MHIP IN BLACK DAY AN HMANG
Chanmari West November 14: Mizo hmeichhiate pawngsuala an thihna hial thleng thin duhloh zia lantirna atan Mizo Hmeichhe Insuihkhawm Pawl (MHIP) chuan ni 12/11/10 (Zirtawp) khan BLACK DAY (Lungngaihna Ni) an hmang. He hun hi Mizo High School Field, Mc Donald Hill, Zarkawtah hman a niin Mizo hmeichhe rualte chu thawmhnaw duma inthuamin, Mizorama hmeichhe pawngsual leh thahna a thlen tawh lohna turin Pathian tanpuina an dil a ni.Hemi ni hian Aizawl SP Pu Lalbiakthanga Khiangte (Chanmari Werst pa) chuan thusawiin ‘Nikum aiin kuminah pawngsual case register a pung a, tin pawngsualtu aiin a tuartu an tam zawk a ni’ a ti. Aizawl SP in a sawi zel na ah ‘Misual man tur chauha police te buatsaih kan ni hi a chang chuan a pamhmai ka ti thin a, pawngsual tuarte chhawmdawlna leh ngaihsakna lam kan ti thei lo hi hrehawm tih chang ka nei thin,’ a ti bawk. Central YMA President Pu Lalchungnunga chuan ‘Nausen pawisawi lo te thisen chuan ring takin YMA te min au ta a ni, it tham loh ittute, puitling pawh nise an duh lo chung khawih chingte chu dam tlak an ni lo’ a ti. Khawchhak mite lakah duh aia Mizo mipuite an ngawih rei thu sawiin, ‘Lalpa laka kan rochan fanaute enkawl tura khawchhak mite hman hi kan sim thei tawh em? Burma mite enkawl atan chuan kan fate hi an hlu lutuk tih kan hriat a ngai a ni,’ a ti.
Central KTP leader Rev K. Lalpiangthara chuan, ‘Misualte huatna rilru kan pu haw ang tih a hlauhawm a, Lal Isuan an tana tawngtai tura min tihna hi kan hriat reng a ngai a ni,’ a ti.
Black Day hmanga kalkhawm mipuite chuan resolution siamin, pawngsualtute na taka hremna dan sorkarin siam se an duh thu an tarlang a, tunhnaia naupang pawngsuala thihna hial tawktu Emanuel Zomuanpuii, Thakthing Veng leh Lalhlimpuii, Muallungthu te ralna atan mipuite chuan ` 47,030 an thawhkhawm bawk.
No comments:
Post a Comment