CHANMARI WEST BRANCH YMA

YMA KUMPUAN ‘KHAWTLANG NUN SIAMTHAT’ HAWNNA HUN HMAN A NI

Chanmari West February 13 : YMA Kumpuan “Khawtlang Nun Siamthat” tih chu ni 16.2.2011 khan Aizawl Vanapa Hall-ah Pu Lal Chungnunga, President, Central YMA in a hawng.
Kumpuan hawn inkhawm hi Pu JH Zoremthanga, Vice President Central YMA in a kaihruai a. Pu C. Lalzamlova, CEC Memberin hunserh  hmangin Pu Lalsangzuala  Sailo, CEC Member leh Kumpuan Sub-Committee Secretary hnen atangin Report ngaihthlak a ni.
Kumpuan hawnna thu sawiin Pu Lalchungnunga, President chuan Kumpuan hmalakna atan rim taka thawk turin YMA hruaitu kalkhawmte a chah a. Kan thawhrim rah hi tun maiah kan seng lo a nih pawhin nakinah kan la seng ngei ang a ti. Ruihhlo do kawngah Branch hrang hrangte tan la thar tura fuihin tun dinhmunah hian Branch YMA ten CADS te kan ring lutuk mah maha a hriat thu a sawi. Misual kan beih thin te hi an taima hle tih sawiin taimak kawngah kan khum thei lo a nih pawhin kan umphak zel erawh chu an ngai a ni a ti. Central YMA President chuan Mizoram map hi engtik niah emaw a la bung mai ang tih a hlauh thu pawh a sawi nghe nghe a ni.
Kumpuan thupui sawi Pu Lalbiakzuala, Gen. Secretary leh Pu Vanlalruata, Asst. Secretary te hnen atangin ngaihthlak a ni a. Chawhnu lam Session neih ni lehin Pu R. Lalngheta, Treasurer in a kaihruai a. Sawihona hun hlawhtling tak neih a ni. Chawhnu session-ah hian Pi Kawlchhungi, Bawngkawn, chuan YMA hmalakna avanga hlawk taka zu a zawrh thin a bansan thu (Testimony) ngaihnawm tak a sawi a. Mimi Renthlei, Mami Varte leh HC. Sanglura te zai ngaihthlak a nih bakah  Tuarpuii leh a thiante hnen atangin fiamthu ngaihthlak a ni bawk. Pu J. Lalsailova, Fin. Secretary in lawmthu sawiin hun a khar a ni.
Kumpuan ‘Khawtlang Nun Siamthat’  hawn Inkhawmah hian khawpui chhung Branch hrang hrang YMA hruaitu mi 359 an kalkhawm a ni. Tlawmngaih chhuaha, hun hlu tak senga Kumpuan Hawn inkhawma tel zawng zawngte chungah Central YMA chuan lawmthu a sawi a ni.

YMA MEMBER LAK MEK A NI

Kan vengchung-a YMA member tur Section tinah lak mek a ni a, member ni tur te tana hriat ve atan a tha YMA DAN BU in a sawi angin Member nih dan kan han tarlang e.
Member ni thei te :
1) Mizo tupawh, tleirawl/rawlthar chin chunglam chu, YMA thiltum leh dinchhan te, a thuvawn te, a thuthlung leh a ‘kaihhruainate anga awm inhuam apiangte.
2) An khawsak dan phung ena Br.Executive Committee-in YMA member-a a pawm theih te.
3) Life Member (Central YMA huamchhung) : A awmna Branch ah kum 5 member a nih tawh hnuin Br.YMA a dil ang a, Branch in Life Member ni tlaka a ngaih chuan Central YMA ah Br. YMA kaltlangin Life Membership Fee pein Life Member a ni ang.