YMA football, Vodafone Cup-ah Chanmari West pahnihna

Chanmari West, June 10 :        Chanmari West branch YMA a din tirh atanga a vawi khat nan Central YMA buatsaih branch hrang hrang football inelnaah final kan khel a, Ni 4.6.2012 khan lammualah a khawnawtin kan thawk chhuak a, Armed Veng nen champion nih inchuhin 3-1 in kan chak ta lo. A pumpuiah pahnihna kan ni a, lawmman trophy leh pawisa fai Rs 30000/- kan dawng a ni.
    He inkhelhah hian si hnih kan phurh hnuah kan branch striker H Lalnunzira’n a tauh lut a, kan veng team hian theihtawpin bei ngial mah se, si khat kan chhuah belh leh a, hnehna kan chang zo ta lo. Hetih lai hian Zirtea’n kan khelh apiangin goal a thun a, tournament chhunga goal 15 kan khung zinga goal kua a tilut.
    Kan veng teamte tanpui tur hian veng mipui kan thawkchhuak tha hle a, incheina leh ri thei chi hrang hrang nen kan tawiawm a, kan tum angin hlawhtlinna chang zo lo mah ila, veng mipuiten a tawp thlengin team an thlawp thatzia an lantir a ni.
    YMA basketball-ah kan veng team-in consolation prize-ah no dozen 3 an dawng bawk. Tounament hi branch committee chuan thlir letin, kan dinhmunah lawmawm a ti a, player, coaching staff leh team tanpuitute bakah veng mipuite chungah lawmthu a sawi.

_________________________________________________________________________

YMA Day atan Section-te inbuatsaih

    YMA Day kan lo thleng dawn ta, branch committee chuan branch huapin intawhkhawm a buatsaih dawn lova, chutih laiin section lamah ropui taka hun hmang turin a ngen.
    Section tin nasa takin an inbuatsaih a, YMA day-ah hian branch committee chuan chhungkaw tin YMA flag zar theuh turin a beisei a, bawhzuiin section-ten flag an siam a, an zuar chhuak mek bawk. Day pual hian section-in faina hnatlang an nei theuh dawn a, hei bakah hian an remchan angin an lawm ang. CH chuan park-ah hun hlimawm tak hman tumin an inbuatsaih a, T pawhin indoor-ah he ni hi ropui taka hman an tum. K chuan hmunawl remchang an hmuhna hmunah hun hlimawm taka buatsaih an tum a,  V-in a remchan anga hman an tum bawk.

Branch committee a lawm

    CYMA football leh basketball tournament kan khelh zo ta a, Pathian min hruaina nasa tak kan dawng a, football bikah phei chuan pahnihna dinhmun kan luah thei hial a ni.Hetiang kan thlen theihna kawngah hian player leh coaching staff inpekna leh thawhrimna a ropui kan ti a, Veng chhung pawl hrang hrangin sum leh pai min pein min tawiawm a, veng mipui leh min tantuten sum leh tha nasa tak an seng a, heng zawng zawngah hian branch committee chuan lawmthu a sawi a ni.

YMA Day puala president Pu T. Ngurkhuma  thuchah

    Kum 2012 YMA Day chu kan lo thleng leh dawn ta; he hun lo thleng turah hian YMA member zawng zawng chibai ka bukin duhsakna ka hlan e.
    YMA Day atang hian member-ten Kristian nundan tha a nung a, mi dang tan inpekna thar leh Ram leh Hnam humhalh kawngah nasa lehzuala tan lain, hnam leh chi bil zawnga kal lo va, mizo nunze mawi chhawm nung thar zel turin ka ngen a che u. YMA dam reng rawh se, ka lawm e.