inkhawm buatsaih nise.
3. A theih leh remchang chinah Kohhran, Sorkar Department, tlawmngai pawl dang thawhpui theih awm te
thawhpui ni se.
4. Kaihhruainain hmalakna tur kawng hrang hrang a tarlan bakah a tul dan azira hmalak ni se.
5. Kumpuan bawhzui tur Committee indin ni se.
6. A theih leh remchang angin Branch chanchinbuah tarlan thin ni se.
7. Zirna , eizawnna, kuthnathawh, sumdawn leh politics-a mi hlawhtling leh entawn tlak chawimawi phute chawimawi ni se.
8. Mahni huamchhunga zirna in hrang hrangte tlawhin Kumpuan Thupui sawi thin ni se.