RSS feed

CHANMARI WEST BR. YMA CHANCHINBU VOL. XXI.


Lei khi-in kan veng min ti buai.

Chanmari West, July 8 :     Ni 1.7.2012 (Pathianni) chhunah khan Chief Minister bangalow hnuai, Chanmari area chinah ruah sur nasa leh tuihawk kal dan dik loh vangin lei a khi a, Zarkawt huam chinah hian in sa an awm bawk  si a, chuvang chuan helai hmuna lei khi hi tawlh mai thei dinhmunah a din phah a,  kan veng tan a hlauhawm hle a ni. Pathianniah khan kan veng Local Council huaihawtin lei khi hnuaia awm chhungkaw nga chu an bungrua thiar chhuah sak nghal an ni.
    Aizawl khawpui chhungah kan veng Local Council hian Disaster Management Committee a din hmasa ber a, anni hmalakna hian helai lei paih fai dan tur report chu Aizawl DC office-ah an thehlut a, Sawrkar thuchhuak hi kan nghak mek a ni, kan sawrkar pawh hian a min hun nghak lovin, a rang thei ang ber hian hma rawn la se tih chu veng mipui duh dan a ni.
    Lei khi hi silpaulin 20 hmangin khuh a ni tawh a, a khi karah hian tui a lut a nih chuan kan veng lamah lei hi tawlh vak thei a nih avangin veng mipuite fimkhur a tha hle. Lei khi hi PWD hotute pawhin an rawn en tawh a, Geology & Mining mi thiamte pawh endik tir nghal a ni a, lei hi 8ft laia thukin a khi a, a huam a zau bawk avangin a min mai ang tih a hlauhawm hle reng a ni.
________________________________________________________

MIZORAM PREMIER LEAGUE PLAY OFF KHEL TURIN CHANMARI WEST INBUATSAIH
    Mizoram Football Association (MFA) buatsaiha Mizoram Football Club tha pariat tena khelh tur Mizoram Premier League khel tur zawnna play Off  khel turin Chanmari West Sporting Club chu ngawrh takin an inbuatsaih chho meka, Play off hi July ni 13, Zirtawp dar 1:00 ah khelh tur a nia, Chanmari West Sporting Club ten match hmasaberah RS Annexe F/C Dinthar nen Lammualah an khel dawn a, Vengchhung mipui a tam thei ang ber tawiawm turin an in sawm a ni. Sum leh pai a tanpui thei tan chuan kan veng football club hi puih theih a tha hle a, kan veng aiawh a ni si a.

1 comment: