Branch YMA-in NH-54 pawhtu Central road siamtha dawn

Chanmari West, June 24 :        Chanmari west branch YMA chuan National highway 54 Central road-in a pawhna lai  chu siamtha turin hma a la mek a ni. He lai kawngpui hi siam tlang a ni tawh a, amaherawhchu national highway a pawhna lai tak hi a awih lutuk a, kawng hi lung rema awih lo deuh hlek tura siam a nih loh chuan motor tan kal tak tak theih a ni lova, chuvang chuan bialtu MLA chuan helai kawngpui siamtha tur hian kan branch YMA hi a ti ta a ni.
    Ni 21.6.2012 zingkarah khan balu dahna tur siam hian branch executive memberte chu an hnatlang tawh a, balu pawh dah nghal a ni. Nimin khan lung dah leh tura beisei a ni a, hna pawh tha taka thawh a ni ang.
    He hna enkawl tur hian committee chuan Pu RL. Thanhnuna branch secretary chu a ruat a, hna tan a nih hnu hian hnatlan pawh a ngaih mai theih avangin memberte lo inkau theuh turin branch committee chuan a ngen lawk a ni.
    Nimin zing khan bialtu MLA Pu Lal thanzara, PWD EE leh branch OB te nen hnathawh dan tur enho a ni a, naktuk hian hna tan nghal tum a ni. PWD lam ruahman dan chuan November thla veleh helai kawng hi metal an tum a, chuvang chuan helai kawng hi tha taka lo zawh fel hi YMA chuan a tum a ni.

Bawlhhlawh  paih  chungchangah  inrawnkhawm a ni

    Ni 21.6.2012 zanah khan Govt. middle school-ah Chanmari west Local council kaihhruaiin bawlhhlawh paih chungchanga Ward No VI chhunga Ward committee-te leh Chanmari west a NGO te tan a inrawnkhawm hun hman a ni. PPP mode hmanga bawlhhlawh paih chungchang inrawnkhawm hi Ward No - VI huam chhung tan ruahman a ni a, he hun hi Chanmari west local council chairman Pu F. Zosanga chuan a kaihruaia a, Executive councillor Pu Lalzirliana’n a hmanpui a, PPP mode chungchang a sawifiah a ni. PPP mode-ah hian mipui hian 10% thawh tur a ni a, a bak chu sawrkar lamin a tum dawn a, mipui hian Rs 10/- aia tlem lo theuh thawhkhawm a ngai dawn a ni. He hunah hian Hunthar lam an kal thei lo a ni.

YMA day nuam leh hlim takin kan hmang

Chanmari West, June 17 :     YMA day chu khawchhe tak hnuaiah section hrang hrangten nuam leh hlim takin an hmang a, zawngchhang tlak an ti hle. YMA day hi branch committee chuan section hrang hranga hman a rel a, section hrang hrangte hian an section chhungah faina hnatlang an nei theuh a, hnatlang thawkchhuak pawh an tha hle, intinah YMA flag zar theuh a ni bawk.
    Chawngbawla section chuan park-ah hman tumin ruahmanna an siam a, khawchhiat avangin zawlbukah an insawn a, chawimawi tlakte chawimawiin,  zaithiam leh Apple band ruaiin zai leh lamin hun nuam tak an hmang a, member 300 zet an kal a ni
    Neuva section chuan sihhmuia seasonz picnic spot-ah an hmang a, member 90 chuang zet an tel a, intihhlimna chi hrang hrang leh zirlai leh YMA inkhel thiamte an chawimawi a, zing karah thing an phun bawk a ni.
    Vanapa section chuan Pu Ngulliana in chungah an hmang ve thung a, zirlai ti thate, infiamna lama kan veng leh Mizoram tihmingthatute leh CWBYMA player-te an chawimawi a, an section chhung zaithiamten zaiin an awi a, hruaituten thuchah an sawi a, tlaiah ruai an thehho nghal a, mi 150 vel zet an tel a ni. An section chhung damlo mi 12 an kan bawk.
    Taitesena section chuan Indoor stadium-ah leader kaihhruaina hnuaiah  intihhlimna chi hrang hrang hmangin hun an hmang a, chawimawi tlak leh branch aiawh inkhel thiamte an chawimawi a ni.
    Khuangchera section chuan Govt. middle school-ah an hmang a, branch psident leh local council chairman ten an hmanpui a, infiamna chi hrang hrang hmangin an inti hlim a, sawhchiar tui tak an pirho a, member an kal tha hle.

Thisen pe tam chawimawina kan dawng

Ni 14.6.2012 khan Association for VoluntaryBlood Donation chuan pawl hminga thisen pe tamte chawimawina hun an hmang a, he hunah hian branch vice president Pu R. Lalhmachhuana chuan YMA category a thisen pa tam pathumna kan nih chawimawina a dawng. Tarlan tawh angin kuminah hian Synod hospital tan thisen unit 114 kan lo pe tawh a ni.

YMA football, Vodafone Cup-ah Chanmari West pahnihna

Chanmari West, June 10 :        Chanmari West branch YMA a din tirh atanga a vawi khat nan Central YMA buatsaih branch hrang hrang football inelnaah final kan khel a, Ni 4.6.2012 khan lammualah a khawnawtin kan thawk chhuak a, Armed Veng nen champion nih inchuhin 3-1 in kan chak ta lo. A pumpuiah pahnihna kan ni a, lawmman trophy leh pawisa fai Rs 30000/- kan dawng a ni.
    He inkhelhah hian si hnih kan phurh hnuah kan branch striker H Lalnunzira’n a tauh lut a, kan veng team hian theihtawpin bei ngial mah se, si khat kan chhuah belh leh a, hnehna kan chang zo ta lo. Hetih lai hian Zirtea’n kan khelh apiangin goal a thun a, tournament chhunga goal 15 kan khung zinga goal kua a tilut.
    Kan veng teamte tanpui tur hian veng mipui kan thawkchhuak tha hle a, incheina leh ri thei chi hrang hrang nen kan tawiawm a, kan tum angin hlawhtlinna chang zo lo mah ila, veng mipuiten a tawp thlengin team an thlawp thatzia an lantir a ni.
    YMA basketball-ah kan veng team-in consolation prize-ah no dozen 3 an dawng bawk. Tounament hi branch committee chuan thlir letin, kan dinhmunah lawmawm a ti a, player, coaching staff leh team tanpuitute bakah veng mipuite chungah lawmthu a sawi.

_________________________________________________________________________

YMA Day atan Section-te inbuatsaih

    YMA Day kan lo thleng dawn ta, branch committee chuan branch huapin intawhkhawm a buatsaih dawn lova, chutih laiin section lamah ropui taka hun hmang turin a ngen.
    Section tin nasa takin an inbuatsaih a, YMA day-ah hian branch committee chuan chhungkaw tin YMA flag zar theuh turin a beisei a, bawhzuiin section-ten flag an siam a, an zuar chhuak mek bawk. Day pual hian section-in faina hnatlang an nei theuh dawn a, hei bakah hian an remchan angin an lawm ang. CH chuan park-ah hun hlimawm tak hman tumin an inbuatsaih a, T pawhin indoor-ah he ni hi ropui taka hman an tum. K chuan hmunawl remchang an hmuhna hmunah hun hlimawm taka buatsaih an tum a,  V-in a remchan anga hman an tum bawk.

Branch committee a lawm

    CYMA football leh basketball tournament kan khelh zo ta a, Pathian min hruaina nasa tak kan dawng a, football bikah phei chuan pahnihna dinhmun kan luah thei hial a ni.Hetiang kan thlen theihna kawngah hian player leh coaching staff inpekna leh thawhrimna a ropui kan ti a, Veng chhung pawl hrang hrangin sum leh pai min pein min tawiawm a, veng mipui leh min tantuten sum leh tha nasa tak an seng a, heng zawng zawngah hian branch committee chuan lawmthu a sawi a ni.

YMA Day puala president Pu T. Ngurkhuma  thuchah

    Kum 2012 YMA Day chu kan lo thleng leh dawn ta; he hun lo thleng turah hian YMA member zawng zawng chibai ka bukin duhsakna ka hlan e.
    YMA Day atang hian member-ten Kristian nundan tha a nung a, mi dang tan inpekna thar leh Ram leh Hnam humhalh kawngah nasa lehzuala tan lain, hnam leh chi bil zawnga kal lo va, mizo nunze mawi chhawm nung thar zel turin ka ngen a che u. YMA dam reng rawh se, ka lawm e.

Final khel turin Chanmari West inbuatsaih

Chanmari West, June 3 :     Chanmari West branch a din tirh atanga a vawi khat nan Central YMA buatsaih branch hrang hrang football-a inelnaah final kan khel dawn a, zirtawpni khan semifinal-ah 2-0 a Venghlui hnehin  Vodafone Cup trophy la thei turin a vawrtawp kan chuang chhuak.
    Venghlui hmaah H Lalnunzira (Zirtea)’n goal hmahruai minute 14-ah a thun a, Racy K Lalremmawia’n minute 19-ah pet lut ve lehin, heng goal hnihte hi ding lam sir atanga Lalremruata’n a siam luh ve ve a ni.
    Kan veng hian thawhlehni khan quarterfinal-ah 2-0 in Bethlehem Vengthlang kan hneh. He inkhelah hian fuh takin striker pahnihte an inkawp a, Racy-an a siam luh chu Zirtea’n tauh lutin goal hmahruai a thun. Chawlhlawk hnuah captain K Lalrinchhana (Itana) chuan freekick pet Lalrinsanga Khiangte chuan a tauh luh bawk a, kan khelh hnuhnun vawi hnihah vawi li kan thun laiin goal kan chhuah lo.
    Inrinni kal ta khan round of 16-ah Ramhlun North nen kan intum a, inkhel hautak zetah Chanmari West team-in nungchang ropui tak lantirin, minute 80 lai player 10-a khel chhungin hnehna an chang.
    Minute 11-ah kan centre-back R Zoramthara hnawh chhuah niin Ramhlun North hian goal an thun zui a. Player 10-a kan khelh hnuin nasa takin player-ten thun tumin an bei a, minute 87-ah Itana’n freekick tha zeta a pet chuan goal kham a per a, hemi per let hi Zirtea’n thunin 1-1 in hun pangngaiah kan inhnehtawk.
    Penalty petah kan goal veng Zonunthara che thain, hun pawimawh lutukah vawi hnih a dang a, 4-3 in kan tlang. Final kan thlen thlengin vawi ruk kan khel a, hun pangngaia kan chak hman loh awmchhun a ni.
    Chanmari West hian tournament tan atangin goal 13 kan thun tawh a, heng zinga pariat hi Zirtea khung niin kan khelh apiangin a la tilut ziah. Tournament kan hmachhawn chhungin goal hnih kan chhuah.
    Thawhtanni tlai dar 2-ah champion lai Armed Veng nen final kan khel dawn. Team tawiawm turin branch YMA chuan vengchhung mipuite a sawm a, nunchang mawi tak nen inkhel en a, eng dinhmunah pawh kan team-te awm se a tawp rat thlenga tawiawm tlat turin mipuite a ngen nghal bawk a ni.